Iehova ena Witnes Taudia ese vara dinana idia moalelaia lasi, badina idia abia dae unai kara ese Dirava ia hamoalea lasi. Ena be Baibel ia gwau lasi vara dinana ita moalelaia, to ita ia durua unai dina ai idia vara gaudia ita laloa namonamo totona, unai amo Dirava ena lalohadai unai kara dekenai do ita lalopararalaia. Mani gau foa ita laloa bona Baibel ena hakaua herevadia unai gaudia dekenai ita herevalaia.

1.   Vara dinana moalelaia karana be pagan tomadiho amo ia mai. Buka ta ladana, Funk &Wagnalls Standard Dictionary of Folklore, Mythology, & Legend ia gwau, momo idia laloa tau ta ena vara dinana dekenai, “lauma dikadia ese unai tauna idia hadikaia diba,” to bema “ena turadia idia noho bona ia dekenai hanamoa herevadia idia gwauraia, dika amo do idia gimaia.” Buka ta ladana The Lore of Birthdays ia gwau, idaunegai vara dinana be buka dekenai idia torea, badina “unai amo horoscope idia karaia diba,” ena badina be “mystic science of astrology” ena hahediba amo. Unai buka ma ia gwau, idaunegai, taunimanima idia laloa “vara dinana ai kandol idia gaukaralaia neganai, idia dekenai gau namodia do ia vara.”

    To, Baibel ese ia hahedinaraia meamea karadia bona lauma dikadia edia heduru noia karana eiava “unai bamona kara ta” be Dirava ese ia inai henia. (Deuteronomi 18:14; Galatia 5:19-21) Unai dainai, Dirava ese Babulonia siti ia gwauraia dika, badina unai gabu ai idia noho taudia ese hisiu stadilaia karana idia karaia, unai be lauma dikadia ena heduru noia karana ta. (Isaia 47:11-15) Iehova ena Witnes taudia ese kastom momo edia badina idia tahua lasi, to bema idia be Baibel ena hereva hegeregerena lasi, unai kara idia dadaraia.

2.   Keristani taudia ginigunadia ese vara dinana idia moalelaia lasi. The World Book Encyclopedia ia gwau, “idia laloa ta ena vara dinana moalelaia karana, be kaivakuku tomadiho henia taudia edia kara ta” eiava kastom ta. Baibel ese ia hahedinaraia Iesu ese aposetolo taudia bona ma haida ia hadibaia hegeregerena, Keristani taudia ibounai ese unai hadibaia dalana idia badinaia be namo.​​—2 Tesalonika 3:6.

3.   Keristani taudia ese idia laloatao dinana be Iesu ena mase dinana, to ena vara dinana lasi. (Luka 22:17-20) Unai hereva dekenai ita hoa lasi, badina Baibel ia gwau ‘mase dinana ese vara dinana ia hereaia.’ (Hadibaia Tauna 7:1) Iesu ena tanobada mauri dokona ai, Dirava vairanai ladana namona ia abia, unai dainai ena mase dinana ese ena vara dinana ia hereaia.​—Heberu 1:4.

4.   Baibel ia hahedinaraia lasi Dirava ena hesiai tauna ta be vara dinana ia moalelaia. To unai ese ia hahedinaraia lasi ia vara gauna idia laloaboio. Badina Baibel ese Dirava idia hesiai henia lasi taudia rua edia vara dinana ia herevalaia, bona danu unai dina ai ia vara dika ia gwauraia.​—Genese 40:20-22; Mareko 6:21-29.

 Tama sina namodia ibounai bamona, Witnes taudia ese edia natudia idia lalokau henidia, unai dainai dina ta ta ai harihari gaudia idia henia, bona moale karadia idia karaia hebou. Idia ura Dirava ena haheitalai namona idia tohotohoa, badina ia ese hanaihanai ena natudia dekenai gau namodia ia henia. (Mataio 7:11) Witnes tama sina edia natudia idia lalohisihisi lasi, badina henunai idia noho hereva ese unai ia hahedinaraia:

•   “Harihari gauna ta oi naria lasi neganai, bema [ta] oi abia, emu moale be bada.”​—Tammy, mauri lagani 12.

•   “Ena be egu vara dinana dekenai harihari gaudia lau abia lasi, to egu tama sina be nega ma haida ai lau totona harihari gaudia idia hoia.Unai ese lau ia hamoalea.”​—Gregory, mauri lagani 11.

•   “Oi laloa miniti ten, keke maragidia haida, bona ane ta be pati, a? Namona be egu ruma dekenai do oi mai bona pati korikorina do oi itaia!”​—Eric, mauri lagani 6.