Mathais Sau 9:1-38
-
Yexus kho ib tug tuag tes tuag taw (1-8)
-
Yexus yaum Mathais (9-13)
-
Yauhas cov thwj tim nug txog kev cai yoo mov (14-17)
-
Yailas tus ntxhais thiab tus poj niam kov Yexus tw tsho (18-26)
-
Yexus kho ob tug dig muag thiab tus hais tsis tau lus (27-34)
-
Qoob zoo hlais tiam sis tub zog tsis muaj coob (35-38)
9 Yexus thiaj nce nkoj thiab hla rov mus rau tim nws lub nroog.
2 Txawm muaj tib neeg kwv ib tug tuag tes tuag taw saum txaj tuaj cuag Yexus. Yexus pom tias lawv muaj kev ntseeg heev, nws thiaj hais rau tus tuag tes tuag taw tias, “Tub’e, txhob txhawj! Kuv twb zam koj lub txim lawm.”
3 Cov xib hwb* xav twj ywm tias, “Tus yawg no hais lus tuam mom Vajtswv lawm.”
4 Yexus paub tej uas lawv xav ntawd nws thiaj hais tias, “Ua cas nej xav phem ua luaj?
5 Leej twg los yeej hais tau tias, ‘Kuv zam koj lub txim lawm.’ Tiam sis leej twg yuav hais tau tias, ‘Cia li sawv tsees mus,’ es nws yuav sawv taus?
6 Kuv xav kom nej paub tias neeg Leej Tub muaj hwj chim zam tau neeg lub txim hauv ntiaj teb no.” Ces Yexus tig mus saib tus yawg tuag tes tuag taw thiab hais tias, “Cia li sawv tsees, nqa koj lub txaj mus tsev.”
7 Tus yawg ntawd txawm sawv tsees nqa hlo nws lub txaj mus tsev.
8 Thaum sawv daws pom tej no lawv xav tsis thoob li. Lawv thiaj qhuas Vajtswv, tus uas pub hwj chim rau neeg ua tau li ntawd.
9 Tom qab ntawd, Yexus mus pom ib tug txiv neej hu ua Mathais tom lub tsev sau se. Yexus hais rau nws tias, “Cia li nrog kuv mus.” Ces Mathais txawm sawv tsees nrog Yexus mus lawm.
10 Tom qab ntawd, thaum Yexus tseem noj mov hauv Mathais tsev, ua ciav txawm muaj cov neeg sau se thiab cov neeg txhaum coob tus tuaj nrog Yexus thiab nws cov thwj tim noj mov.
11 Thaum cov Falixais pom li ntawd, lawv hais rau Yexus cov thwj tim tias, “Ua cas nej tus xib hwb tseem nrog cov neeg sau se thiab cov neeg muaj txim koom tsum thiab?”
12 Thaum Yexus hnov cov Falixais hais li ntawd, nws teb tias, “Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.
13 Mus ua tib zoo nyeem nqe uas hais tias, ‘Kuv tsis xav kom nej tua tsiaj fij rau kuv xwb, tiam sis kuv xav kom nej muaj lub siab hlub* luag thiab.’ Yog li, kuv tsis yog los nrhiav cov neeg ncaj ncees* tiam sis kuv los nrhiav cov neeg muaj txim.”
14 Tom qab ntawd, Yauhas cov thwj tim kuj nug Yexus tias, “Ua cas peb cov thiab cov Falixais ua kev cai yoo mov es koj cov thwj tim ho tsis ua?”
15 Yexus teb lawv tias, “Thaum tus nraug vauv tseem nrog nws cov kwv luag noj tshoob ua ke, lawv yeej tsis nyuaj siab li, puas yog? Tiam sis muaj ib hnub luag yuav coj tus nraug vauv mus, thaum ntawd lawv mam yoo mov.
16 Tsis muaj leej twg yuav muab daim ntaub tshiab los ntxiv lub tsho qub, vim daim ntaub tshiab yuav rub lub tsho qub ces haj yam yuav ntuag loj.
17 Ib yam li ntawd, tsis muaj leej twg yuav muab cov cawv txiv hmab tshiab tsau rau hauv lub hnab tawv qub. Yog ua li ntawd, lub hnab tawv qub yuav tawg ces cov cawv yuav txeej tas. Lub hnab tawv kuj puas tsuaj lawm thiab. Tsuas muab cov cawv txiv hmab tshiab tsau rau hauv lub hnab tawv tshiab xwb, thiaj tsis tawg.”
