FAMILI DURUA TOTONA
Bema Lalohadai Idia Tamona lasi
Headava taudia dekenai do ia auka bema edia ura gaudia, edia kara, idia karaia gaudia be ta ta amo idia idau. To hekwakwanai ma haida danu be hegeregere:
Adavana ena varavara ida noho hebou ena nega
Moni gaukaralaia namonamo dalana
Natudia havaraia eiava lasi
Dahaka do oi karaia bema oi laloa gaudia be emu adavana ena lalohadai amo idia idau?
Dahaka oi diba be namo
Karaia gaudia be hanaihanai do idia tamona lasi. Herevana headava taudia haida idia karaia gaudia momo be hegeregere, to edia lalohadai be ma ta amo ia idau diba.
“Egu famili be hanaihanai noho hebou karana idia moalelaia. Wikeni ai, nega momo emai tubudia, uncle, aunty bona kasin ida ai noho. Egu tau ena famili be nega momo unai bamona idia karaia lasi. Unai dainai famili ida do ai noho ena nega, bona gabu daudau dekenai idia noho famili ida herevahereva totona, emai lalohadai be ta ta amo ia idau.”—Tamara.
“Lau bona egu hahine be mauri dala idauna amo ai tubu daekau dainai, moni gaukaralaia ena palani ai karaia neganai, emai lalohadai be ta ta amo idia idau. Unai dainai emai headava ena hua ginigunadia lalonai, hepapahuahu idia vara. Unai hekwakwanai hamaoromaoroa, bona ai lalotamona totona ai herevahereva loulou.”—Tyler.
Taunimanima rua ese gau tamona idia itaia, to idia abia lalohadai be tamona lasi. Unai hegeregerena, tau bona hahine huanai lalotamona lasi karana ia vara diba
Hekwakwanai hamaoromaoroa totona gau haida karaia. Haheitalai, bema adavana ena famili lalonai ta ia gorere bona heduru ia noia? Eiava bema adavana be natudia ia ura, to ma ta ia ura lasi? a
“Lau bona egu adavana be nega haida natudia ai herevalaia. Egu adavana be unai ia lalohadailaia momo, bona emai lalohadai be ta ta amo idia idau matamaia. Lau dekenai dala ta ia noho lasi iena lalohadai ida lau lalotamona totona.”—Alex.
Lalohadai idia idau, to headava ia namo diba. Diba bada taudia haida idia gwau, bema oi bona emu adavana be umui lalotamona diba lasi, namona be emu lalohadai oi badinaia, emu ura oi karaia totona—bema oi ura, emu headava oi hadokoa. To unai bamona dala ai hekwakwanai hamaoromaoroa karana ese ia hahedinaraia oi be sibona emu hemami oi laloa. Bona Dirava vairanai oi karaia gwauhamatana, emu adavana ida do oi noho herevana dahaka do ia vara, oi laloa bada lasi.
Dahaka do oi karaia
Lalona hadaia headava ena gwauhamata matauraia totona. Bema emui headava gwauhamatana umui badinaia noho, do umui gaukara hebou bona unai ese umui do ia durua hekwakwanai umui hanaia totona.
Baibel ena hakaua hereva: “Dirava ese ia hakapua taudia be ta ese do ia hapararaia lasi be namo.”—Mat. 19:6.
Palani karaia guna. Haheitalai, bema adavana ia ura natudia bona ma ta ia ura lasi. Do idia vara gaudia oi lalodia guna, hegeregere:
Emu headava ena goada be edena bamona.
Headava lalonai natudia naria ena hekwakwanai umui huaia diba, a?
Tama sina ai umui lao ena maduna idauidau.
Aniani, dabua, bona noho gabuna sibona totona do oi gaukara lasi, to gau ma haida do oi karaia danu.
Moni gaukaralaia dalana.
Oi hegeregere emu gaukara, famili, bona maduna ma haida be nega tamona oi huaia totona, a?
Baibel ena hakaua hereva: “Umui ta ia ura kohoro ta ia haginia, do ia helai guna bona ena davana do ia laloa.”—Luka 14:28.
Gau ibouna dekenai laloa namonamo. Idia vara gaudia haida be reana do umui hamaoromaoroa diba. Hegeregere, hekwakwanai be reana natudia do umui havaraia eiava lasi, bema adavana ia ura lasi, vadaeni sibona ia nanadaia:
‘Bema lau gwau lasi, egu hereva ena anina be hari natudia do ai abia lasi eiava unai do ia vara diba lasi, a?’
‘Lau be tama sina namona ai do lau lasi dainai lau daradara, a?’
‘Lau gari badina egu adavana be lau do ia rakatania, a?’
To natudia ia ura adavana be sibona dekenai do ia henanadai:
‘Ai hegaegae vadaeni tama sina ena maduna ai huaia totona, a?’
‘Natuna ai naria totona emai moni be ia hegeregere, a?’
Baibel ena hakaua hereva: “Ataiai amo ia mai aonegana ia abia tauna be ia . . . laloa maoromaoro.”—Iamesi 3:17
Emu adavana ena lalohadai oi laloa. Taunimanima rua ese gau tamona idia itaia, to idia abia lalohadai be tamona lasi. Unai hegeregerena, headava tau bona hahine be idia vara gaudia dainai idia abia lalohadai be do ia tamona lasi—haheitalai, moni do idia gaukaralaia namonamo dalana. Bema lalohadai be tamona lasi, vadaeni emui lalohadai idia hegeregere diba gaudia ida umui matamaia.
Oi ura henia lasi gauna be dahaka?
Edena lalohadai be mai ena namo?
Headava ia namo totona, umui rua huanai ta ese ena lalohadai do ia hamaoromaoroa bona ena adavana ena lalohadai do ia abia dae, a?
Bible principle: “Namo lasi ta be sibona ena namo ia tahua, to namona be ma ta ena namo ia tahua.”—1 Korinto 10:24.
a Unai bamona gaudia herevalaia guna be namo, gabeai umui headava. To ita laloa lasi gaudia idia vara diba, eiava ma ta ena hemami be gabeai do ia idau.—Hadibaia Tauna 9:11.