“Dina ta ta ai, gau idauidau ese tau bona hahine edia haheauka karana ia tohoa diba. Oi singul neganai, reana haheauka karana be gau badana lasi, to ia be mai anina bada headava ia kwalimu totona.”​—John.

•  Dahaka dainai oi haheauka be namo?

•  Edena dala ai haheauka oi hahedinaraia diba?

•  “Haheauka be mai anina bada”

•   Headava neganai, emu adavana ena kara kereredia do oi dibaia.

   “Nega sisina daudau umui headava murinai, emu adavana ena kara kereredia sibona oi laloa matamaia diba. Unai lalohadai kereredia oi abia matamaia neganai, do ia auka oi haheauka totona.”​—Jessena.

•   Oi haheauka lasi dainai, oi hereva haraga diba.

   “Egu hemami be lau gwauraia haraga sibona. Bema lau haheauka, do lau laloa namonamo guna bena do lau hereva.”​—Carmen.

   Baibel ia gwau: “Lalokau be ia haheauka bona ia hebogahisi.” (1 Korinto 13:4) Momokani, bema taunimanima rua be ta ta idia lalokau henia, ta ta edia kara do idia haheaukalaia. To nega momo unai ia vara lasi. John ma ia gwau: “Kara namodia ma haida bamona, ta ena haheauka be ia ore diba bema ia hagoadaia lasi. Unai dainai ita hekwarahi be namo unai kara ita hagoadaia totona.”

•   Bema hekwakwanai ta ese emu haheauka karana ia tohoa.

   Haheitalai: Emu adavana ese emu lalona ia hahisia herevana ta ia gwauraia. Do oi ura ena hereva oi haloua.

   Baibel ena hakaua herevana: “Do oi badu haraga lasi, badina vaia ia badu haraga tauna be kavakava tauna ena toana.”​—Hadibaia Tauna 7:9, futnout.

   Haheauka hahedinaraia dalana: Naria. Oi do haere lasi neganai, emu adavana ena hereva ena badina oi laloa. Buka ta ladana, Fighting for Your Marriage ia gwau: “Nega momo ita be hereva ta ita lalopararalaia hegeregerena ita kara, to unai hereva ia gwauraia tauna ese ia lalopararalaia hegeregerena ita laloa lasi.”

   Ena be emu adavana ia ura oi ia habadua, to bema oi haheauka bona ena hereva oi haloua lasi, ena badu oi hamaragia diba. Baibel ia gwau: “Lahi au idia noho lasi neganai, lahi ia bodo.”​—Aonega Herevadia 26:20.

   “Bema emu adavana be emu inai tauna bamona oi laloa, namona be ia oi lalokau henia ena badina oi laloa bona maoromaoro ia totona kara namona ta oi karaia.”​—Ethan.

   Inai oi laloa:

  •  Emu adavana ena hereva o kara ta ese emu lalona ia hahisia neganai, dahaka oi karaia?

  •  Unai ia vara lou neganai, edena dala ai haheauka do oi hahedinaraia?

•   Bema emu lalona ia hahisia karana ta ia karaia loulou

   Haheitalai: Emu adavana be nega ibounai ia leiti, bona oi naria daudau dainai oi badu.

   Baibel ena hakaua herevana: “Ta ta emui kara do umui haheaukalaia noho bona mai kudouna ibounai ida do umui gwauatao heheni.”​—Kolose 3:13.

   Haheauka hahedinaraia dalana: Emu namo sibona oi laloa lasi, to oi hekwarahi emu hetura karana oi hagoadaia totona. Sibona oi nanadaia, ‘Bema egu adavana ida lau hepapahuahu, unai ese emai hetura karana do ia hanamoa eiava hadikaia?’ Danu laloatao, “ita ibounai be nega momo ita kerere.” (Iamesi 3:2) Anina be emu kara danu oi hanamoa be namo.

   “Lau haheauka diba bema ia be egu turana, to egu adavana ida unai be auka. Reana badina nega daudau egu adavana ida lau noho bona ena kara kereredia lau diba. To haheauka be lalokau karana​—hemataurai ena toana​—unai dainai egu headava lalonai ia be mai anina bada.”​—Nia.

   Inai oi laloa:

  •  Emu adavana ena kara kereredia oi haheaukalaia diba, a?

  •  Vaira nega ai edena bamona haheauka oi hahedinaraia diba?