Emu natuna ese oi ia hamaoroa sikuli ai ia dekenai idia bully. Dahaka do oi karaia? Do oi gwau unai natuna do idia panisia, a? Emu natuna do oi hadibaia ia heai totona, a? Kara ta oi do karaia lasi neganai, idia vara gaudia haida oi laloa. a

•  Hahisia (Bully) karana dekenai dahaka lau diba be namo?

•  Edena dala ai heduru lau henia diba?

 Bully ena anina be dahaka? Kerere idia havaraia taudia ese mai ura ida ta idia hahisia eiava ena hemami idia ura hadikaia toho. Unai dainai hadikaia hereva eiava dagedage karadia ibounai be bully karana amo ia idau lasi.

 Dahaka dainai bully karana ena anina ita laloparara be namo? Haida idia gwau, bema ta ese ia karaia karana eiava ia be gau maragina sibona, to unai ese ma ta ia hahisia, unai be bully karana. Bema hekwakwanai maragina ita karaia ia bada, natuna do ita durua lasi hekwakwanai hamaoromaoroa dalana ia dibaia totona, hari bona gabeai ia bada neganai danu.

 Baibel ena hakaua hereva: “Do oi badu haraga lasi.”​—Hadibaia Tauna 7:9.

 Ena badina: Idia vara gaudia haida be oi ese oi hamaoromaoroa diba, to emu natuna dekenai nega oi henia danu, unai amo ia sibona ese hekwakwanai hamaoromaoroa dalana do ia dibaia.​—Kolose 3:13.

 To dahaka do oi karaia bema emu natuna ia gwau, natudia haida idia ura ia idia habadua?

•   Emu natuna kamonai henia namonamo. Mani inai oi laloa, (1) dahaka ia vara noho bona (2) dahaka dainai ia dekenai unai bamona idia karaia? Kara ta oi do karaia lasi neganai, unai ena badina oi tahua namonamo. Sivarai ibounai oi diba totona, reana emu natuna ena tisa eiava stiuden ena tama sina oi hereva henia.

   Baibel ena hakaua hereva: “Bema tau ta be sivarai ia kamonai lasi, to ia haere haraga, Ia be kavakava bona do ia hemarai.”​—Aonega Herevadia 18:13.

•   Bema emu natuna idia hahisia, namona be oi durua bena ia laloparara idia ia haere henia dalana ese hekwakwanai ia habadaia eiava do ia koua diba. Haheitalai, Baibel ia gwau: “Mai manau ida ia haere tauna ese badu ia koua, To lalona hahisia hereva ese badu ia havaraia.” (Aonega Herevadia 15:1) Unai dainai, bema ena kara dainai davana oi ura karaia, unai ese hekwakwanai do ia habadaia. Bona hahisia karana do ia ore lasi.

   Baibel ena hakaua hereva: “Ta ese umui ia kara dika henia eiava ia hereva dika henia, ena davana umui henia lasi.”​—1 Petero 3:9.

•   Emu natuna hadibaia, davana ia karaia lasi ese ia hahedinaraia lasi ia be manoka. To goada do ia henia ia idia hahisia taudia ese idia biagua lasi totona. Unai be hegeregere hahisia karana ia halusia.

   Bema intanet amo hahisia karana ia vara, natuna ese inai ia laloatao be mai anina bada, Intanet ai badu herevadia be ta ta dekenai idia siaia lao mai, unai ese hahisia karana do ia haorea lasi, to danu reana natuna ese unai hahisia karadia ia havaraia diba! Bema natuna be gau ta ia karaia lasi idia ia haere henia totona, ia idia hahisia taudia be unai do idia itaia bona hahisia karana do idia hadokoa.

   Baibel ena hakaua hereva: “Lahi au idia noho lasi neganai, lahi ia bodo.”​—Aonega Herevadia 26:20.

•   Nega haida, emu natuna ese hahisia karadia idia havaraia taudia ia dadaraia diba bema idia noho gabudia dekenai ia lao lasi. Hegeregere, bema ia diba unai bamona tauna eiava grup do ia noho, kerere ia vara lasi totona, unai gabu dekenai do ia lao lasi.

   Baibel ena hakaua hereva: “Aonega tauna ese dika ia itaia bona ia raka siri, to diba bada lasi tauna be ia lao noho bona dika ia davaria.”​—Aonega Herevadia 22:3.

 MANI INAI OI TOHOA: Emu natuna oi durua bena ia ese namo eiava dika do ia havaraia diba gaudia ia laloa. Haheitalai:

•  Dahaka do ia vara bema lau kamonai henidia lasi?

•  Dahaka do ia vara bema mai gari lasi ida lau hereva?

•  Dahaka do ia vara bema sikuli tisa dekenai lau herevalaia?

•  Edena dala ai kara namodia amo hahisia karana lau hadokoa diba?

 Herevana oi ia hahisia tauna ida oi hedavari eiava ia be intanet amo, idia vara gaudia be do idia idau diba. Unai dainai emu natuna ida oi gaukara, dala namodia haida umui tahua totona. Bona natuna oi hadibaia ia davaria hekwakwanai dainai ia do oi durua.

 Baibel ena hakaua hereva: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”​—Aonega Herevadia 17:17.