Thaum muaj ib siab ob qeg ib txhia muab lawv cov tuag hlawv. Phau Vajlugkub tsis qhia tsi ntsees rau qhov no.

 Muaj zaum puav phau Vajlugkub qhia tias Vajtswv cov tub qhe tau muab cov tuag zais li cas. Thaum Aplahas tus pojniam Xala tuag, Aplahas yeej mob siab nrhiav av los log nws tus pojniam.​—Chiv Keeb 23:2-20; 49:29-32.

 Phau Vajlugkub kuj qhia txog cov ncaj ncees uas tau muab lawv cov tuag hlawv thiab. Muaj ib zaj qhia tias Vajntxwv Xa-u thiab nws 3 tug tub tuag hauv tshav rog. Yeeb ncuab thiaj muab lawv lub cev tuag coj mus dai saum ntsa loog. Thaum cov tub rog Yixayee uas muab siab npuab Yehauvas hnov li no, lawv txawm mus muab Xa-u thiab nws 3 tug tub lub cev daws los. Lawv mam li muab cov cev hlawv pov tseg. Tom qab ntawd lawv coj cov pob txha mus log. (1 Xamuyee 31:8-13) Phau Vajlugkub qhia tias ua li no yog ib qho uas raug cai lawm.​—2 Xamuyee 2:4-6.

 Xav yuam kev: Ib txhia xav tias cov tuag uas raug hlawv yuav sawv hauv qhov tuag rov los tsis tau lawm.

 Qhov tseeb: Vajtswv yeej tsa tau txhua leej txhua tus tibsi, tsis hais tus tuag uas muab log, muab hlawv, tuag rau hiavtxwv, lossis raug tsiaj tom noj. (Qhia Tshwm 20:13) Vajtswv yog tus loj dua ntais, nws muaj hwjchim tsim ib lub cev tshiab rau cov uas nws tsa sawv rov los.​—1 Khaulee 15:35, 38.