Iehova ena Witnes taudia be hereva momokani idia dibaia totona, Baibel idauidau momo idia stadilaia. To, bema Nega Matamata Trensleisen Ena Buka Helaga be gado ta ai ia noho, unai Baibel ai gaukaralaia badina Dirava ena ladana ia gaukaralaia, hereva idia hahanaia maoromaoro, bona ena anina ia hedinarai goevagoeva.

•   Dirava ena ladana ia gaukaralaia. Baibel idia halasia taudia haida be Baibel ia Torea Tauna idia hanamoa lasi. Hegeregere, Baibel ta lalonai lista dekenai taunimanima 70 edia ladadia idia torea, idia ese unai Baibel halasia gaukara idia durua. To, unai Baibel lalonai Torea Tauna, Iehova Dirava, ena ladana ia gaukaralaia lasi!

   To, Nega Matamata Trensleisen ese toretore ginigunadia ia badinaia bona Dirava ena ladana ia noho gabudia ai, Dirava ena ladana idia atoa lou, to unai Baibel idia hahanaia gaukarana idia naria komiti taudia edia ladana idia torea hedinarai lasi.

•   Maoromaoro. Idia hahanaia Baibel momo ese Baibel ena hereva momokanina idia hahedinaraia lasi. Hegeregere, idia hahanaia Baibel ta ese Mataio 7:13 be inai bamona ia torea: “Iduara maragina dekenai do umui raka vareai, badina hel ia lao henia dalana ena iduara be bada, bona ena dala be ia auka lasi.” To toretore ginigunadia ese “mase” ia gaukaralaia, bona “hel” ia torea lasi. Reana, hahanaia taudia ese “hel” idia atoa, badina idia abia dae kara dika taudia be hel lahi gabuna ai hisihisi do idia mamia ela bona hanaihanai. To unai lalohadai be Baibel ena hahediba herevana lasi. Unai dainai, Nega Matamata Trensleisen ese unai siri be inai bamona idia hahanaia: “Geiti maragina dekenai umui vareai, badina mase ia lao henia dalana be bada bona ena geiti be lababa herea.”

•   Anina ia hedinarai goevagoeva. Hereva idia hahanaia namonamo neganai, ena anina do ia hedinarai goevagoeva, bona duahia tauna ese do ia lalopararalaia. Mani inai haheitalai ita itaia. Roma 12:11 ai, Keristani tauna, aposetolo Paulo be Grik herevana ta ia gaukaralaia, bona ena anina korikorina be “lauma be ia boela noho.” To, Hiri Motu ai unai hereva ena anina ia hedinarai namonamo lasi, unai dainai Nega Matamata Trensleisen ai auka lasi dalanai inai bamona idia hahanaia: “Dirava ena lauma amo umui hururuhururu.”

 Nega Matamata Trensleisen be Dirava ena ladana ia gaukaralaia, idia hahanaia maoromaoro, bona anina ia hedinarai goevagoeva, to gau namona ma ta be taunimanima dekenai idia hariharilaia davana lasi. Unai dainai, ogogami taudia danu guna Baibel ta idia hoia diba lasi, be hari edia gado korikorina ai Baibel idia duahia diba.