1 Ioane 1:1-10
1 Mauri herevana dainai umui ai tore henia. Ia be matamana negana amo ia noho, ai ese ena hereva ai kamonai, emai matana amo ia ai itaia, oibe ai itaia namonamo bona emai imana amo ia ai dogoatao.
2 (Oibe, unai mauri ia hedinarai, bona ai itaia vadaeni bona ai gwauraia hedinarai noho bona inai mauri hanaihanai be Tamana amo, bona ia be ai dekenai ia hedinarai, unai be umui dekenai ai herevalaia.)
3 Oibe, ai itaia bona ai kamonai gaudia be umui dekenai ai herevalaia danu. Unai amo ai ida do umui gaukara hebou. Bona ita be Tamana bona ena Natuna Iesu Keriso ida ita gaukara hebou.
4 Unai dainai umui dekenai inai gaudia ai torea, unai amo iseda moale be do ia bada momokani.
5 Bona ia amo ai kamonai bona umui dekenai ai gwauraia noho herevana be inai, Dirava be diari bona ia dekenai dibura be lasi momokani.
6 Bema ita gwau: “Ita be ia danu ita gaukara hebou,” to ita be dibura lalonai ita do raka noho, vadaeni ita koikoi bona hereva momokani ita badinaia lasi.
7 Dirava be diari lalonai ia noho hegeregerena, bema ita be diari lalonai ita raka noho, ita ibounai be ita gaukara hebou, bona ena Natuna Iesu ena rara ese kara dika ibounai amo ita ia hagoevaia.
8 Bema ita gwau: “Ita dekenai kara dika be lasi,” ita be sibona ita koia noho bona hereva momokani be ita dekenai ia noho lasi.
9 Dirava ese ena hereva ia badinaia bona ia be kara maoromaoro tauna dainai, bema iseda kara dika ita gwauraia hedinarai, do ia gwauatao bona kara dika ibounai amo ita do ia hagoevaia.
10 Bema ita gwau: “Ita be ita kara dika lasi,” vadaeni Dirava be koikoi tauna ai ita halaoa, bona ena hereva be ita dekenai ia noho lasi.
