Tub Txib Tes Hauj Lwm 2:1-47
2 Hnub uas tab tom ua Kev Cai Pheetekos,* cov thwj tim sawv daws tuaj ua ke rau hauv ib lub tsev.
2 Txawm muaj ib lub suab nrov nroo ntws saum ntuj los thoob plaws lub tsev yam nkaus li ib nthwv cua hlob heev.
3 Ua ciav lawv pom zoo li tej nplaim taws* tshwm plaws los faib pes rhe rau saum lawv txhua tus.
4 Lub hwj huam dawb huv thiaj los rau saum lawv txhua tus ces lawv txawm hais tau lwm yam lus raws li lub hwj huam ua rau lawv hais.
5 Thaum ntawd muaj cov Yudais uas hwm Vajtswv heev tuaj txhua lub teb chaws tuaj so hauv Yeluxalees.
6 Thaum sawv daws hnov lub suab nrov nroo ntws, muaj neeg coob coob txawm tuaj rau ntawm lub tsev seb muaj dab tsi. Ua ciav lawv hnov cov thwj tim hais tau lawv yam lus mas lawv xav tsis thoob li.
7 Lawv thiaj qhuas tias, “Cov no yog neeg Kalilais xwb los sad?
8 Ua cas peb ho hnov lawv hais tau peb yam lus thiab?
9 Peb cov no yog neeg Pathias, Medias, thiab Elas, thiab muaj cov nyob teb chaws Mexaupotamias, Yudias, Khapedaukias, Phauthias thiab xeev Axias* tuaj.
10 Lwm cov nyob teb chaws Fikias, Pafilias, Iyiv, thiab nyob koog Linpias ze Xailinis tuaj. Tseem muaj cov Yudais thiab lwm haiv neeg uas los coj Yudais tej kev cai uas tuaj hauv Loos tuaj.
11 Kuj muaj cov neeg Khetes, cov neeg Alanpias thiab. Peb kuj hnov lawv qhia Vajtswv tes hauj lwm zoo kawg nkaus ua peb yam lus tib si.”
12 Tej no ua rau sawv daws xav tsis thoob li, lawv thiaj sib nug zom zaws tias, “Ua cas ho muaj tau li no?”
13 Tiam sis muaj dua lwm cov ho thuam tias, “Cov niag ntawd qaug cawv* xwb.”
14 Tiam sis Petus sawv tsees nrog 11 tug tub txib hais nrov nrov rau sawv daws tias, “Ib tsoom neeg hauv Yudias thiab txhua tus uas nyob hauv Yeluxalees’e, peb xav kom nej paub txog tej no. Thov ua tib zoo mloog tej uas kuv yuav hais no.
15 Cov neeg no tsis qaug cawv li nej xav, rau qhov nyuam qhuav yog cuaj teev sawv ntxov xwb.
16 Tiam sis tej no muaj raws li Yau-ees tus uas cev Vajtswv lus tau hais tseg tias,
17 ‘Vajtswv hais tias, “Nyob rau tiam kawg, kuv yuav pub kuv lub hwj huam rau txhua hom neeg mas nej cov tub cov ntxhais yuav cev kuv tej lus. Nej cov tub hluas yuav ua yog toog thiab cov yawg laus yuav ua npau suav.
18 Thaum ntawd, kuv tej tub qhe ntxhais qhev los kuv yuav pub kuv lub hwj huam rau lawv mas lawv yuav cev kuv tej lus.
19 Kuv yuav ua txuj ci tshwm saum nruab ntug thiab ua txuj ci tshwm rau hauv ntiaj teb mas yuav muaj ntshav, muaj hluav taws, thiab muaj pa taws ncho auv niab.
20 Lub hnub yuav tsaus thiab lub hli yuav liab li ntshav ua ntej Vajtswv Yehauvas* hnub tseem ceeb ci ntsa iab los txog.
21 Thiab txhua tus uas tuav Vajtswv Yehauvas* lub npe thov yuav dim.”’
22 “Ib tsoom neeg Ixayees’e, ua tib zoo mloog cov lus no, Yexus tus neeg Naxales yog Vajtswv ua tus txib los. Peb yeej paub tseeb li no rau qhov Vajtswv pub hwj chim rau Yexus ua ntau yam txuj ci tseem ceeb tab meeg nej, ua rau sawv daws xav tsis thoob li. Nej yeej paub zoo txog tej no lawm.
23 Nej ntes tus txiv neej no thiab muab nws cob rau yeeb ncuab txhais tes. Qhov no yeej muaj raws li Vajtswv teem tseg, thiab Vajtswv twb paub tias nws yuav raug li cas. Thaum cov neeg lim hiam ntawd muab nws ntsia saum tus ncej ntoo,* twb yog nej tua nws ntag.
24 Tiam sis Vajtswv tsa nws ciaj sawv rov los uas yog tso nws dim txoj kev tuag, rau qhov txoj kev tuag tsis muaj hwj chim khi tau nws lawm.
25 Daviv twb hais txog nws li no, ‘Kuv yeej xav ntsoov txog Vajtswv Yehauvas.* Nws nyob rawv ntawm kuv sab xis, kuv thiaj nyob ruaj khov.*
26 Twb yog li ntawd, kuv lub siab thiaj kaj nrig thiab kuv lub ncauj thiaj hais tej lus zoo xyiv fab hlo. Kuv yuav nyob tso siab plhuav rau koj,
27 vim koj yeej tsis tso kuv* tseg rau hauv lub qhov tuag.* Koj yeej tsis cia tus uas muab siab npuab koj cev nqaij lwj.