18 Thaum Yexus tab tom hais tej no, muaj ib tug nom txawm los khwb nkaus* ntawm Yexus ko taw thiab thov nws tias, “Kuv tus ntxhais mob hnyav heev, ntshe tsam no nws twb tu siav lawm. Tiam sis yog koj mus cev tes npuab nws, nws yeej yuav ciaj rov los.”
19 Yexus thiaj sawv tsees mus, nws cov thwj tim kuj nrog nws mus thiab.
20 Txawm muaj ib tug poj niam uas nchuav cev tau 12 lub xyoos nam zog los kov Yexus lub tw tsho.
21 Tus poj niam ntawd pheej xav tias, “Yog kuv ib nyuag kov nws lub tw tsho mas kuv yeej yuav zoo xwb.”
22 Thaum Yexus tig loo mus pom nws, Yexus hais tias, “Me ntxhais’e, tsis txhob ntshai! Twb yog koj ntseeg, koj thiaj zoo.” Tam sim ntawd tus poj niam txawm zoo hlo lawm.
23 Thaum Yexus mus txog hauv tus nom lub tsev, nws pom muaj neeg tab tom tshuab raj thiab quaj ntsoog qees.
24 Yexus thiaj hais tias, “Tawm mus sab nraud. Tus me ntxhais tsis tau tuag, nws tsaug zog lawm xwb.” Lawv txawm luag Yexus zom zaws.
25 Thaum cov tib neeg tawm mus sab nraud lawm, Yexus mus rau ntawm tus me ntxhais thiab tuav nkaus nws txhais tes ces nws txawm sawv tsees.
26 Mas zaj no thiaj nrov ncha mus thoob plaws cheeb tsam ntawd.
27 Thaum Yexus sawv kev mus rau lwm qhov, muaj ob tug yawg dig muag caum Yexus thiab hu nrov nrov tias, “Daviv tus Xeeb Ntxwv’e, thov hlub* wb thiab lauj!”
28 Thaum Yexus mus rau hauv tsev los nkawd kuj raws nws qab mus thiab. Yexus thiaj nug nkawd tias, “Neb puas ntseeg tias kuv kho tau neb?” Nkawd teb tias, “Tus Tswv, wb yeej ntseeg.”
29 Ces Yexus txawm kov nkawd qhov muag thiab hais tias, “Vim neb ntseeg, neb yeej yuav pom kev.”
30 Ces nkawd txawm pom kev tam sid. Yexus txwv nkawd tias, “Tsis txhob qhia tej no rau leej twg paub li.”
31 Tiam sis thaum nkawd tawm mus, nkawd muab qhia thoob zej thoob zos lawm.
32 Thaum ob tug yawg dig muag yuav sawv kev mus, tib neeg txawm coj ib tug yawg raug dab uas hais tsis tau lus tuaj cuag Yexus.
33 Tom qab Yexus ntiab tus dab ntawd tawm, tus txiv neej txawm hais tau lus lawm. Cov neeg coob coob xav tsis thoob li, lawv thiaj hais tias, “Peb tsis tau pom dua tej no hauv teb chaws Ixayees ib zaug li.”
34 Tiam sis cov Falixais hais tias, “Twb yog tus thawj kav cov dab pub hwj chim rau nws ntiab dab ntag.”
35 Ces Yexus ncig mus thoob plaws tej zej zos, mus qhia hauv tej tsev pe hawm thiab tshaj tawm txoj xov zoo txog Vajtswv txoj kev kav* thiab kho txhua yam kab mob kev nkeeg uas tib neeg muaj huv si.
36 Thaum Yexus pom cov neeg coob coob ntawd, nws hlub lawv heev vim lawv zoo li pab yaj uas tshaib tshaib* tsis muaj tus tswv yug.
37 Ces nws hais rau nws cov thwj tim tias, “Tej qoob twb siav zoo hlais lawm, tiam sis cov tub zog tsis muaj coob.
38 Cia li thov tus Tswv teb txib neeg mus sau nws tej qoob loo.”
Cov taw ntawv
^ Los sis “Cov xib hwb qhia Vajtswv kev cai.” Mus saib Cov Lus Txhais.
^ Lus Kilis yog “khuv leej.”
^ Uas yog cov uas xav tias lawv ncaj dua lwm tus.
^ Los sis “pe.”
^ Lus Kilis yog “khuv leej.”
^ Lus Kilis yog “lub Nceeg Vaj.” Mus saib Cov Lus Txhais.
^ Lus Kilis yog “raug tsim raug dua, khaub hlab khaub hluas.”
