Tub Txib Tes Hauj Lwm 5:1-42
5 Tiam sis muaj ib tug yawg hu ua Ananias, thiab nws tus poj niam hu ua Xafilas, nkawd tau muab nkawd ib thaj av muag.
2 Thaum nws nqa cov nyiaj tuaj rau cov tub txib tuav, nws muab ib txhia qee twj ywm tseg lawm. Nws tus poj niam kuj paub tias nws ua li ntawd.
3 Tiam sis Petus hais rau nws tias, “Ananias, ua cas koj yuav cia Xatas ntxias tau koj los dag lub hwj huam dawb huv? Koj twb muab cov nyiaj muag teb ib txhia khaws cia lawm sad?
4 Daim teb ntawd yeej yog koj li los tsis yog? Thaum koj muab muag lawd, koj yuav muab cov nyiaj siv ua dab tsi los nyob ntawm koj. Ua cas koj yuav muaj lub siab dag li no? Tsis yog koj dag tib neeg, tiam sis yog koj dag Vajtswv ntag.”
5 Thaum Ananias hnov dheev li no, nws txawm vau hlo tuag kiag tam sid. Txhua tus uas hnov txog zaj no thiaj ntshai kawg li.
6 Cov tub hluas txawm los muab ntaub qhwv nws thiab kwv nws coj mus faus lawm.
7 Kwv lam peb txoos teev tom qab ntawd Ananias tus poj niam txawm tuaj txog, tiam sis nws tsis paub txog qhov xwm no.
8 Petus hais rau nws tias, “Qhia kuv seb, puas yog neb muag daim teb tau npaum li ntawd xwb tiag?” Nws teb tias, “Yeej tau li ntawd xwb.”
9 Petus thiaj hais rau nws tias, “Ua cas neb yuav koom ib lub siab dag Vajtswv Yehauvas* lub hwj huam li no? Koj puas hnov cov neeg uas coj koj tus txiv mus faus los txog ntawm qhov rooj lawd? Zaum no lawv yuav kwv koj mus thiab.”
10 Tam sim ntawd, tus poj niam kuj vau hlo ntawm Petus ko taw tuag kiag lawm thiab. Thaum cov tub hluas los txog, ua ciav nws tuag lawm. Lawv thiaj kwv nws mus faus ntawm nws tus txiv ib sab.
11 Tag nrho lub koom txoos thiab txhua tus uas hnov txog zaj no thiaj ntshai kawg li.
12 Cov tub txib niaj hnub ua txuj ci tseem ceeb rau sawv daws pom mas lawv xav tsis thoob li, thiab lawv kuj tuaj sib ntsib ua ke hauv Xalaumoos zaj qab khav.
13 Txawm tsis muaj leej twg kav tuaj koom cov thwj tim los, cov tib neeg yeej qhuas lawv heev.
14 Thiab muaj tej poj niam txiv neej coob kawg li los ntseeg tus Tswv ntxiv.
15 Kuj muaj tib neeg coj cov uas muaj mob tuaj tso ntawm ntug kev loj, thiab muab txaj muab lev pua rau lawv pw qhov ntawd. Lawv vam tias thaum Petus dua kev tuaj mus, nws tus duab yuav roos cov neeg muaj mob thiab kho tau lawv zoo.
16 Tseem muaj neeg coob kawg li tuaj hauv tej nroog puag ncig Yeluxalees tuaj cuag cov tub txib. Lawv kwv tej neeg muaj mob thiab cov uas raug dab* tsim txom tuaj mas cov tub txib kho tau lawv zoo tib si.
17 Tiam sis tus tuam pov thawj hlob thiab cov Xadukais uas nrog nws ua ib pab khib kawg li.
18 Lawv thiaj ntes kiag cov tub txib coj mus kaw hauv tsev loj cuj.
19 Tiam sis thaum ib tag hmo Vajtswv Yehauvas* tus tub txib saum ntuj txawm qhib lub qhov rooj tsev loj cuj thiab coj lawv tawm mus. Nws hais rau lawv tias,
20 “Cia li mus hauv lub tuam tsev thiab kav tsij qhia rau cov tib neeg tias yuav ua li cas thiaj tau txoj sia.”
21 Thaum lawv hnov li no ces kaj ntug plaws xwb lawv txawm mus tom lub tuam tsev thiab pib qhia sawv daws.
Thaum tus tuam pov thawj hlob thiab cov uas nrog nws ua ib pab tuaj txog, lawv hu lub rooj Xahenrees* tuaj sab laj ua ke. Lawv hu ib tsoom neeg Ixayees cov kev txwj laus neeg tuaj tib si. Thiab lawv txib tub ceev xwm mus tom tsev loj cuj mus coj cov tub txib tawm los rau lawv.
22 Tiam sis thaum cov tub ceev xwm mus txog tom tsev loj cuj ua ciav tsis pom cov tub txib nyob hauv. Lawv thiaj rov los qhia tias,
23 “Peb mus txog tod, lub tsev loj cuj tej qhov rooj kaw nti. Muaj neeg zov rawv qhov rooj, tiam sis thaum peb qhib qhov rooj mus txog hauv, tsis muaj leej twg li.”
