Lasi. Iehova ena Witnes Taudia be veksineisen idia dadaraia lasi. Emai lalohadai be Keristani taudia ta ta be sibona edia disisen do idia karaia veksin hekodo do idia abia eiava lasi. Iehova ena Witnes Taudia momo be disisen idia karaia veksin hekodo idia abia totona.

 Ai be medikol heduru namona ai ura henia bona saiens taudia ese gorere badadia hanamoa totona idia karaia heduru gaudia momo ai laloa bada. Gorere badana ta ia vara neganai, doketa bona nesi taudia edia gaukara goadagoada karana ai laloa bada bona idia ai tanikiu henia.

 Iehova ena Witnes Taudia be gavamani ena doketa taudia edia hereva idia badinaia. Hegeregere, COVID-19 daihanai gorerena ia vara neganai, Iehova ena Witnes Taudia be inai websait dekenai gado handred momo ai gavamani ese idia atoa taravatu idia halasia, bona duahia taudia idia hamaoroa unai idia badinaia totona. Unai taravatu be ma haida amo gini daudau, hutuma do idia haboua lasi, kwarentin, imana huria bona vairana koua (mask) atoa, bona gavamani ese ia atoa taravatu ma haida do idia badinaia.​—Roma 13:1, 2.

 Lagani momo lalodiai, Iehova ena Witnes Taudia edia pablikeisen ese inai hakaua herevadia idia halasia:

•   Ta ta do idia abia hidi dahaka medikol heduru do idia abia dae.​—Galatia 6:5.

   “[Inai magasin] ese muramura o medikol heduru ta ia abia hidi lasi bona medikol sisiba ia henia lasi. To ia ese idia vara gaudia ia hahedinaraia bona ia rakatania duahia tauna sibona ese ia lalohadailaia bona disisen ia karaia.”​—Awake!, February 8, 1987.

   “Oi bona emu natudia be veksin hekodo do umui abia o lasi be oi sibona ese disisen do oi karaia.”​—Awake!, August 22, 1965.

•   Ai be mauri ai laloa bada dainai medikol heduru ai tahua.​—Kara 17:28.

   “Witnes Taudia idia gorere neganai, heduru abia totona doketa idauidau dekenai idia lao. Mauri idia laloa bada dainai, Baibel ena taravatu hegeregerena gau ibounai idia karaia, idia mauri daudau totona..”​—The Watchtower, July 1, 1975.

   “Iehova ena Witnes Taudia be mai ura ida muramura bona medikol heduru idia abia dae. Idia ura do idia goada bona mauri daudau do idia noholaia. Keristani taudia edia negai ia noho aposetolo tauna Luka hegeregerena, Iehova ena Witnes Taudia haida be doketa taudia danu. . . . Iehova ena Witnes Taudia be medikol heduru idia henia taudia ena gaukara idia laloa bada. Unai taudia dekenai idia moale, badina edia heduru dainai edia gorere amo idia namo.”​—The Watchtower, February 1, 2011.