Reana emu natudia be idia kerere dainai, do idia lalomanoka o lalohisihisi. Edena dala ai idia oi durua diba?

•  Inai oi diba be namo

•  Inai oi karaia diba

 Vaia kerere ita karaia. Baibel ia gwau “ita ibounai be . . . ita kerere.” (Iamesi 3:2) Natudia danu idia kerere. To unai be mai ena namo​—natudia be edia kerere amo do idia diba edena bamona kerere ma haida idia hanaia diba. Natudia be idia vara neganai, unai idia diba lasi, to idia manadalaia diba. Sinana ta ladana Laura ia gwau: “Lau bona egu adavana ai itaia, natudia be kerere hanaia dalana idia dibaia be namo, bona namo lasi edia kerere idia hunia. Bona gau haida idia maoro lasi neganai, idia haheauka diba.”

 Natudia momo be idia kerere neganai, idia moale lasi. Natudia haida be kerere hanaia dalana idia diba lasi, badina edia tama sina ese idia gimadia. Hegeregere, bema natuna be sikuli ai risalt namona ia abia lasi, tama sina haida be maoromaoro tisa do idia bleim. Bema natuna be ena turana ida ia lalotamona lasi, ena tama sina be maoromaoro ena turana do idia bleim.

 Bema tama sina be hanaihanai natudia idia gimaia, edena bamona natudia be edia kerere hamaoromaoroa dalana do idia diba?

•   Emu natudia hadibaia edia kara be mai ena davana.

   Baibel ia gwau: “Tau ta ese ia hadoa gauna, unai gauna sibona do ia abia.”​—Galatia 6:7.

   Iseda kara ese namo eiava dika ia havaraia diba. Ita hadikaia gaudia hanamoa totona be mai ena davana. Ita kerere neganai, davana ita abia. Namona be natudia idia diba edia kara ese namo eiava dika do ia havaraia, bona unai ena maduna do idia huaia. Unai dainai, emui natudia edia kerere dainai ma ta umui bleim lasi eiava ekskius karaia lasi. To natudia edia mauri lagani hegeregerena, davana maorona umui henia. Namona be natudia ese edia kerere dainai ia vara dika idia lalopararalaia.

•   Emu natudia durua kerere hanamoa daladia idia tahua.

   Baibel ena hakaua herevana: “Kara maoromaoro tauna be nega 7 do ia moru, to do ia gini lou.”​—Aonega Herevadia 24:16.

   Ita kerere neganai ita lalohisihisi, to unai be do ia ore. Emu natudia durua kerere hanamoa daladia idia tahua totona, bona namo lasi ia vara vadaeni kerere dainai idia lalohekwarahi sibona. Hegeregere, bema emu natuna mero be sikuli ena eksam ai ia feil, ia oi durua unai amo do ia diba ia stadi namonamo neganai do ia kwalimu diba. (Aonega Herevadia 20:4) Bema emu natuna kekeni be iena turana ida ia hepapahuahu, ia oi durua maino karaia dalana ia tahua totona, herevana unai be iena kerere lasi.​—Roma 12:18; 2 Timoteo 2:24.

•   Emu natudia dekenai manau karana hadibaia.

   Baibel ena hakaua herevana: “Umui huanai idia noho taudia ta ta lau hamaoroa, namo lasi sibona do ia laloa bada.”​—Roma 12:3.

   Namo lasi emu natuna oi hamaoroa sikuli ai ia be ma haida ia “hereaia.” Badina sikuli ai maka namodia idia abia natudia be nega ibounai maka namodia do idia abia lasi. Bona spot gadara haida ai idia kwalimu natudia be hanaihanai do idia kwalimu lasi. Bema emu natudia idia manau, idia kerere neganai, do idia lalometau momokani lasi.

   Baibel ia gwau ita davaria hahetoho idauidau ese ita dekenai goada ia henia, bona ita ia durua ita haheauka totona. (Iamesi 1:2-4) Unai dainai ena be natudia be idia karaia kerere dainai idia lalohisihisi, to idia oi durua diba lalohadai maorona idia abia totona.

   Emu natudia hadibaia totona nega bada oi henia bona oi hekwarahi be namo. Unai amo idia bada neganai, unai ese idia do ia durua bada. Buka ta ladana Letting Go With Love and Confidence ia gwau: “Hekwakwanai hamaoromaoroa dalana idia diba matamata taudia be idia lalohekwarahi bada neganai, abia hidi kereredia do idia karaia haraga lasi. Gau matamata ta o hekwakwanai ta ia vara neganai, idia hanaia diba.” Oibe, kerere hamaoromaoroa karana ese natudia do ia durua ela bona idia bada.

 Heduru herevana: Haheitalai hahedinaraia. Laloatao, idia vara hekwakwanai oi haheaukalaia neganai, emu natudia be edia hekwakwanai haheaukalaia dalana do idia diba.