24 Thaum tus thawj tub ceev xwm zov lub tuam tsev thiab cov pov thawj hlob hnov li ntawd, lawv xav tsis thoob thiab tsis paub xyov tseem yuav zoo li cas ntxiv.
25 Tiam sis muaj neeg tuaj qhia rau lawv tias, “Cov txiv neej uas nej muab ntes kaw lawd nyob hauv lub tuam tsev. Lawv tab tom qhia cov tib neeg.”
26 Tus thawj tub ceev xwm thiaj coj nws cov tub ceev xwm mus ntes lawv los. Tiam sis lawv tsis ua nruj ua tsiv rau cov tub txib rau qhov lawv ntshai tsam cov tib neeg xuas pob zeb ntaus lawv.
27 Cov tub ceev xwm thiaj coj cov tub txib los sawv tab meeg lub rooj Xahenrees.* Tus tuam pov thawj hlob txawm los nug lawv.
28 Nws hais tias, “Peb twb txwv tu nrho tsis pub nej tuav lub npe no* qhia. Ua cas nej txawm siv muab zaj no qhia thoob Yeluxalees lawm! Nej tseem muab lub txim tua tus neeg ntawd nog rau peb ris thiab.”
29 Petus thiab cov tub txib thiaj teb tias, “Tsim nyog peb mloog Vajtswv* lus dua li mloog neeg lus.
30 Nej yog cov uas tua Yexus thiab muab nws ntsia saum tus ncej ntoo.* Peb yawg koob tus Vajtswv twb tsa nws ciaj sawv rov los lawm.
31 Vajtswv twb tsa nws ua tus Thawj* thiab tus Cawm Seej nyob ntawm Vajtswv sab xis, kom ib tsoom neeg Ixayees hloov dua siab tshiab thiab kom Vajtswv zam lawv lub txim.
32 Peb yog cov uas pom tej no. Thiab lub hwj huam dawb huv uas Vajtswv pub rau cov mloog nws lus, pab kom peb ua tim khawv qhia tej no.”
33 Thaum lawv hnov li ntawd, lawv npau taws heev thiab xav muab cov tub txib tua kiag tam sid.
34 Tiam sis ib tug Falixais hu ua Kamali-ees txawm sawv tsees los hais lub rooj Xahenrees.* Nws yog ib tug xib hwb qhia txoj Kev Cai uas sawv daws hwm heev. Nws kom lawv coj cov tub txib tawm mus sab nraud ib pliag.
35 Nws txawm hais tias, “Ib tsoom neeg Ixayees, nej yuav tau ceev faj, txhob rawm ua li cas rau cov neeg no.
36 Thaum ub muaj ib tug yawg sawv tawm tsam nom tswv hu ua Thudas. Nws khav tias nws yog ib tug neeg tseem ceeb. Muaj li 400 leej txiv neej caum nws. Tiam sis tsis ntev xwb, luag muab nws tua pov tseg ces pab ntawd txawm tawg ua sab ua sua ploj tag lawm.
37 Tom qab no, lub sij hawm uas txheeb pej xeem, Yudas uas yog neeg Kalilais ho sawv tawm tsam nom tswv. Nws ntxias tau coob tus caum nws. Tiam sis luag kuj muab nws tua pov tseg ces pab uas raws nws ntawd kuj tawg ua sab ua sua lawm thiab.
38 Yog li ntawd, kuv hais rau nej tias, tsis txhob txwv cov neeg no, cia lawv ua lawv. Yog lub tswv yim thiab tes hauj lwm no yog neeg li xwb ces yeej yuav mus tsis taus.
39 Tiam sis yog Vajtswv kom lawv ua ces nej yuav tawm tsam tsis yeej lawv. Nyob tsam ho yog nej tawm tsam Vajtswv ntag.”
40 Lawv thiaj pom zoo ua raws li Kamali-ees hais. Lawv hu cov tub txib rov los thiab muab lawv nplawm. Lawv txwv tu nrho kom cov tub txib tsis txhob tuav Yexus lub npe qhia ntxiv lawm ces lawv mam tso cov tub txib mus.
41 Thaum cov tub txib tawm ntawm lub rooj Xahenrees* mus, lawv zoo siab xyiv fab kawg li rau qhov lawv tau txoj koob hmoov uas yog raug tsim txom vim tuav Yexus lub npe.
42 Lawv niaj hnub mus hauv lub tuam tsev thiab mus ib lub tsev rau ib lub, mas lawv qhia thiab tshaj tawm txoj xov zoo tsis tseg txog Yexus uas yog tus Khetos.
Cov taw ntawv
^ Mus saib Cov Lus Txhais.
^ Lus Kilis yog “tej plig tsis huv.” Mus saib lo lus “Dab” hauv Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Uas yog Yexus lub npe.
^ Los sis “mloog Vajtswv uas yog peb tus Vaj Ntxwv.”
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
