Phau Vajlugkub hais tias Vajtswv yog tus pab tau peb tshaj plaws, rau qhov nws yog “tus uas txhawb cov neeg uas poob siab lub zog, nws txhawb peb lub zog.”​—2 Kauleethaus 7:6.

•   Nws pub dag zog. Vajtswv yuav tsis tshem peb tej teeb meem huvsi mus. Tiamsis nws yuav pub “lub zog” raws li peb thov xwv peb thiaj tiv taus peb tej kev nyuaj siab. (Filipis 4:13) Peb ruaj siab tau tias Vajtswv yeej mloog ntsoov peb tej lus thov, phau Vajlugkub hais tias: “Tus TSWV nyob ze cov neeg uas tas kev cia siab, nws cawm cov neeg uas tsis muaj chaw vamkhom.” (Phau Ntawv Nkauj 34:18) Txawm peb tsis paub yuav piav li cas rau Vajtswv los, nws yeej paub peb tej kev nyuaj siab huv tibsi.​—Loos 8:26, 27.

•   Nws muab cov qauv zoo rau peb. Ib tug sau Vajlugkub tau thov Vajtswv hais tias: “Tus TSWV, kuv txomnyem ntsuav thiab tws kev lawm, kuv thiaj tsa ncauj thov koj pab.” Thaum tus sau nkauj no muaj kev nyuaj siab, nws xav ntsoov txog Vajtswv txojkev zam txim, qhov no pab tau nws nyiaj dhau nws tej kev nyuaj siab. Nws thiaj thov Vajtswv tias: “Yog koj cim peb tej kev txhaum cia lawm, leejtwg thiaj khiav dim tsis raug txim? Tiamsis koj zam txim rau peb, peb thiaj hwm koj thiab mloog koj lus.”​—Phau Ntawv Nkauj 130:1, 3, 4.

•   Nws pub peb muaj kev vam kev cia siab. Vajtswv tsis yog pub kev vam kev cia siab los nplig peb niaj hnub nimno xwb. Vajtswv tseem cog lus tias yav tom hauv ntej nws yuav tshem tag nrho tej teeb meem uas ua rau peb nyuaj siab huvsi mus. Thaum cov lus no muaj tiav lawd, peb “yuav tsis nco txog tej [kev nyuaj siab] uas twb muaj tas los lawm.”​—Yaxayas 65:17.

 Cov lus txhab ntxiv: Txawm Yehauvas Cov Timkhawv lees yuav Vajtswv tej lus qhia los, thaum lawv muaj mob lawv kuj mus cuag tus kws kho mob thiab. Xws li, yog muaj tus mob nyuaj siab. (Malakaus 2:17) Yehauvas Cov Timkhawv tsis txhawb ib txojkev kho mob twg, tiamsis nyias yuav tsum txiav txim siab rau nyias tus kheej seb yuav xaiv txoj twg.