“Emai natuna kekeni ena mauri lagani be 6 neganai ia ida alkahol ai herevalaia. To ai hoa badina ia be unai gaudia ia diba vadaeni.”​—Alexander

•  Dahaka oi diba be namo

•  Dahaka oi karaia diba

•  Baibel ena hereva be dahaka

 Natudia dekenai alkahol herevalaia be mai anina bada. Namo lasi oi naria ela bona ia bada. Khamit, Russia dekenai ia gwau; “Emai natuna mero ena mauri lagani ia maragi negana amo, alkahol gaukaralaia namonamo karana ai herevalaia be namo. To, unai lau karaia lasi dainai, lau davaria egu natuna mero ena mauri lagani be 13 neganai, nega momo ia inuinu. Bona unai ai herevalaia be auka.”

 Dahaka dainai unai oi laloa bada be namo?

•   Sikuli turadia, advataisment idauidau, bona TV program ese natuna ena laloa dalana, alkahol gaukaralaia namonamo karana dekenai ia hadikaia diba.

•   U.S. Centers for Disease Control and Prevention ena ripoti ai, United States dekenai alkahol 11 percent idia inua taudia be mauri lagani maragi natudia.

 Unai dainai, helt gaukara taudia idia ura tama sina ese natudia edia mauri lagani ia maragi lalonai do idia hadibaia. Bona idia dekenai alkahol abia karana ena dika do idia herevalaia. Edena dala ai unai do idia karaia?

 Natudia edia henanadai oi haerelaia. Natudia maragidia be gau haida idia ura diba, bona mauri lagani idia bada sisina natudia danu idia ura gau momo do idia diba. Unai dainai idia oi haere henia totona do oi hegaegae namonamo. Haheitalai:

•   Bema emu natuna ia ura diba alkahol ena mamina be edena bamona, oi gwau diba, wain ena mamina be saoa frut juice bamona, bona bia be idita sisina.

•   Bema emu natuna ia ura alkahol ia tohoa, ia dekenai oi gwau diba natudia edia tauanina dekenai alkahol be ia goada. Alkahol ese ia havaraia gaudia oi herevalaia: Alkahol ese ta ena hemami ia hanamoa, to momo inua neganai kwarana do ia giroa, kavakava karadia idia vara, bona do ia herevalaia gaudia dainai gabeai do ia hemarai.​—Aonega Herevadia 23: 29-35.

 Sibona oi edukeit. Baibel ia gwau: “Aonega tauna be mai ena diba ida ia kara.” (Aonega Herevadia 13:16) Infomeisen oi tahua emu tano ai alkahol gaukaralaia ena hetoa maorona, bona taravatu oi diba totona. Unai dala amo do oi hegaegae namonamo diba emu natuna oi durua totona.

 Dala karaia unai topik herevalaia. Britain ai, tamana ta ladana Mark ia gwau: “Natudia be alkahol gaukaralaia karana dekenai do idia daradara diba. Egu natuna mero ena mauri lagani be 8 lau nanadaia, bema ia dekenai alkahol inua karana be maoro eiava kerere. Lau hahedinaraia do ia gari lasi, bona unai ese ia durua iena lalohadai ia gwauraia hedinarai namonamo.”

 Bema unai topik oi herevalaia loulou, natuna ena lalona ai do ia noho diba. Emu natuna ena mauri lagani hegeregerena unai topik umui herevalaia, mauri ai idia vara gaudia oi gaukaralaia danu, hegeregere dala ena seifti bona mahuta hebou karana dekenai.

 Haheitalai namona oi hahedinaraia. Natudia be spans bamona​—edia badinai idia vara gaudia idia abia​—bona tahua gaukarana ese ia hahedinaraia natudia be tama sina ese idia karaia gaudia amo diba idia abia. Unai ena anina be, bema alkahol oi inua lalohekwarahi hamaragia totona, emu natudia danu do idia laloa alkahol inua karana ese lalohekwarahi ia hamaragia. Namona be oi be haheitalai namona. Dala maorona ai alkahol oi gaukaralaia.