Oibe! Baibel be “lalometau taudia edia lalona ia hagoadaia Diravana” amo. (2 Korinto 7:6) Ena be Baibel be helt bukana lasi, to sibona hamasea lalohadaina idia abia taudia momo ia durua. Ena sisiba ese oi ia durua diba danu.

•  Baibel ena sisiba be dahaka?

•  Idia ura mase taudia edia sivarai be Baibel ese ia gwauraia, a?

•  Edena Baibel siridia ese oi ia durua diba sibona hamasea lalohadaina oi dadaraia totona?

•  Bema turana ta ia gwau, “lau ura mase” be edena bamona?

•  Bema guna sibona lau ura hamasea be edena bamona?

• ● Emu hemami gwauraia hedinarai.

   Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”​—Aonega Herevadia 17:17.

   Anina: Ita lalohekwarahi neganai, ma haida edia heduru ita abia be namo.

   Bema emu hemami oi gwauraia hedinarai lasi, oi be sibona oi hametaua noho. To bema emu hemami oi gwauraia hedinarai, emu hemami do ia namo bona lalohadai maorona do oi abia.

   Inai tohoa: Hari dina ta oi hereva henia, reana emu famili ta o tura ta. a Danu, pepa ta ai emu hemami oi torea.

• ● Doketa edia heduru abia.

   Baibel ia gwau: “Gorere lasi taudia be doketa idia tahua lasi, to gorere taudia sibona ese idia tahua.”​—Mataio 9:12.

   Anina: Ita gorere neganai, doketa edia heduru ita tahua be namo.

   Sibona hamasea lalohadaina be kwara gorere ena saini ta. Ia be gorere ma haida bamona, unai dainai unai lalohadai ia abia tauna ia hemarai lasi be namo. Kwara gorere be mai ena muramura.

   Inai tohoa: Doketa amo heduru tahua haraga.

• ● Dirava be oi ia laloa bada.

   Baibel ia gwau: “Manu maragidia 5 be koini maragidia rua dekenai idia hoihoilaia, ani? To idia ta be Dirava ese ia laloaboio lasi. . . . Umui gari lasi, umui ese manu maragidia ibounai umui hereaia.”​—Luka 12:6, 7.

   Anina: Dirava dekenai oi be dava bada gauna ta bamona.

   Reana oi laloa ta be oi ia laloa lasi, to Dirava be oi mamia noho hisihisina ia itaia. Ia be oi ia laloa bada​—ena be oi ura mase. Salamo 22:24 ia gwau: “Ia ese hisihisi ia davaria tauna ia inai henia lasi bona ia dadaraia lasi.” Dirava ia ura oi mauri, badina oi ia lalokau henia.

   Inai tohoa: Baibel ai, Dirava ena lalokau idia hamomokania siri oi duahia. Hegeregere, Baibel stadi bukana, Iehova Kahirakahira Oi Lao, ena karoa 24 itaia.

• ● Dirava guriguri henia.

   Baibel ia gwau: “Emui lalohekwarahi ibounai be [Dirava] dekenai umui negea lao.”​—1 Petero 5:7.

   Anina: Dirava be oi ia boiria ia dekenai emu lalohekwarahi oi gwauraia hedinarai totona.

   Dirava be oi dekenai lalomaino bona goada do ia henia oi haheauka totona. (Filipi 4:6, 7, 13) Unai dala amo ia dekenai heduru totona idia boiboi taudia ia durua.​—Salamo 55:22.

   Inai tohoa: Hari dina Dirava oi guriguri henia. Iena ladana, Iehova, oi gaukaralaia bona ia dekenai emu hemami oi gwauraia. (Salamo 83:18) Oi noia oi do ia durua oi haheauka totona.

• ● Baibel ena helaro vaira nega totona oi laloa dobu.

   Baibel ia gwau: “Ita abia helaro be iseda mauri ena dogo bamona, ia be ia momokani bona ia goada.”​—Heberu 6:19.

   Anina: Emu hemami be nega haida do ia namo bona nega haida do ia dika, bouti be hurehure dekenai ia daekau diho bamona, to Baibel ena helaro ese oi do ia durua.

   Inai helaro be nihi ta sibona lasi, badina Dirava ia gwauhamata ita idia hahisia gaudia ibounai do ia haorea.​—Apokalupo 21:4.

   Inai tohoa: Baibel ena helaro dekenai diba ma haida abia totona, Dirava ena Sivarai Namona! buklet ena leseni 5 duahia.

• ● Oi moalelaia gauna ta karaia.

   Baibel ia gwau: “Ia moale kudouna be muramura namona.”​—Aonega Herevadia 17:22.

