1 Korinto 4:1-21
4 Namona be taunimanima idia laloa ai be Keriso henunai ai gaukara hesiai taudia, bona ai be Dirava ena hunia hereva helagana ai naria taudia.
2 Danu, unai naria taudia amo idia tahua gauna be inai: Namona be idia ese edia gaukara idia karaia momokani.
3 Lau laloa bema umui eiava taunimanima edia kota ese lau idia hahemaoro henia, unai be gau badana lasi. Momokani, lau danu be sibona lau hahemaoro henia lasi.
4 Badina egu lalomamina be ia goeva. To unai ese ia hamomokania lasi lau be kara maoromaoro tauna, lau ia hahemaoro henia tauna be Iehova.
5 Unai dainai gau ta do umui hahemaoro henia haraga lasi, umui naria ela bona Lohiabada do ia mai. Ia ese dibura lalonai idia hunia gaudia be diari lalonai do ia hahedinaraia, bona kudouna edia ura do ia hahedinaraia, bena taunimanima ta ta ese Dirava amo hanamoa do idia abia.
6 Vadaeni tadikaka e, unai gaudia lau herevalaia neganai, emui namo totona lau bona Apolo lau herevalaia, bena aiemai haheitalai amo inai taravatu do umui diba: “Namona be Toretore Helagadia lalonai idia torea gaudia sibona do umui badinaia,” unai amo do umui hekokoroku lasi, bona tau ta do umui heagilaia lasi.
7 Dahaka dainai oi be ma ta oi hereaia? Momokani, oi abia gaudia ibounai be Dirava amo, ani? Bema unai gaudia be Dirava amo oi abia, dahaka dainai oi heagi, hegeregere oi sibona emu goada amo oi abia bamona?
8 Umui be emui ura gaudia ibounai umui abia vadaeni, a? Umui be umui taga vadaeni, a? Ai be do king lasi, to umui be king ai umui lao vadaeni, a? Lau ura momokani bema umui be king ai umui lao vadaeni, badina bema unai bamona ia vara, ai danu be king ai do ai lao bona umui ida do ai lohia.
9 Lau dekenai toana be Dirava ese ai aposetolo taudia be heatu heluluna ena dokonai ia atoa, do idia mase taudia bamona. Lau be unai bamona lau laloa badina tanobada taudia bona aneru ese ai idia raraia noho.
10 Keriso ai badinaia dainai taunimanima idia laloa ai be kavakava taudia, to umui be Keriso umui badinaia dainai umui laloa umui be aonega taudia. Ai be ai manoka bona umui be umui goada, umui be ladana namona umui abia, to ai be idia laloa maragi.
11 Ema bona hari ai be ai hitolo bona ranu mase noho, ai be dabua lasi, ai idia botaia, bona ai be ruma lasi,
12 bona ai hekwarahi, emai imana amo ai gaukara. Taunimanima ese ai idia hereva dika henia neganai, idia ai hanamoa bona ai idia dagedage henia neganai, ai haheauka,
13 bona emai ladana idia hadikaia neganai, dala namona ai idia ai hereva henia. Ema bona hari, taunimanima ese ai be tanobada ena momoru ai idia halaoa bona ai be idia dadaraia miro gaudia bamona.
14 Inai gaudia lau torea, umui lau hahemaraia totona lasi, to umui be egu lalokau natudia dainai umui lau sisiba henia.
15 Keriso ida umui lalotamona dainai, ena be emui hadibaia taudia be 10,000, to momokani emui tamana be momo lasi, badina sivarai namona dainai Keriso Iesu amo lau be emui tamana ai lau lao.
16 Unai dainai umui lau noia, lau do umui tohotohoa.
17 Vadaeni umui dekenai Timoteo lau siaia inai, Lohiabada ena gaukara lalonai ia be egu lalokau natuna mai abidadama. Keriso Iesu lau hesiai henia lalonai, lau badinaia daladia be ia ese umui dekenai do ia hadibaia, lau ese gabu ibounai dekenai kongrigeisen ibounai lau hadibaia hegeregerena.
18 Umui haida umui laloa lau be umui dekenai do lau mai lasi, unai dainai umui hekokoroku.
19 To kahirakahira umui dekenai do lau mai, bema unai be Iehova ena ura, bona lau ura lasi unai hekokoroku taudia edia hereva lau diba, to lau ura diba bema Dirava ena siahu ese idia ia hakaua eiava lasi.
20 Badina Dirava ena Basileia be ta ena mauri lalonai ia hedinarai dalana be iena hereva amo lasi, to Dirava ena siahu amo.
21 Edena umui ura? Mai kwadia auna ida umui dekenai do lau mai, eiava mai lalokau bona manau ida do lau mai?
