Phau Vajlugkub cog lus tias: “Tus uas ua raws li Vajtswv lub siab nyiam, tus ntawd yuav nyob mus ibtxhis li.” (1 Yauhas 2:17) Yog li Vajtswv xav kom koj ua li cas?

•   Kawm txog Vajtswv thiab nws tus tub Yexus. Thaum Yexus thov Vajtswv, nws hais tias: “Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los.” (Yauhas 17:3) Ua li peb yuav “paub” Vajtswv thiab Yexus tau li cas? Yuav kom paub Vajtswv thiab Yexus peb yuav tau kawm phau Vajlugkub thiab muab coj los siv hauv peb lub neej. a Thaum kawm phau Vajlugkub peb yuav paub tias Vajtswv Yehauvas xav li cas, nws yog tus Tswv Tsim thiab tus pub tau txojsia. (Tes Haujlwm 17:24, 25) Phau Vajlugkub qhia rau peb tias Vajtswv tus tub Yexus tau qhia txog “txojsia ibtxhis rau neeg.”​—Yauhas 6:67-69.

•   Muaj kev ntseeg rau Yexus tus nqe txhiv. Yexus los hauv ntiajteb “nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” (Mathais 20:28) Yexus tus nqe txhiv pab noob neej muaj txojsia ib txhis nyob hauv lub Vaj Kaj Siab ntawm lub ntiajteb no. b (Phau Ntawv Nkauj 37:29) Yexus hais tias: “Vajtswv hlub neeg ntiajteb kawg li, nws thiaj txib nws tib Leej Tub los rau hauv ntiajteb. Tus uas ntseeg Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis.” (Yauhas 3:16) Ua li puas yog ntseeg Yexus ntawm lub ncauj xwb? Tsis yog, peb yuav tsum “ntseeg” es coj li nws qhia thiab ua raws li nws Leej Txiv lub siab nyiam.​—Mathais 7:21; Yakaunpaus 2:17.

•   Nrog Vajtswv sib raug zoo. Vajtswv xav kom peb nrog nws sib raug zoo thiab ua nws tus phoojywg. (Yakaunpaus 2:23; 4:8) Vajtswv muaj txojsia nyob mus ib txhis. Nws tsis txawj tuag, yog li ntawd nws thiaj xav kom nws cov phoojywg muaj txojsia ib txhis. Phau Vajlugkub qhia tias Vajtswv xav kom cov los cuag nws: “Muaj kev vammeej mus ibtxhis.”​—Phau Ntawv Nkauj 22:26.

 Ib txhia ntseeg tias: Yog nyob mus ib txhis ntshe yuav dhuav heev.

 Qhov tseeb: Vajtswv pub txojsia ib txhis tsis kawg rau peb vim nws hlub thiab xav kom peb nyob kaj siab lug. (Yakaunpaus 1:17; 1 Yauhas 4:8) Vajtswv paub tias yog peb ua tes haujlwm uas muaj nuj nqe, peb yuav muaj kev kaj siab. (Tej Lus Qhia 3:12) Vajtswv cog lus tias tus uas tau txojsia ib txhis hauv lub ntiajteb yuav tau tes haujlwm uas pab tau nws thiab cov nws hlub nyob kaj siab lug tso siab plhuav.​—Yaxayas 65:22, 23.

 Tsis tas li ntawd, tus uas tau txojsia ib txhis tsis kawg yuav tau kawm ntau yam tshiab txog Vajtswv thiab tej uas Vajtswv tsim. Vajtswv yeej tsim kom noob neej xav nyob mus ib txhis thiab xav paub txog nws. Txawm noob neej tsis “totaub txhua yam uas nws tau ua.” (Tej Lus Qhia 3:10, 11) Yog li ntawd, qhov uas muaj txojsia nyob mus ib txhis tsis kawg yeej tsis dhuav li, rau qhov muaj ntau yam tshiab kawm tsis tag.