Peb yeej ib txwm ntseeg raws li phau Vajlugkub qhia. Yog thaum twg peb to taub tej yam tshiab hauv phau Vajlugkub ces peb yeej yuav kho tej uas peb ntseeg kom raws li phau Vajlugkub qhia. a

 Peb ua raws li Pajlug 4:18 uas hais tias, ‘Txoj kev uas cov neeg ncaj ncees taug mas zoo ib yam li thaum lub hnub tab tom tawm tuaj pom kev txoog thiab ci zuj zus mus txog rau thaum tav su.’ Zoo tib yam li lub hnub ci zuj zus tuaj kom peb pom tej xyoob tej ntoo, Vajtswv kuj pab kom peb to taub nws Txoj Lus zoo zuj zus thiab. (1 Petus 1:10-12) Phau Vajlugkub qhia tias nyob rau ‘lub sij hawm kawg’ uas peb nyob no, peb yim huab yuav to taub Vajtswv Txoj Lus zoo zuj zus ntxiv tuaj.​—Daniyees 12:4.

 Thaum peb hloov los sis kho tej yam uas peb ntseeg, qhov no tsis ua rau peb poob siab. Cov teev tiam Vajtswv thaum ub los yeej muaj qee yam lawv to taub tsis meej ces lawv yuav tau kho lawv txoj kev xav.

•   Mauxes xav tias nws yog tus yuav cawm haiv neeg Ixayees dim, tiam sis Vajtswv mam li txib nws tom qab 40 xyoo.​—Tes Haujlwm 7:23-25, 30, 35.

•   Cov tub txib tsis to taub cov lus faj lem uas qhia txog tus Mexiyas txoj kev tuag thiab qhov uas nws ciaj sawv rov los.​—Yaxayas 53:8-12; Mathais 16:21-23.

•   Cov Khixatias thaum ub ib txhia to taub yuam kev txog ‘Yehauvas hnub.’​—2 Thexalaunikes 2:​1, 2.

 Tom qab no Vajtswv kuj pab kom lawv to taub, thiab peb cia siab tias Vajtswv yuav pab kom peb to taub zuj zus mus ntxiv.​—Yakaunpaus 1:5.