Nyob hauv phau Vajlugkub “ntuj ceeb tsheej” hais txog 3 yam no: (1) lub ntuj uas peb qhov muag ntsia ntsoov saud, (2) qhov chaw uas Vajtswv thiab cov tub txib saum ntuj nyob; thiab (3) piv txog lub meej mom uas siab kawg nkaus. Thaum koj nyeem txog ib zag twg zaj ntawd mam qhia tias “ntuj ceeb tsheej” hais txog qhov twg. a

1.   Lub ntuj uas peb qhov muag ntsia ntsoov saud. Yog txheej huab saum nruab ntug uas muaj noog ya, muaj huab muaj cua, muaj nag muaj daus, thiab muaj xob laim. (Phau Ntawv Nkauj 78:26; Pajlug 30:19; Yaxayas 55:10; Lukas 17:24) Lub ntuj uas peb qhov muag ntsia ntsoov saud kuj yog tag nrho saum nruab ntug uas muaj “lub hnub lossis lub hlis thiab tej hnub qub” huv tib si.​—2 Kevcai 4:19; Chivkeeb 1:1.

2.   Qhov chaw uas Vajtswv thiab cov tub txib saum ntuj nyob. Qhov chaw no nyob siab dua lub ntuj thiab saum nruab ntug lawm sab saud lawm thiab. (1 Vajntxwv 8:27; Yauhas 6:38) Qhov chaw no yog qhov chaw uas Vajtswv Yehauvas nyob. Cov tub txib uas muaj lub cev plig ib yam li nws kuj nyob saud thiab. (Yauhas 4:24; Mathais 24:36) Nyob hauv phau Vajlugkub qee zaus “qaum ntuj” los sis “ntuj ceeb tsheej” yog hais txog cov tub txib saum ntuj uas npuab siab rau Vajtswv uas yog cov “dawb huv tuaj txoos ua ke.”​—Phau Ntawv Nkauj 89:5-7.

    Tsis tas li ntawd xwb, hauv phau Vajlugkub “ntuj ceeb tsheej” kuj yog hais txog Yehauvas “qhov chaw nyob” thiab. (1 Vajntxwv 8:43, 49; Henplais 9:24; Tshwmsim 13:6) Xws li, phau Vajlugkub twb qhia lawm tias Xatas thiab cov dab yuav raug muab pov saum ntuj los rau hauv ntiaj teb. Thiab tsis pub lawv rov mus nyob saum ntuj lawm txawm lawv tseem muaj lub cev plig.​—Tshwmsim 12:7-9, 12.

3.   Piv txog lub meej mom uas siab kawg nkaus. Phau Vajlugkub muab “ntuj ceeb tsheej” piv rau lub meem mom uas siab kawg nkaus. Lub meem mom ntawd yog hais txog cov hwj chim zoo li nram no:

   •   Vajtswv Yehauvas yog tus loj dua ntais.​—2 Xwmtxheej Vajntxwv 32:20; Lukas 15:21.

   •   Vajtswv lub Nceeg Vaj yog lub tseem fwv uas yuav los hloov tib neeg tej nom tswv. Phau Vajlugkub muab lub Nceeg Vaj ntawd hu ua “lub ntuj tshiab.”​—Yaxayas 65:17; 66:22; 2 Petus 3:13. b

   •   Cov Khixatia uas muaj kev cia siab yuav mus saum ntuj.​—Efexus 2:6.

   •   Tib neeg tej tseem fwv uas kav laj mej pej xeem hauv ntiaj teb no.​—Yaxayas 14:12-14; Daniyees 4:20-22; 2 Petus 3:7.

   •   Cov tub txib phem uas kav lub qab ntuj tam sim no.​—Efexus 6:12; 1 Yauhas 5:19.

Ntuj ceeb tsheej zoo li cas?

 Saum ntuj ceeb tsheej muaj ntau yam hauj lwm ua. Thiab yog qhov chaw uas muaj tsheej plhom tus tub txib saum ntuj ‘uas ua raws li [Yehauvas] tej lus qhuab qhia’ nyob.​—Phau Ntawv Nkauj 103:20, New World Translation of the Holy Scriptures; 21; Daniyees 7:10.

 Phau Vajlugkub hais tias ntuj ceeb tsheej yog ib qho chaw ci ntsa iab. (1 Timautes 6:15, 16) Hauv Exekees zaj yog toog, nws pom ntuj ceeb tsheej muaj Vajtswv “lub hwj chim” ci ntsa iab. Hos Daniyees pom ntuj ceeb tsheej “muaj nplaim taws cig lam lug puagncig.” (Exekees 1:26-28; Daniyees 7:9, 10) Ntuj ceeb tsheej yog ib qho chaw uas dawb huv, huv siab si, thiab zoo nkauj kawg li.​—Phau Ntawv Nkauj 96:6; Yaxayas 63:15; Tshwsim 4:2, 3.

 Phau Vajlugkub piav tias ntuj ceeb tsheej loj heev thiab dav kawg li. (Exekees 43:2, 3) Tib neeg yeej tsis muaj cuab kav paub txhij paub txhua txog qhov ntawd, rau qhov nyuaj rau peb to taub txog.