Yauhas Sau 21:1-25
21 Tom qab ntawd, Yexus rov tshwm rau cov thwj tim pom ntawm Hiav Txwv Thinpelias.* Nws los rau lawv pom li no.
2 Thaum ntawd Ximoos Petus, Thaumas (tus uas hu ua Ntxaib), Nathana-ees uas nyob lub zos Khanas hauv Kalilais tuaj, Xenpedis ob tug tub, thiab muaj dua ob tug thwj tim, lawv tuaj ua ke rau ntawd.
3 Ximoos Petus hais rau lawv tias, “Kuv yuav mus ntaus ntses.” Lawv thiaj hais tias, “Peb nrog koj mus thiab.” Lawv txawm nce nkoj mus, tiam sis hmo ntawd tsis mag ib tug ntses li.
4 Thaum kaj ntug txoog, Yexus sawv tim ntug dej tiam sis cov thwj tim tsis paub tias yog nws.
5 Yexus hais rau lawv tias, “Cov kwv luag,* nej puas muaj dab tsi* noj?” Lawv teb tias, “Tsis muaj!”
6 Yexus thiaj qhia lawv tias, “Ntaus nej lub vas rau ntawm lub nkoj sab xis ces yuav mag ntses.” Lawv txawm ntaus li ntawd ces mag ntses ntau heev, lawv rub tsis taus los li.
7 Tus thwj tim uas Yexus hlub thiaj hais rau Petus tias, “Yog tus Tswv sad!” Thaum Ximoos Petus hnov dheev li ntawd, nws sawv tsees khaws nkaus lub tsho* los hnav vim nws muab hle lawm,* thiab tib plhaw rau hauv dej.
8 Tiam sis cov thwj tim caij lub nkoj me me los. Lawv maj mam rub lub vas uas mag ntses puv nkaus los rau tim ntug. Thaum ntawd lawv nyob tsis deb ntawm ntug, tsuas deb li 100 mev* xwb.
9 Thaum lawv los txog tim ntug, lawv pom ib cub thee muaj ntses thiab muaj ncuav.
10 Yexus hais rau lawv tias, “Nqa ib co ntses uas nyuam qhuav mag los thiab.”
11 Ximoos Petus thiaj rov nce saum lub nkoj thiab rub lub vas los rau tim ntug. Lub vas puv nkaus tej ntses loj loj xwb, mag tau 153 tug. Txawm lub vas mag ntses ntau npaum li ntawd los tsis ntuag li.
12 Yexus thiaj hu lawv tias, “Los noj tshais.” Tiam sis cov thwj tim tsis muaj ib tug kav nug tias nws yog leej twg, rau qhov lawv yeej paub tias yog tus Tswv.
13 Yexus thiaj muab cov ncuav cev rau lawv, nws mam li muab cov ntses.
14 Txij hnub uas Yexus sawv hauv qhov tuag rov los, zaum no yog zaum peb uas nws tshwm rau cov thwj tim pom.
15 Thaum lawv noj tshais tas, Yexus txawm nug Ximoos Petus tias, “Ximoos uas yog Yauhas tus tub, koj puas hlub kuv tshaj tej no?” Nws teb tias, “Tus Tswv, koj yeej paub tias kuv hlub koj.” Yexus thiaj hais tias, “Cia li yug kuv cov me nyuam yaj.”
16 Yexus rov nug zaum ob tias, “Ximoos uas yog Yauhas tus tub, koj puas hlub kuv?” Nws teb tias, “Hlub los mas, tus Tswv, koj yeej paub tias kuv hlub koj.” Yexus hais tias, “Cia li tu kuv cov me nyuam yaj.”
17 Yexus thiaj rov nug zaum peb tias, “Ximoos uas yog Yauhas tus tub, koj puas hlub kuv?” Petus thiaj ntxhov siab qhov uas Yexus rov nug nws zaum peb tias, “Koj puas hlub kuv?” Petus thiaj teb Yexus tias, “Tus Tswv, koj paub ib puas tsav yam thiab paub tias kuv yeej hlub koj.” Yexus thiaj hais tias, “Cia li yug kuv cov me nyuam yaj.
18 Kuv hais ncaj qha rau koj tias, thaum koj tseem hluas, koj tu cev khov kho thiab mus txoj ke twg los tau. Tiam sis thaum koj laus lawd, koj yuav xyab tes rau luag kho khaub ncaws rau koj hnav, thiab luag yuav coj koj mus rau qhov chaw uas koj tsis xav mus.”
19 Yexus hais li no qhia tias Petus yuav tuag li cas Vajtswv thiaj tau koob meej. Thaum Yexus hais li ntawd tas, nws hais tias, “Cia li nrog nraim kuv.”
20 Petus txawm tig mus pom tus thwj tim uas Yexus hlub lawv nkawd qab. Nws yog tus thwj tim uas thaum lawv noj pluas hmo es zaum pheeb Yexus thiab nug tias, “Tus Tswv, leej twg yog tus ntxeev siab rau koj?”
21 Thaum Petus pom tus thwj tim ntawd nws thiaj nug Yexus tias, “Tus Tswv, es tus no ho yuav raug li cas?”
22 Yexus thiaj teb tias, “Txawm kuv yuav tseg nws nyob mus txog thaum kuv rov qab los, los tsis tas koj yuav txhawj. Koj cia li nrog nraim kuv xwb.”
23 Tom qab ntawd, tej no txawm nrov ncha mus rau cov kwv tij sawv daws tias tus thwj tim ntawd yuav tsis tuag li. Tiam sis Yexus tsis tau hais tias nws yuav tsis tuag. Yexus tsuas hais tias, “Txawm kuv yuav tseg nws nyob mus txog thaum kuv rov qab los, los tsis tas koj yuav txhawj.”
24 Tus no yog tus thwj tim uas ua tim khawv txog tej no, thiab yog tus uas muab tej no sau cia. Peb paub tias nws yeej ua tim khawv tseeb.
25 Tseem tshuav ntau yam uas Yexus tau ua. Yog yuav muab sau huv tib si cia, ntshe hauv lub qab ntuj no yuav tsis muaj chaw txaus ntim tej kauj ntawv* ntawd.
Cov taw ntawv
^ Los sis “Hiav Txwv Kalilais.” Mus saib Yauhas 6:1.
^ Lus Kilis yog “Cov me nyuam.”
^ Los sis “puas muaj ntses.”
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Los sis “vim nws liab qab.”
^ Los sis “deb li 300 fij” los sis “200 tshim.”
^ Mus saib Cov Lus Txhais.
