Mathais Sau 7:1-29
7 “Cia li tseg tsis txhob txiav txim rau luag, Vajtswv thiaj yuav tsis txiav txim rau nej.
2 Rau qhov nej txiav txim rau luag li cas, luag yuav txiav txim rau nej ib yam li ntawd. Nej muab lub luaj li cas luj rau luag, luag yuav muab lub luaj li ntawd luj rov rau nej.
3 Ua cas koj ho pom qhov nyuag hmoov ntoo* hauv koj tus kwv tij lub qhov muag, tiam sis koj ho tsis pom tog niag ntoo* hauv koj lub?
4 Koj yuav ua li cas hais rau koj tus kwv tij tias, ‘Cia kuv pab so qhov nyuag hmoov ntoo hauv koj lub qhov muag,’ tiam sis ib tog niag ntoo tseem nyob hauv koj lub?
5 Niag neeg siab nkhaus!* Koj yuav tsum xub tshem tog niag ntoo hauv koj lub qhov muag tso, koj thiaj pom kev so qhov nyuag hmoov ntoo hauv koj tus kwv tij lub.
6 “Nej tsis txhob muab yam uas dawb huv pov rau dev thiab tsis txhob muab tej hlaws muaj nqis pov rau npua. Tej tsiaj ntawd tsuas muab tsuj thiab tig los dua nej xwb.
7 “Yeej meem thov mas nej yuav tau. Yeej meem nrhiav mas nej yuav ntsib. Yeej meem khob mas yuav qhib rau nej.
8 Rau qhov txhua tus uas thov yeej yuav tau. Txhua tus uas nrhiav yeej yuav ntsib. Txhua tus uas khob yeej yuav qhib rau nws.
9 Nej cov yog leej twg tus tub taij ncuav es yuav cev pob zeb rau
10 thiab yog nws tus tub taij ntses es yuav cev nab rau lod?
11 Txawm nej yog neeg txhaum los nej twb paub muab tej yam zoo rau nej cov me nyuam. Yog li ntawd, nej Leej Txiv saum ntuj yim huab paub muab tej yam zoo rau cov uas thov nws!
12 “Yog li ntawd, txhua yam uas nej xav kom lwm tus ua rau nej, nej yuav tsum ua ib yam li ntawd rau lawv thiab. Qhov no thiaj raws li Mauxes Txoj Kev Cai thiab cov cev Vajtswv lus tej lus qhia.
13 “Cia li mus lub qhov rooj nqaim rau qhov lub qhov rooj dav thiab txoj niag kev loj coj mus raug kev puas tsuaj mas coob tus mus lub qhov rooj ntawd.
14 Tiam sis lub qhov rooj nqaim thiab txoj kev me coj mus tau txoj sia, tsuas yog tsawg tus thiaj nrhiav tau xwb.
15 “Ceev faj cov ua txuj cev Vajtswv lus uas sab nraud zoo li yaj, tiam sis sab hauv zoo li tej hma tuag tshaib uas xav muab nej dua noj.
16 Thaum nej pom lawv tes hauj lwm,* nej yuav paub lawv. Tib neeg yeej de tsis tau txiv hmab ntawm tsob pos los sis txiv cev ntawm tsob nrhab ib zaug li.
17 Ib yam li ntawd, txhua tsob ntoo zoo yeej txi cov txiv zoo, txhua tsob ntoo phem yeej txi cov txiv phem.
18 Tsob ntoo zoo yeej txi tsis tau cov txiv phem thiab tsob ntoo phem yeej txi tsis tau cov txiv zoo.
19 Txhua tsob ntoo uas txi tsis tau tej txiv zoo yeej raug muab ntov pov hlawv.
20 Yog li ntawd, thaum nej pom lawv tes hauj lwm* nej yuav paub tias lawv yog cov uas ua txuj cev Vajtswv lus xwb.
21 “Tsis yog txhua tus uas hu kuv tias, ‘Tus Tswv, tus Tswv,’ yuav tau nkag rau hauv lub Nceeg Vaj* saum ntuj. Tsuas yog tus uas ua raws li kuv Leej Txiv uas nyob saum ntuj lub siab nyiam thiaj tau xwb.
22 Thaum txog hnub ntawd coob tus yuav hais rau kuv tias, ‘Tus Tswv, tus Tswv, peb twb tuav koj lub npe cev lus, tuav koj lub npe ntiab dab, thiab tuav koj lub npe ua ntau yam txuj ci tseem ceeb los sad?’
23 Thaum ntawd kuv yuav teb lawv tias, ‘Kuv tsis paub nej! Cia li khiav mus, cov niag neeg lim hiam!’
24 “Yog li ntawd, txhua tus uas hnov kuv tej lus thiab coj raws nraim li ntawd yuav zoo ib yam li tus neeg muaj tswv yim ua tsev. Nws txhos nws lub tsev rau saum daim lag zeb.
25 Thaum nag xob nag cua los ntsawj thiab dej los nyab lub tsev los tsis vau rau qhov lub tsev twb txhos ruaj rau saum daim lag zeb lawm.
26 Tiam sis txhua tus uas hnov kuv tej lus no es tsis ua raws li ntawd, zoo ib yam li tus neeg tsis muaj tswv yim uas txhos nws lub tsev rau saum cov xuab zeb.
27 Thaum nag xob nag cua los ntsawj thiab dej los nyab lub tsev, lub tsev txawm vau hlo puas tsuaj tag.”
28 Thaum Yexus hais tej lus no tas, cov neeg coob coob ntawd xav tsis thoob rau nws lub tswv yim,
29 rau qhov nws muaj hwj chim qhia* tsis thooj li lawv cov xib hwb.*
Cov taw ntawv
^ Los sis “quav nyab.”
^ Lus Kilis yog “qhab tse.”
^ Los sis “Niag neeg ncauj lus zoo siab phem!”
^ Lus Kilis yog “tej txiv.” Cov txiv ntawd piv txog tes hauj lwm.
^ Lus Kilis yog “tej txiv.” Cov txiv ntawd piv txog tes hauj lwm.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Yexus tsis siv cov xib hwb tej tswv yim los qhia. Tiam sis nws siv Vajtswv Txoj Lus los qhia rau qhov nws sawv cev rau Vajtswv.
^ Los sis “cov xib hwb qhia Vajtswv kev cai.” Mus saib Cov Lus Txhais.
