Emu adavana be iena hereva, o kara haida amo oi ia habadua, bona unai badu oi haboua sibona. Bena, emu adavana ia mamia gau ta be ia maoro lasi, bona ia henanadai matamaia. Unai kara ese emu badu do ia habadaia. Unai bamona negadia ai, edena dala ai sibona oi biagua, emu badu oi halasia lasi totona?

•  Dahaka oi diba be namo

•  Dahaka oi karaia diba

• Badu biagua lasi karana ese emu helt ia hadikaia diba. Tahua gaukarana ese ia hahedinaraia badu biagua lasi karana amo, high blood pressure, kudou-gorere, lalometau gorere, bona aniani dalana dekenai hekwakwanai ia havaraia. Badu karana be inai ia havaraia danu insomnia, lalohekwarahi bada karana, tauanina ia dika, bona stroke gorere ia havaraia. Badina namodia dainai, Baibel ia gwau: ’Badu lasi . . . , badina unai bamona laloa ese kara dika ia havaraia noho.’​​—Salamo 37:8.

• Badu haboua karana ese dika ia havaraia diba danu. Badu noho karana be gorere ta bamona emu tauanina lalonai ia hadikaia diba. Hegeregere, taunimanima dekenai lalohadai maorona do oi abia lasi. Unai bamona lalohadai dainai emu mauri do ia auka, bona emu headava ia hadikaia diba.

• Emu adavana ena kara namodia oi itaia. Emu adavana amo oi moalelaia bada gaudia toi be emu lista ai oi torea. Hegeregere, gabeai bema emu adavana, tau eiava hahine ese ia karaia gauna ta dainai oi badu neganai, ia amo oi itaia vadaeni kara namodia oi laloa lou. Inai ese oi do ia durua, emu badu oi biagua totona.

  Baibel ena hakaua herevadia: “Tanikiu karana do umui hahedinaraia.”​—Kolose 3:15.

•   Kara dika gwauatao karana dibaia. Gau ginigunana be, emu adavana ena lalohadai dalana oi lalopararalaia toho. Inai ese oi do ia durua hebogahisi oi hahedinaraia totona​​—Baibel ia gwau “umui hebogahisi heheni.” (1 Petero 3:8) Gabeai, sibona oi nanadaia, ‘Egu badu be mai ena badina, unai dainai ia lau gwauatao diba lasi, a?’

  Baibel ena hakaua herevadia: “Dika oi laloaboio . . . be kara namo hereana.”​—Aonega Herevadia 19:11.

•   Hebogahisi bona aonega dalana ai emu hemami oi gwauraia hedinarai. Inai hereva “Lau” gaukaraia. Haheitalai, inai bamona hereva do oi gwauraia lasi, “Lau oi rini henia lasi bona lau oi hadibaia lasi oi be edeseniai oi noho, oi be oi laloa namonamo lasi” to do oi gwau, “Oi mai haraga lasi dainai oi totona lau laloa momo bona lau diba lasi bema oi dekenai gau ta ia vara.” Mai manau ida emu hemami oi gwauraia karana ese oi do ia durua emu badu oi biagua totona.

  Baibel ena hakaua herevadia: “Hanaihanai mai gado namo ida do umui hereva, damena umui atoa bamona.”​—Kolose 4:6.

•   Kamonai mai hemataurai ida. Emu hemami oi gwauraia hedinarai murinai, nega oi henia emu adavana ia hereva totona bona oi kamonai sibona. Emu adavana ia hereva ore murinai, iena herevalaia gaudia oi gwauraia lou bema ia gwauraia gaudia oi lalopararalaia namonamo. Kamonai karana be oi ia durua bada diba emu badu oi biagua totona.

  Baibel ena hakaua herevadia: ‘Kamonai haraga, to hereva haraga lasi.’​—Iamesi 1:19.