2 Korinto 4:1-18
4 Dirava ese ai ia hebogahisi henia bona inai hesiai gaukara be ai dekenai ia henia, unai dainai ai hesiku lasi,
2 to ai ese hemarai karadia, taunimanima ese hehuni ai idia karaia gaudia unai, ai dadaraia vadaeni, bona koikoi dalanai ai raka noho lasi bona Dirava ena hereva ai hagagevaia lasi. To hereva momokani ai gwauraia hedinarai karana amo, Dirava vairanai ai hahedinaraia, ai be haheitalai namona taunimanima* ibounai dekenai.
3 Bema ai harorolaia sivarai namona be ia hehuni,* unai be dika do idia davaria taudia amo ia hehuni,
4 bona inai nega oromana ena dirava ese unai taudia edia lalona ia hadiburaia, vadaeni Keriso, Dirava ena toana ia abia tauna, ena sivarai namona mai hairaina ena diari be idia dekenai ia hedinarai lasi.
5 Badina ai haroro neganai, ai be sibona ai herevalaia lasi, to ai herevalaia gauna be Keriso Iesu be Lohiabada, bona ai gwauraia hedinarai ai be emui igui hesiai taudia Iesu dainai.
6 Dirava be inai hereva ia gwauraia: “Dibura amo diari do ia hedinarai be namo,” bona Keriso ena vairana amo, Dirava ese ena diari be iseda kudouna dekenai ia hahedinaraia, unai diari ese Dirava ena diba hereadaena ia henia.
7 To ai dekenai inai dava bada gauna be hodu lalonai ia noho. Bona ia hedinarai goevagoeva, ai abia siahuna, taunimanima edia siahu ia hereaia gauna be Dirava amo ia mai, ai amo lasi.
8 Kahana ibounai amo metau idauidau ese ai idia koua noho, to ai idia koua momokani lasi, ai laloa daradara, to hanaia dalana ia noho.
9 Ai idia dagedage henia, to Dirava ese ai ia rakatania lasi, hisihisi idauidau ese ai idia hametaua, to ai idia hadikaia ore lasi.
10 Hanaihanai ai ese Iesu ia haheaukalaia dika hegeregerena ai haheaukalaia. Unai amo do ia hedinarai, ai be Iesu ena mauri dalana ai badinaia.
11 Iesu dainai ai mauri noho taudia be nega momo kahirakahira emai mauri ai haboioa, unai amo do ia hedinarai, ai be Iesu ena mauri dalana ai badinaia.
12 Unai dainai mase be aiemai lalona dekenai ia gaukara noho, to mauri be emui lalona dekenai ia gaukara noho.
13 Aiemai abidadama be tamona, Toretore Helagadia ena hereva bamona, ia gwau: “Abidadama lau hahedinaraia, unai dainai lau hereva,” ai danu be abidadama ai hahedinaraia, unai dainai ai hereva,
14 ai diba Iesu ia hatorea isi tauna ese ai danu be Iesu ida do ia hatorea isi bona Iesu vairanai ai bona umui do ia abia mai.
15 Unai ibounai be umui totona, vadaeni taunimanima momo ese Dirava idia tanikiu henia dainai, hebogahisi hereadaena do ia bada, bona unai amo Dirava be hanamoa do ia abia.
16 Unai dainai ai hesiku lasi, ena be aiemai tauanina be idia dika idia lao noho, to aiemai kudouna* be dina ibounai goada matamata idia abia noho.
17 Badina ena be ita abia hisihisi be nega sisina gauna bona ia metau lasi, to ita dekenai hairai hereadaena do ia mailaia, unai hairai be do ia noho hanaihanai.
18 Unai dainai iseda matana dekenai ita itaia gaudia ita raraia noho lasi, to ita itaia lasi gaudia ita raraia noho. Badina ita itaia gaudia be idia noho daudau lasi, to ita itaia lasi gaudia be idia noho hanaihanai.