   Anina: Ita ia hamoalea gauna ta ita karaia neganai, iseda hemami do ia namo.

   Inai tohoa: Oi moalelaia gauna ta karaia. Hegeregere, miusiki namodia oi kamonai, oi ia hagoadaia sivaraina oi duahia, o oi ura henia gauna ta karaia. Danu, do oi moale bada bema ma haida oi durua, herevana ia be kara maragina sibona.​—Kara 20:35.

• ● Emu helt oi naria.

   Baibel ia gwau: “Tauanina treinia karana be mai ena namo.”​—1 Timoteo 4:8.

   Anina: Ita eksasais, mahuta bona aniani namonamo neganai, do ita gorere lasi.

   Inai tohoa: Oi raka loaloa, reana miniti 15 lalonai.

• ● Laloatao, iseda hemami bona gau ma haida idia idau diba.

   Baibel ia gwau: “Kerukeru umui dekenai dahaka do ia vara be umui diba lasi.”​—Iamesi 4:14.

   Anina: Hekwakwanai badana ta​—reana oi laloa hamaoromaoroa dalana be lasi​—be do ia ore.

   Herevana hari emu hekwakwanai be bada, to kerukeru unai ia idau diba. Unai dainai hekwakwanai haheaukalaia dalana sibona oi laloa. (2 Korinto 4:8) Nega ia hanaia lalonai, emu hekwakwanai do ia ore, to bema sibona oi hamasea, unai oi haidaua diba lasi.

   Inai tohoa: Baibel ese ia sivarailaia taudia haida be idia lalohisihisi bada dainai idia ura mase, edia mauri ai ia vara senisi namodia oi duahia​—idia laloa lasi dalanai unai senisi idia vara. Haheitalai haida mani ita laloa.

 Oibe. Baibel ese ia sivarailaia taudia haida idia gwau, “Lau ura lau mase.” Dirava ese ia gwau henidia lasi, to ia durudia. Oi do ia durua danu.

Elia

•  ● Ia be daika? Elia be ia gari lasi peroveta tauna ta. To nega haida ia lalomanoka. Iamesi 5:17 ia gwau: “Elia be mai ena hemami ita hegeregerena.”

•  ● Dahaka dainai ia ura mase? Nega ta, Elia ia mamia ia be sibona, ia gari, bona ia be anina lasi. Unai dainai ia noinoi: “Iehova e, egu mauri oi kokia.”​—1 King Taudia 19:4.

•  ●Dahaka ese ia durua? Elia ese ena hemami be Dirava dekenai ia gwauraia. Dirava ese edena dala ai ia hagoadaia? Dirava ia hahedinaraia ia be Elia ia laloa bada bona ia dekenai Iena siahu ia hahedinaraia. Danu, Elia dekenai gaukara ia henia bona Elia ia durua.

•  ▸ Elia ena sivarai duahia: 1 King Taudia 19:2-18.

Iobu

•  ● Ia be daika? Iobu be taga tauna, mai ena ruma bese, bona Dirava momokanina ia tomadiho henia.

•  ● Dahaka dainai ia ura mase? Iobu dekenai gau dikadia momo idia vara. Iena kohu ibounai ia haboioa. Dika badana ta lalonai iena natudia ibounai idia mase. Gorere badana ta ia abia. Gabeai, ia idia samania koikoi idia gwau ia be unai hekwakwanai edia badina. Iobu ia gwau: “Egu mauri lau ura henia lasi momokani. Lau ura lasi lau mauri noho.”​—Iobu 7:16.

•  ● Dahaka ese ia durua? Iobu ese Dirava ia guriguri henia bona ma haida ia hereva henia. (Iobu 10:1-3) Iena turana namona, Elihu, ese ia hagoadaia bona lalohadai maorona ia abia. Mai anina bada gauna be, Iobu ese Dirava ena sisiba bona heduru ia abia dae.

•  ▸ Iobu ena sivarai duahia: Iobu 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Ia be daika? Mose be Israela taudia ia hakaua tauna bona peroveta tauna.

•  ● Dahaka dainai ia ura mase? Mose ena maduna be bada, nega momo idia gwauraia dika, bona ia mamia ena goada ia ore. Unai dainai Dirava dekenai ia gwau: “Mani harihari lau oi hamasea.”​—Numera 11:11, 15.

•  ● Dahaka ese ia durua? Mose ese Dirava dekenai ena hemami ia gwauraia. Bona Dirava ese ia durua ena maduna metauna ia hamaragia totona.

•  ▸ Mose ena sivarai duahia: Numera 11:4-6, 10-17.