Iehova ena Witnes Taudia be gavamani bona edia pepe o unai bamona gaudia idia matauraia. Momokani, haida be abia hidi do idia karaia edia tano totona gwauhamatana idia gwauraia, pepe do idia saluti eiava bese abia isi anena do idia abia.

 To, Iehova ena Witnes Taudia be abia hidi ai karaia unai gaudia do ai karaia lasi badina ai abia dae unai kara be Baibel hahediba herevadia ida idia hegeregere lasi. Do ai moale bema haida be emai tomadiho dala bona ai abia dae gaudia idia matauraia danu be namo.

Inai atikol lalonai

•  Baibel ena hakaua herevadia be dahaka?

•  Bema gavamani ena taravatu ia gwau gau haida do ita karaia be edena bamona?

•  Iehova ena Witnes Taudia be taunimanima eiava gavamani ta ena kahana idia durua, a?

 Inai Baibel ena hahediba herevadia rua ese ita do ia durua abia hidi maorodia do ita karaia:

•   Dirava sibona ita tomadiho henia be maoro. Baibel ia gwau: “Iehova oiemu Dirava oi tomadiho henia be namo, bona ia sibona do oi hesiai henia.” (Luka 4:8) Nega momo tano ena gwauhamatana herevadia bona bese abia isi anedia lalonai, edia tano idia abia isi eiava laloa bada herevadia idia torea. Unai dainai Iehova ena Witnes taudia idia laloa unai aria dekenai idia vareai be kerere.

   Iehova ena Witnes taudia idia diba pepe saluti karana be tomadiho karana ta, eiava kaivakuku tomadiho henia karana, bona Baibel be unai kara ia taravatua. (1 Korinto 10:14) Histori idia torea taudia haida idia gwau tano ena pepe be tomadiho gauna ta. Carlton J. H. Hayes, histori ia torea tauna, ia gwau: “Bese abia isi karana lalonai pepe be idia abidadama henia bona idia tomadiho henia gauna badana.” a Toretore tauna Daniel P. Mannix be Keristani ginigunadia ia herevalaia, ia gwau: “Keristani taudia idia ura lasi . . . [Roma] ena pavapava ena lauma dekenai boubou karana do idia karaia—hari inai negai pepe saluti henia lasi karana hegeregerena.” b

  Ena be Iehova ena Witnes taudia be pepe idia saluti lasi, to do ai darea eiava gabua lasi, eiava dala idauidau ai do ai hadikaia lasi, to ai matauraia.

•   Dirava matanai taunimanima ibounai be hegeregere. (Kara 10:34, 35) Baibel ia gwau, Dirava ese “tau tamona amo bese ibounai taudia ia karaia.” (Kara 17:26) Inai badina dainai, Iehova ena Witnes taudia idia abia dae iduhu ta eiava bese ta abia isi karana be kerere. Taunimanima ibounai ai matauraia, ena be idia be idau bese taudia.​—1 Petero 2:17

 Iehova ena Witnes taudia be gavamani idia gwau-edeede henia lasi. Ai abia dae gavamani be “Dirava ese ia haginia dalana” hegeregerena ai idia noho. Danu, ai abia dae namona be Keristani taudia be lohia taudia idia kamonai henia.​—Luka 20:25.

 To dahaka do ia vara bema gavamani ena taravatu ia gwau do ita karaia gauna be Dirava ena taravatu ia utua. Nega haida, ia be kerere lasi gavamani dekenai ita noinoi senisi haida idia karaia totona. c Bema hegeregere lasi senisi idia karaia, Iehova ena Witnes taudia be mai hemataurai ida, “Dirava be lohia dainai ia [idia] kamonai henia be maoro, to taunimanima lasi.”​—Kara 5:29.

 Lasi. Iehova ena Witnes taudia be taunimanima ta eiava gavamani ta ena kahana idia durua lasi. Bese ta ai abia isi lasi, pepe ai saluti lasi eiava bese abia isi anedia ai abia lasi neganai, unai ese ia hahedinaraia lasi ai ura gavamani ai inai henia. To, Baibel ena hakaua daladia unai bamona kara dekenai ai badinaia.