1 Korinto 7:1-40
7 Umui emui revareva lalonai umui gwauraia gaudia dainai, inai hereva lau torea. Tau ta ese hahine ta ia dogoatao lasi be namo.
2 To matabodaga karana be ia bada dainai, namona be tatau ibounai be edia adavana korikori idia abia, bona hahine ibounai danu be edia adavana korikori idia abia be namo.
3 Namona be tau ese ena adavana ia abia be namo gauna* ia henia, bona namona be hahine ese ena adavana ia abia be namo gauna ia henia.
4 Hahine ese sibona ena tauanina ia biagua lasi, to ena adavana ese ia biagua. Unai hegeregerena, tau danu be sibona ena tauanina ia biagua lasi, to ena adavana ese ia biagua.
5 Umui headava taudia ese ta ta dekenai mahuta hebou karana umui koua lasi. To bema umui ruaosi umui lalotamona unai umui koua, unai amo nega umui atoa guriguri totona, namona be nega sisina sibona lalonai unai bamona umui karaia. Bona unai murinai, ma umui hebou lou, dika umui ese tauanina ena ura umui biagua lasi bona Satani ese umui ia tohoa.
6 Lau ese umui dekenai maoro lau henia unai bamona umui karaia totona, to inai be oda herevana lasi.
7 Lau ura taunimanima ibounai be lau bamona idia noho. To ibounai ta ta be Dirava amo harihari gauna idia abia, ta be inai bamona dala ai bona ma ta be unai bamona dala ai.
8 Headava lasi taudia bona vabu dekenai inai hereva lau gwauraia: Idia dekenai do ia namo bema idia be lau bamona idia noho.
9 To bema sibodia edia ura idia biagua diba lasi, namona be idia headava, namo lasi unai ura be lahi bamona idia ia araia.
10 To headava taudia dekenai inai hadibaia hereva lau gwauraia, unai be egu hadibaia hereva lasi, to Lohiabada ena. Unai hadibaia herevana be inai, hahine ese ena adavana do ia rakatania lasi,
11 to bema ia ese ena adavana ia rakatania, namona be do ia headava lasi, eiava ena adavana ida maino ia karaia lou. Bona namo lasi tau ese ena adavana ia rakatania.
12 To lau ese ma haida dekenai inai hereva lau gwauraia, oibe, inai be egu hereva, to Lohiabada ena lasi: Bema tadikaka ta be mai ena abidadama lasi adavana, bona bema ia ura ia ida do ia noho, namona be tadikaka ese do ia rakatania lasi.
13 Bona bema hahine ta be mai ena abidadama lasi adavana, bona bema ia ura ia ida do ia noho, namona be unai hahine ese do ia rakatania lasi.
14 Badina be hahine dainai ena abidadama lasi adavana ia helaga. Bona tadikaka dainai ena abidadama lasi adavana ia helaga. Bema lasi, umui emui natudia be goeva lasi, to harihari idia be idia helaga.
15 To bema abidadama lasi tau o hahine ia ura iena adavana ia rakatania, vadaeni ia lao be namo. Unai bamona ia vara neganai, tadikaka o taihu be unai headava ese ia guia lasi. To Dirava ese umui ia boiria, maino ai umui noho totona.
16 Hahine e, bema emu adavana oi durua Keristani tauna ai ia lao totona, oi ese ia oi hamauria unai. Eiava tau e, bema emu adavana oi durua Keristani hahine ai ia lao totona, oi ese ia oi hamauria unai.
17 Taunimanima ta ta edia noho dalana be idauidau bona Iehova ese unai ia koua lasi. Dirava ese idia ta ta ia boiria hegeregerena, unai bamona do idia noho be namo. Bona unai taravatu be kongrigeisen ibounai dekenai lau henia.
18 Dirava ese tau ta ia boiria neganai, ia be kopina utua tauna, a? Namona be unai bamona do ia noho. Dirava ese tau ta ia boiria neganai, ia be kopina utua lasi tauna, a? Namona be ena kopina idia utua lasi.
19 Kopina utua karana be anina lasi bona kopina utua lasi karana danu be anina lasi, to Dirava ena taravatu badinaia karana be mai anina.
20 Umui ta ta ia boiria neganai umui noho hegeregerena, do umui noho be namo.
21 Dirava ese oi ia boiria neganai oi be igui hesiai tauna ta, a? Namo lasi unai oi lalohekwarahilaia, to bema oi dekenai ruhaia dalana ia kehoa, vadaeni unai oi abia dae be namo.
