Baibel ai nega momo Iesu idia gwauraia “Dirava ena Natuna.” (Ioane 1:49) Inai hereva “Dirava ena Natuna” ese ia hahedinaraia Dirava be Havaraia Tauna, eiava mauri ibounai ena Badina, Iesu ena mauri danu. (Salamo 36:9; Apokalupo 4:11) Baibel ese ia hahedinaraia lasi Dirava be natu ta ena tamana korikori ai ia lao, hegeregere iseda tanobada tamadia be natu ta ena tamana ai ia lao bamona.

 Baibel ese aneru momo ia gwauraia “ Dirava ena natudia.” (Iobu 1:6 futnout) Bona danu tau ginigunana, Adamu, ia gwauraia “Dirava ena natuna.” (Luka 3:38) To, Baibel ese ia hahedinaraia Iesu be Dirava sibona ese ia havaraia tauna ginigunana dainai, Iesu sibona be Dirava ena Natuna ginigunana.

•  Iesu be tanobada ai ia do vara lasi neganai, guna guba dekenai ia noho, a?

•  Iesu be tanobada ai ia do mai lasi neganai, dahaka ia karaia?

 Oibe. Iesu be tanobada ai taunimanima ta bamona ia do vara lasi neganai, ia be guba dekenai ia noho lauma tauna ta. Iesu sibona ia gwau: “Guba amo lau diho mai.”​—Ioane 6:38; 8:23.

 Dirava be gau ibounai ia do havaraia lasi neganai, Iesu ia havaraia guna. Baibel ese Iesu be inai bamona ia herevalaia:

•   “Ia be . . . gau ibounai amo ia be ginigunana.”​—Kolose 1:15.

•   Ia be “Dirava ese ia havaraia tauna ginigunana.”​—Apokalupo 3:14.

 Iesu ese inai peroveta herevana ia hagugurua “ ia be idaunegai amo.”​—Mika 5:2; Mataio 2:4-6.

 Ia be guba ai dagi badana ia abia. Iesu ia guriguri neganai ena dagi ia gwauraia: “Tamana e, . . . lau dekenai hairai oi henia . . . guna tanobada ia do vara lasi neganai oi badinai lau abia hairaina hegeregerena.”​—Ioane 17:5.

 Ena Tamana ia durua gau ibounai havaraia totona. Iesu be Dirava ida ia gaukara, ia be “gaukara karaia namonamo tauna.” (Aonega Herevadia 8:30) Baibel ese Iesu be inai bamona ia herevalaia: Ia amo Dirava ese gau ibounai guba ai bona tanobada ai ia havaraia.”​—Kolose 1:16.

 Dirava be Iesu ida ia gaukara hebou gau ibounai idia karaia totona. Ia havaraia gaudia haida be guba anerudia, bona danu iseda tanobada. (Apokalupo 5:11) Dirava bona Iesu idia gaukara hebou karana be hegeregere, architect be ruma haginia tauna ida ia gaukara hebou bamona. Architect be disain ia karaia; ruma haginia tauna be unai disain hegeregerena ruma ia haginia.

 Ia be Hereva. Iesu be tanobada ai ia do mai lasi neganai, Baibel ia gwau, Iesu be “Hereva.” (Ioane 1:1) Unai ena anina be, Dirava ese iena Natuna ia gaukaralaia ena hadibaia hereva bona hakaua herevadia be aneru ma haida dekenai ia gwauraia totona.

 Danu, Iesu ese tanobada taudia dekenai Dirava ena hereva ia gwauraia. Dirava be Iesu eiava Hereva amo Eden umana ai Adamu bona Eva dekenai iena hakaua herevadia ia henia. (Genese 2:16, 17) Israela taudia be tano gagaena ai aneru ta ena gadona idia kamonai bona badinaia, reana unai be Iesu ena gadona.​—Esodo 23:20-23. a