2 Korinto 6:1-18
6 Ai be Dirava ida ai gaukara hebou dainai, umui ai noia danu, Dirava ena hebogahisi hereadaena umui abia dae bona ena badina umui laloaboio lasi.
2 Ia gwau: “Lalonamo negana ai oi lau kamonai henia, bona hahemauri dinana ai oi lau durua.” Itaia! Harihari be lalonamo negana momokani. Itaia! Harihari be hahemauri dinana.
3 Dala ta dekenai ta ai hahekwakwanaia lasi, unai amo taunimanima ese emai hesiai gaukara do idia gwauraia dika lasi,
4 to dala ibounai lalonai ai hahedinaraia, ai be Dirava ena hesiai taudia. Hegeregere: Hahetoho idauidau ai haheaukalaia, hisihisi ai davaria, ai dabu, bona emai noho dalana ia auka,
5 ai idia dadabaia, dibura rumana dekenai ai idia atoa, heiriheiri idia vara, ai hekwarahi bada, hanuaboi momo ai mahuta lasi, nega haida ai aniani lasi,
6 kara goeva ai hahedinaraia, mai diba ida ai kara, ai boga-auka, hebogahisi ai hahedinaraia, lauma helaga ai abia, ia koikoi lasi lalokauna ai hahedinaraia,
7 hereva momokani ai gwauraia, Dirava ena siahu dekenai ai tabekau, kara maoromaoro ena tuari gaudia be emai imana idibana bona laurina dekenai,
8 haida ese ai idia hanamoa bona haida ese ai idia hahemaraia, haida ese ai idia gwauraia dika, bona haida ese ai idia gwauraia namo. Haida ese koikoi taudia bamona ai idia kara henia, to ai hereva momokani,
9 ma haida idia laloa taunimanima be ai idia diba lasi, to momo be ai idia diba, idia laloa ai mase be namo, to ai mauri noho, idia laloa ai idia matahakani henia, to unai ese ai ia hamasea lasi,
10 idia laloa ai lalohisihisi, to nega ibounai ai moale, idia laloa ai ogogami, to momo be taga taudia ai ai halaodia, idia laloa ai dekenai gau ta ia noho lasi, to ai dekenai gau ibounai idia noho.
11 Korinto tadikaka e, umui dekenai gau ibounai ai gwauraia hedinarai, gau ta ai hunia lasi, bona umui totona emai kudouna ai ia noho lalokauna ai habadaia.*
12 Ai ese emai lalokau umui totona ai hahedinaraia, to umui ese ai dekenai emui lalokau umui hahedinaraia lasi.
13 Unai dainai ai karaia bamona do umui karaia, umui be egu natudia bamona lau hereva henia, umui danu, emui lalokau umui habadaia.*
14 Abidadama lasi taudia ida do umui hakapua tamona lasi. Badina edena bamona kara maoromaoro bona kara dika idia turana diba? Eiava edena bamona diari bona dibura idia noho hebou diba?
15 Danu, Keriso bona Beliala* be edena bamona idia lalotamona diba? Eiava abidadama tauna bona abidadama lasi tauna be edena bamona idia gaukara hebou diba?
16 Dirava ena dubu helaga bona kaivakuku idauidau be edena bamona idia lalotamona diba? Badina ita be mauri Diravana ena dubu helaga, Dirava ia hereva bamona, ia gwau: “Lau be edia huanai do lau noho, bona edia huanai do lau raka. Bona lau be edia Dirava ai do lau lao, bona idia be egu bese taudia ai do idia lao.”
17 “Unai dainai Iehova ia gwau: ‘Umui ese idia do umui rakatania, bona idia amo do umui parara. Bona miro gauna do umui dogoatao lasi,’ ” “ ‘vadaeni lau ese umui do lau abia dae.’ ”
18 “Siahu Ibounai Diravana, Iehova, ia gwau: ‘Lau be emui tamana ai do lau lao, bona umui be egu natudia memero bona kekeni ai do umui lao.’ ”
