“Txhob txhawj txog tag kis, rau qhov tag kis tseem yuav muaj lwm yam kev nyuaj siab. Hnub no twb muaj kev txhawj txaus lawm.”​—Mathais 6:34, phau Vajtswv Txoj Lus Rau Cov Nyob Lub Qab Ntuj Tshiab.

 “Nej tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm. Kev nyuaj siab hnub twg yeej muaj txaus rau hnub ntawd, tsis tas yuav mus nrhiav kev nyuaj siab los ntxiv.”​—Mathais 6:34, phau Txoj Moo Zoo Uas Yog Vajtswv Txojlus.

 Yexus hais li ntawd, kom cov uas mloog nws tsis txhob ua ntsuas txhawj dhau txog tej teeb meem yav tom hauv ntej. Tiam sis lawv yuav zoo siab dua yog lawv tu lawv tej teeb meem ib hnub rau ib hnub xwb.

 Yexus tsis yog hais tias peb tsis tas yuav xav txog tag kis los sis npaj rau yav tom hauv ntej. (Pajlug 21:5) Tiam sis nws pab kom peb tsis txhob muab txhawj dhau txog tej uas yuav tshwm sim rau tag kis. Yog peb txhawj txog tej ntawd, peb yuav tsis muaj kev zoo siab thiab yuav tsis tau hau ntsoov rau tej uas peb yuav ua. Txawm peb txhawj los peb yeej daws tsis tau, feem ntau uas peb txhawj txog yeej tsis muaj tshwm sim thiab txawm muaj tshwm sim los yeej tsis phem npaum li peb xav.

 Yexus cov lus no yog ib feem hauv nws zaj lus qhuab qhia saum roob, uas nyob hauv Mathais tshooj 5-7. Nyob hauv Yexus zaj lus qhia, nws piav tias tej kev txhawj xeeb yeej pab tsis tau kom peb lub neej zoo ntxiv los sis txuas tau peb txoj sia kom ntev tuaj. (Mathais 6:27) Yexus hais ntxiv tias yog peb muab Vajtswv tso ua ntej hauv peb lub neej ces peb yuav tsis tas txhawj txhawj txog tag kis. Yog Vajtswv twb saib xyuas tej xyoob tej ntoo thiab tej tsiaj tej txhu, ces nws yeej yuav saib xyuas cov uas teev tiam nws.​—Mathais 6:25, 26, 28-33.