Thaum npaj yuav tawm tsev mus nyob ib leeg mas yog ib lub caij zoo siab vim yus yuav tau mus rau ib qho chaw tshiab. Tiamsis yus kuj txhawj thiab. Yus yuav npaj txhij tawm tsev li cas?

•  Tshuaj saib yog vim li cas koj ho xav tawm tsev?

•  Xam koj tej nuj nqes

•  Koj tej npoj xav li cas?

 Tus yuav xav li cas los muaj lawv thiaj tawm tsev mus nyob lawv. Tiamsis cov hluas ib txhia tawm tsev vim xav nyob ywj siab xwb. Ib tug tub hluas hu uas Maliyaum (Mario) hais tias: “Kuv tawm tsev mus nyob ib leeg kom thiaj tsis muaj leejtwg txib kuv ua haujlwm hauv tsev.”

 Qhov tseeb tiag, thaum yus tawm mus nyob yus ib leeg tsis muaj kev ywj pheej li yus xav. Ib tug ntxhais hu ua Oo-nya (Onya) uas muaj 18 xyoo hais tias: “Yog koj tawm tsev mus nyob koj ib leeg koj yuav tau tu koj lub tsev, ua zaub ua mov rau koj tus kheej, thiab them koj tej nuj nqes. Koj niam koj txiv tsis nyob ntawd pab koj lawm. Koj yuav tau lis koj xwb!”

 Ua cas ho tseem ceeb: Yog koj xav tawm tsev kom tau nyob ywj siab xwb ces tej zaum koj tsis tau paub tab txaus mus nyob koj ib leeg. Tshuaj seb yog vim li cas koj thiaj xav tawm tsev.

 Yexus hais tias: “Nej cov muaj leejtwg uas xav ua lub chaw tsom faj es yuav tsis xub zaum xam txog tus nqe ua ntej tias muaj txaus ua kom tiav los tsis muaj?” (Luka 14:28) Thaum koj npaj tawm tsev koj yuav “xam txog tus nqe ua ntej” li cas? Xav txog qhov no:

  KOJ PUAS TXAWJ TXUAG NYIAJ?

 Phau Vajlugkub hais tias: “Nyiaj txiag tiv thaiv” koj.​—Laj Lim Tswvyim 7:12.

•  Koj puas paub khaws nyiaj?

•  Koj puas siv nyiaj loj?

•  Koj puas kheev qev luag nyiaj?

 Yog yus tsis txawj txuag nyiaj lossis pheej mus txais luag xwb, thaum yus tawm tsev mus nyob ib leeg, tsis yog yus yuav nyob kaj siab lug tiamsis yuav nyob nyuaj siab xwb.

 Ib tug ntxhais hu ua Daniyias (Danielle) hais tias: “Kuv tus nus tawm tsev thaum nws muaj 19 xyoos. Nws mus nyob tsis tau muaj ib xyoos nws twb muab tej nyiaj siv tas lawm, nws lub tsheb los kuj poob lawm thiab. Tsis muaj leejtwg kam txais nyiaj rau nws, thaum kawg nws thiaj taij rov los nrog peb nyob.”

 Xyaum ua li no: Nug koj niam koj txiv seb ib hlis twg nkawd them nuj nqes npaum li cas, nkawd tseg nyiaj li cas thiaj txaus them.

 Ua cas ho tseem tseeb: Yog koj xyaum txuag nyiaj thaum koj tseem nrog niam txiv nyob, koj yuav txhawm tau nyiaj los siv thaum koj mus nyob koj.

  KOJ PUAS PAUB KOJ TES HAUJLWM?

 Phau Vajlugkub hais tias: “Nyias yuav tsum ris nyias lub nra.”​—Kalatia 6:5.

•  Koj puas yog neeg siab hnyav?

•  Koj puas tos niam txiv hais koj mam pab tu tsev?

•  Puas yog koj los tsev lig txhua hmo?

 Yog koj coj li ntawd ces yuav nyuaj heev rau koj thaum koj mus nyob ib leeg.

 Ib tug ntxhais hu ua Ntsexika (Jessica) hais tias: “Thaum koj nyob koj ib leeg muaj tej yam uas koj tsis xav ua los yuav tau ua. Tsis muaj leejtwg los hais koj lawm. Yog li ntawd, koj yuav tsum nqes tes saib xyuas tej haujlwm ntawd tsis tseg.”

 Xyaum ua li no: Siv ib lub hlis xyaum ua haujlwm hauv vaj hauv tsev. Tu vaj tu tsev koj ib leeg, ntxhua khaub ncaws, mus yuav zaub mov los tso hauv tsev, ua hmo noj hauv tsev txhua hnub, thaum noj tas muab koj tej tais diav ntxuav cia. Yog ua li ntawd koj thiaj paub tias thaum koj nyob ib leeg yuav zoo li cas.

 Ua cas ho tseem ceeb: Yog koj paub tswj koj tus kheej ces yuav pab tau koj thaum koj tawm tsev mus nyob ib leeg.

  KOJ TSWJ PUAS TAU KOJ LUB SIAB?

 Phau Vajlugkub hais tias: “Nej cia li muab tej no tso tseg huvsi, yog kev chim kev npau kev xav phem, xyav luag moo.”​—Khaulauxi 3:8.

•  Puas nyuaj rau koj nrog lwm tus sib raug zoo?

•  Koj puas yog ib tug neeg siab luv?

•  Koj puas xav kom luag ua ywj koj siab xwb?

 Yog koj coj li ntawd, yuav tsis yoojyim rau koj nrog lwm tus nyob ua ib tse. Thaum koj yuav txij nkawm los yeej nyuaj thiab.

 Ib tug ntxhais hu ua Helena hais tias: “Thaum kuv nrog lwm tus koom tsev kuv mam pom tias muaj tej yam uas kuv yuav tsum hloov. Thaum kuv ntxhov siab tuaj, kuv kheev ua nyuaj heev rau lwm tus. Tiamsis tsis zoo rau yus kom cia ua siab ntev rau yus xwb. Kuv thiaj nrhiav lwm txojke los pab thaum kuv ntxhov siab.”

 Xyaum ua li no: Ua tib zoo hais lus koj thiaj nrog koj niam koj txiv thiab tej nug muag sib haum. Yog koj nrog koj tsev neeg sib haum tamsim no ces lwm hnub koj yuav nrog cov sab nraud sib haum thiab.

 Ua cas ho tseem ceeb: Qhov uas koj tawm tsev mus nyob ib leeg, tsis yog koj nrhiav kev nyob ywj siab. Yog koj xav tawm tsev koj yuav tsum npaj txhij ua ntej. Mus nrog cov uas twb tawm tsev lawd tham. Nug seb yav tas los lawv ho npaj li cas ua ntej lawv tawm tsev, lawv ntsib tej yam zoo li cas, thiab puas muaj tej yam uas lawv khuvxim txog. Tsis hais tawm tsev los yog lwm yam haujlwm tseem ceeb, zoo rau koj nrhiav tswvyim li no.