28 Koj qhia txoj kev uas tau txoj sia rau kuv paub. Koj yuav ua rau kuv lub siab nyob kaj nrig hauv koj xub ntiag.’
29 “Ib tsoom kwv tij sawv daws, kuv hais tshab rau nej txog peb yawg koob Daviv. Thaum nws tuag, luag muab nws log. Nws lub ntxa tseem nyob los txog niaj hnub nim no.
30 Daviv yog ib tug cev Vajtswv lus thiab nws nco ntsoov Vajtswv lo lus cog tseg tias nws ib tug xeeb ntxwv yuav tau ua vaj ntxwv kav.
31 Daviv thiaj paub ua ntej tias Vajtswv yuav tsa tus Khetos ciaj sawv rov los, thiab qhia tias Vajtswv yeej yuav tsis tso Khetos tseg rau hauv lub qhov tuag,* thiab yuav tsis cia nws cev nqaij lwj.
32 Vajtswv twb tsa Yexus ciaj sawv rov los lawm tiag, peb sawv daws yeej ua tim khawv pom lawm.
33 Vajtswv tsa Yexus mus zaum ntawm Vajtswv sab xis, thiab nws txais lub hwj huam dawb huv uas Leej Txiv tau cog tseg lawd. Nim no Yexus pub* lub hwj huam ntawd rau peb, nej thiaj hnov thiab pom tej no.
34 Daviv yeej tsis tau mus saum ntuj, tiam sis nws hais hlo tias, ‘Vajtswv Yehauvas* hais rau kuv tus Tswv tias, “Los zaum ntawm kuv sab xis
35 mus txog thaum kuv muab koj cov yeeb ncuab rau koj tiag taw.”’
36 Yog li ntawd, thov kom ib tsoom neeg Ixayees paub tseeb tias Yexus, tus uas nej muab tua rau saum tus ncej ntoo,* Vajtswv twb muab nws tsa ua tus Tswv thiab tus Khetos lawm.”
37 Thaum lawv hnov tej lus no ua rau lawv ntxhov siab heev. Lawv thiaj nug Petus thiab cov tub txib tias, “Cov kwv tij, peb yuav ua li cas?”
38 Petus thiaj teb lawv tias, “Yog nej xav kom Vajtswv zam nej lub txim, nej txhua tus yuav tsum hloov dua siab tshiab thiab tuav Yexus Khetos lub npe ua kev cai raus dej. Ces Vajtswv yuav muab lub hwj huam dawb huv pub* rau nej.
39 Rau qhov lub hwj huam no yog Vajtswv cog tseg rau nej thiab nej tej tub ki, thiab rau txhua tus uas nyob deb, thiab txhua tus uas peb tus Vajtswv Yehauvas* hu los cuag nws.”
40 Petus tseem hais ntau yam ntxiv los qhia tshab rau lawv, thiab nws txhawb kom lawv ua li no, “Cia li khiav kom dim tiam neeg siab nkhaus no.”
41 Yog li ntawd, txhua tus uas zoo siab hlo khaws Petus tej lus thiaj ua kev cai raus dej. Hnub ntawd muaj txog li 3,000 leej* los ntseeg ntxiv.
42 Lawv sawv daws thiaj kub siab lug tuaj mloog cov tub txib qhia, sib txhawb zog kom muaj kev sib raug zoo, noj haus ua ke, thiab thov Vajtswv tsis tseg.
43 Cov tub txib ua tau ntau yam txuj ci mas sawv daws* xav tsis thoob li thiab hwm* Vajtswv kawg nkaus.
44 Tag nrho cov uas los ntseeg tuaj ua ke thiab coj tej uas lawv muaj tuaj sib faib siv.
45 Lawv muab lawv tej teb tej av thiab tej qhov txhia chaw muag, thiab muab cov nyiaj faib rau sawv daws raws li lawv cheem tsum.
46 Lawv niaj hnub koom ib lub siab mus sib txoos ua ke hauv lub tuam tsev. Ib leeg kuj caw ib leeg mus noj mov tom lawv tej tsev thiab sib faib noj haus ua ke. Lawv yeej muaj lub siab dawb paug ua li no mas lawv xyiv fab kawg li.
47 Lawv niaj hnub qhuas Vajtswv, thiab ib tsoom neeg sawv daws txaus siab heev rau lawv. Tsis tas li ntawd xwb, Vajtswv Yehauvas* niaj hnub coj tib neeg los ntseeg coob zuj zus ntxiv thiaj cawm tau lawv dim.
Cov taw ntawv
^ Mus saib lo lus “Pheetekos” hauv Cov Lus Txhais.
^ Los sis “tej nplaim taws zoo li tus nplaig.”
^ Mus saib Cov Lus Txhais.
^ Los sis “qaug cawv txiv hmab tshiab.”
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Los sis “kuv thiaj tsis ntxhov siab.”
^ Lus Kilis yog “Hedis.” Mus saib Cov Lus Txhais.
^ Lus Kilis yog “xakis.” Mus saib Cov Lus Txhais.
^ Lus Kilis yog “Hedis.” Mus saib Cov Lus Txhais.
^ Los sis “nchuav.”
^ Mus saib Cov Lus Txhais.
^ Mus saib Cov Lus Txhais.
^ Los sis “pub dawb.”
^ Mus saib Cov Lus Txhais.
^ Lus Kilis yog “xakis.” Mus saib Cov Lus Txhais.
^ Lus Kilis yog “xakis.” Mus saib Cov Lus Txhais.
^ Los sis “ntshai.”
^ Mus saib Cov Lus Txhais.
