Emu turana ta o famili tauna ta ia mase, a? Bema oibe, inai atikol ese oi ia durua diba emu lalohisihisi karana oi haheaukalaia totona.

Inai atikol ai

•  Lau lalohisihisi bada, a?

•  Mase dainai ia vara lalohisihisi haheaukalaia dalana

•  Emu turadia edia hereva

 Taunimanima momo dekenai, mase dainai idia abia hemami idauidau be idia goada bona idia ore haraga diba lasi.

 “Dina ta ta egu tubuna tau lau laloa. Ena be lagani rua gunanai ia mase, to hanaihanai ia lau herevalaia neganai lau tai tai.”​—Olivia.

 “Egu tubuna hahine be hanaihanai lau ia hagoadaia egu tahua gaudia lau hagugurua totona, to ia mase murinai egu tahua gaudia haida lau hagugurua. Lau lalohisihisi bada badina egu tahua gaudia ta ta lau hagugurua neganai, ia noho lau unai ia itaia totona.”​—Alison.

 Mase ia vara dainai oi lalohisihisi noho negana lalonai, hemami idauidau do oi abia. Hegeregere:

 “Egu vavana ia mase neganai, lau hamomokania lasi, bona nega daudau lalonai unai lau laloa. Unai be egu nega ginigunana, lau manada momokani tauna ta ia mase, bona lau mamia toana be trein ta ese lau ia bampaia bamona.”​—Nadine.

 “Egu tubuna tau ia mase neganai, ia dekenai lau badu badina ia be ena helt ia naria namonamo lasi, ena be ia ai hadibaia unai bamona do ia karaia.”​—Carlos.

 “Egu tubuna tau ia mase neganai, famili ibounai huanai lau bona egu kakana kekeni be ai noho lasi. Gabeai, lau mamia lau kerere badina egu tubuna lau bamahuta henia namonamo lasi.”​—Adriana.

 “Emai famili idia manada namonamo headava tau bona hahine ta be motuka aksiden ta lalonai idia mase. Unai murinai, emai famili lalonai ta be ruma ia rakatania neganai, lau gari, badina lau laloa dika idia danu do idia mase.”​—Jared.

 “Lagani toi gunanai egu tubuna hahine ia mase neganai, lau lalohisihisi badina ia do mauri noho lalonai nega bada lau atoa lasi ia lau bamoa totona.”–Julianna.

 Mase ia vara dainai oi hoa, oi badu, kerere oi karaia ena hemami oi abia, oi gari, bona oi lalohisihisi karana ese ia hahedinaraia lasi unai bamona oi mamia be kerere. Bema unai bamona hemami oi abia, namona be oi abia dae gabeai do idia ore idia lao. To, edena dala ai mase dainai ia vara lalohisihisi oi haheaukalaia diba?

 Turana ta oi hereva henia. Baibel ia gwau tura korikori be “hekwakwanai negadia ai” oi ia durua. (Aonega Herevadia 17:17) Ta dekenai emu hemami oi gwauraia karana ese oi ia durua diba heduru maorona oi abia totona.

 “Ta ia mase dainai oi lalohisihisi karana be kerere lasi. Nega haida oi sibona ese oi haheaukalaia diba, to gabeai do oi laloa emu lalohisihisi be ia ore diba lasi. Unai dainai ma ta oi hereva henia karana be mai ena namo.”​—Yvette.

 Emu lalokau tauna oi laloatao. Baibel ia gwau “tau namona ena kudouna ai gau namodia ia idia noho.” (Luka 6:45, Easy-to-Read Version, 1992) Emu memori namodia oi torea diba o foto album ta oi karaia diba.

 “Egu lalona lau hadaia egu turana ia do mase lasi lalonai lau dekenai ia hadibaia gaudia ibounai do lau torea, unai amo iena haheitalai ese lau do ia durua noho. Lau torea gaudia ese lau ia durua iena mase ena lalohisihisi lau haheaukalaia totona.”​—Jeffrey.

 Emu helt oi naria namonamo. Baibel ese ia hahedinaraia tauanina treinia karana be mai ena namo. (1 Timoteo 4:8) Namona be aniani maorodia oi ania, oi eksasais, bona laga-ani namonamo.

 “Oi lalohisihisi neganai do oi laloa maoromaoro lasi, so namona be emu helt oi naria namonamo. Aniani oi dadaraia lasi bona nega korikori ai oi mahuta.”​—Maria.

 Ma haida oi durua. Baibel ia gwau: “Henia kara ena moale be bada, to abia kara ena moale be maragi.”​—Kara 20:35.

 “Oi bamona, edia lalokau taudia idia haboioa taudia totona, gau haida oi karaia. Unai amo do oi diba ma haida danu be idia lalohisihisi noho.”​—Carlos.

 Guriguri lalonai emu hemami oi gwauraia. Baibel ia gwau Iehova Dirava be “Guriguri kamonai Diravana.” (Salamo 65:2) Danu ia gwau, Iehova ese “lalometau taudia ia hagoadaia, Ia ese edia bero ia kumia.”​—Salamo 147:3.

 “Iehova oi noia oi dekenai heduru bona goada ia henia totona. Dina haida be dina ma haida hegeregerena lasi, to Iehova be hanaihanai ia noho hegaegae.”​—Jeanette.

 Lalohadai maorona abia. Laloatao taunimanima ta ta edia lalohisihisi daladia be idauidau. Baibel ia gwau Iakobo “ena lalona idia hagoadaia toho, to ia ura lasi” badina ia laloa ena natuna mero ia mase. (Genese 37:35) Unai dainai oi hoa lasi bema nega daudau lalonai oi lalohisihisi noho.

 “Lau davaria, gau haida lau itaia neganai egu tubuna hahine ena kakana hahine lau laloa lou, ena be ia mase bona lagani 15 idia hanaia vadaeni.”​—Taylor.

 Mani oi laloa bema emu turia ta oi makohia. Ena hisihisi be bada, bona reana do ia namo haraga lasi. To, doketa be oi ia durua bona emu bero ia namo haraga totona do oi karaia gaudia haida ia gwauraia.

 Unai be mase amo emu lalokau tauna ta oi haboioa neganai oi haheaukalaia “hisihisi” hegeregerena. Mase ese ia havaraia lalohisihisi be do ia ore haraga lasi. Unai dainai oi haheauka be namo. Inai atikol ai idia noho heduru herevadia oi laloa, bona oi itaia edena be oi ia durua bada.