2 Korinto 3:1-18
3 Ai be umui dekenai ai sibona do ai gwauraia hedinarai lou be namo, a? Eiava taunimanima haida bamona, umui amo hamomokania revareva do ai abia eiava umui dekenai hamomokania revareva do ai henia, a?
2 Umui be emai revareva bona unai revareva ena toretore be emai kudouna dekenai ia noho, bona taunimanima ibounai be unai idia diba bona idia duahia.
3 Badina ia hedinarai goevagoeva, umui be Keriso ena revareva, bona ai, hesiai taudia ese unai ai torea. Inai be inka amo ai torea lasi, to mauri Diravana ena lauma amo ai torea, nadi palakadia latanai lasi, to taunimanima edia kudouna dekenai ai torea.
4 Keriso amo ai be mai emai abidadama Dirava dekenai.
5 Ai gwau lasi emai goada amo ai hegeregere inai gaukara ai karaia totona, to Dirava dainai ai hegeregere inai gaukara ai karaia.
6 Bona ia dainai ai hegeregere kontraka matamata ena hesiai taudia ai do ai lao. Unai be idia torea taravatu amo ia vara lasi, to lauma helaga amo ia vara, badina idia torea taravatu ia gwau ta do ia mase, to Dirava ena lauma ese ta dekenai mauri ia henia.
7 Ma danu, mase ia mailaia Taravatuna, nadi latanai idia torea gauna unai, be mai hairai bada ida ia mai dainai, Israela taudia be Mose ena vairana idia itaia diba lasi, badina iena vairana be ia diaridiari, to unai hairai be ia ore.
8 Unai dainai, lauma helaga ese ia henia hairaina ese unai hairai ia hereaia be namo, ani?
9 Badina bema mase ia mailaia Taravatuna be mai ena hairai, vadaeni kara maoromaoro ia havaraia gauna be mai ena hairai bada.
10 Oibe, guna ia hairai gauna ena hairai be idia kokia vadaeni, badina gabeai ia mai hairaina ese unai hairai ia hereaia.
11 Badina bema do idia kokia gauna be mai hairai ida ia mai, vadaeni do ia noho gauna ena hairai be bada herea!
12 Vadaeni ita be mai iseda helaro dainai, mai gari lasi ida ita hereva.
13 Bona ita be Mose bamona ita karaia lasi, ia ese dabua amo ena vairana ia koua, unai amo Israela taudia ese do ia ore gauna ena dokona idia itaia lasi.
14 To edia lalona be idia dibura. Badina ema bona hari kontraka gunana idia duahia negadia ibounai, unai dabua tamona be ia do noho, badina Keriso sibona amo unai dabua do ia hekoki.
15 Oibe, ema bona hari, Mose ena toretore idia duahia negadia ibounai, dabua ta ese edia kudouna ia koua.
16 To ta be Iehova dekenai ia giroa neganai, unai dabua ia hekoki.
17 Iehova be lauma.* Bona Iehova ena lauma helaga ia noho gabudia ibounai, ura kwalimu ia noho.
18 Bona ita ibounai iseda vairana be dabua ese ia koua lasi, bona hevarivari bamona Iehova ena hairai ita hahedinaraia, bona unai ese ita ia haidaua bona ita be iena toana hegeregerena, bona iseda hairai be ia bada ia lao noho. Iehova be lauma,* bona ia ese unai ia karaia.