22 Badina bema ta be igui hesiai tauna bona Dirava ese ia boiria, ia be Lohiabada ena ura kwalimu tauna. Unai hegeregerena bema ta be ura kwalimu tauna bona Dirava ese ia boiria, ia be Keriso ena igui hesiai tauna.
23 Dirava ese dava bada amo umui ia hoia, unai dainai taunimanima edia igui hesiai taudia ai umui lao lasi.
24 Tadikaka e, Dirava ese umui ta ta ia boiria neganai umui noho hegeregerena, Dirava vairanai do umui noho be namo.
25 Headava lasi taudia* totona lau be Lohiabada amo hahegani ta lau abia lasi, to Lohiabada ese lau ia hebogahisi henia dainai, egu lalohadai lau gwauraia, vadaeni umui ese unai umui abidadama henia diba.
26 Ita be metau negana lalonai ita noho dainai, lau laloa tau ta be hari ia noho hegeregerena do ia noho be namo.
27 Oi be mai emu hahine, a? Vadaeni namo lasi dala oi tahua ia amo oi parara totona. Oi be mai emu hahine lasi, a? Vadaeni namo lasi hahine ta oi tahua.
28 To bema oi headava, oi be oi kara dika lasi. Bona bema ia headava lasi tauna* ia headava, ia be ia kara dika lasi. To, do idia headava taudia be edia tauanina ai hisihisi do idia abia. To unai bamona lau hereva, badina lau ura lasi hisihisi do umui abia.
29 Danu tadikaka e, lau ura umui lau hadibaia, nega be ia kwadogi. Unai dainai hari inai nega amo, namona be tatau mai edia adavadia be adavana lasi taudia bamona do idia noho.
30 Bona taitai taudia be taitai lasi taudia bamona do idia noho. Bona idia moale taudia be moale lasi taudia bamona do idia noho. Bona idia hoihoi taudia be kohu lasi taudia bamona do idia noho.
31 Bona inai tanobada gaudia idia gaukaralaia taudia be unai gaudia idia gaukaralaia guguru lasi taudia bamona do idia noho. Badina inai tanobada ena toana be ia idau ia lao noho.
32 Oibe, lau ura do umui lalohekwarahi lasi. Headava lasi tauna be Lohiabada ena gaudia totona ia lalohekwarahi, edena dala ai ia ese Lohiabada ena lalonamo ia abia diba.
33 To headava tauna be tanobada gaudia totona ia lalohekwarahi, edena dala ai ia ese ena adavana ena lalonamo ia abia diba,
34 bona ia lalorua. Danu, headava lasi hahinena bona rami-hebou kekenina be Lohiabada ena gaudia totona idia lalohekwarahi, badina idia ura edia tauanina bona lalona ai idia helaga. To headava hahinena be tanobada gaudia totona ia lalohekwarahi, edena dala ai ena adavana ena lalonamo ia abia diba.
35 Umui emui namo totona inai hereva lau gwauraia, umui lau koua totona lasi, to lau ura kara maorona umui laloa. Vadaeni hanaihanai Lohiabada do umui hesiai henia bona gau ta ese emui lalona do ia veria lasi.
36 To bema ta ia headava lasi* bona ia be ena tauanina ena ura ia biagua diba lasi, bona bema ia be ena matamata negana ia hanaia vadaeni, namona be inai ia karaia: Ia headava be namo, bema unai be iena ura gauna. Ia be ia kara dika lasi. Unai bamona taudia idia headava be namo.
37 To bema ta be ena lalona* ia hadaia do ia headava lasi, bona unai lalohadai ia dogoatao auka, badina ia laloa ia headava be anina lasi bona ia sibona ena ura ia biagua diba, vadaeni unai be namo.
38 Unai dainai bema ta ia headava, unai be namo, to bema ta ia headava lasi, unai be namo herea.
39 Hahine ta ena adavana ia mauri noho negadia ibounai lalonai, ia ida do ia noho. To bema ena adavana be mase lalonai ia mahuta, ia be ena ura tauna ia adavaia diba, to Lohiabada lalonai sibona.
40 To egu lalohadai be inai: Bema ia headava lasi, ia be do ia moale, bona lau laloa lau danu be Dirava ena lauma lau abia.
