Phau Vajlugkub tsis hais kom peb thov cov leej ntshiab (saints), tiamsis phau Vajlugkub qhia tias peb yuav tsum thov Vajtswv tib leeg xwb, thiab thov los ntawm Yexus lub npe. Thaum Yexus nyob hauv ntiajteb nws cob qhia nws cov thwjtim tias: “Nej yuav teev Ntuj zoo li no: ‘Peb Txiv nyob saum ntuj, koj lub Npe ntshiab nto moo lug.’” (Mathais 6:9, Ntawv Ntshiab Txhais Ua Lus Hmoob Zaum Ob Luam Tawm Xyoo 2002) Yexus tsis txeev hais kom nws cov thwjtim thov cov leej ntshiab, cov tubtxib saum ntuj lossis thov dua lwm tus uas tsis yog Vajtswv.

 Tsis tas li ntawd, Yexus kuj hais rau lawv tias: “Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis los ntawm kuv.” (Yauhas 14:6, NN) Yexus tib leeg xwb thiaj yog tus nyob nruab nrab Vajtswv thiab tibneeg, nws niaj hnub thov Vajtswv pab peb.​—Henplais 7:25.

Peb thov puas tau Vajtswv thiab cov leej ntshiab?

 Hauv 10 Txoj Kevcai uas Vajtswv muab rau haivneeg Yixalayees, Vajtswv tau sam hwm tias: “Kuv yog HUAB TAIS thiab yog koj tus Tswv Ntuj, kuv yog ib tug Tswv Ntuj muaj khib.” (Khiav Dim 20:5, NN) Vajtswv yog tus “muaj khib” qhov no txhais li cas tiag? Qhov no txhais tias Vajtswv xav kom peb teev tiam lossis npuab siab rau nws tib leeg xwb, yog li ntawd thaum thov Vajtswv peb yuav tsum thov Vajtswv tib leeg xwb.​—Yaxayas 48:11.

 Yog peb thov lwm tus xws li, cov leej ntshiab thiab cov tubtxib saum ntuj uas dawb huv ces peb yuav ua rau Vajtswv tu siab. Muaj ib zaug thaum tus tubtxib Yauhas tabtom yuav pe ib tug tubtxib saum ntuj, tus tubtxib ntawd txwv Yauhas thiab hais tias: “Koj tsis txhob ua li ntawd. Kuv yog ib tug tub txib zoo li koj, thiab zoo li koj cov kwv tij ua Yes Xus tim khawv xwb. Koj [cia li] pe Tswv Ntuj.”​—Tshwmsim 19:10, NN.