Apokalupo 10:1-11
10 Bona aneru goadana ma ta lau itaia, guba amo ia diho, ori be dabua bamona ia hahedokilaia, bona kevau be iena kwarana ataiai ia noho. Iena vairana be dina bamona, bona iena aena be du goadadia bamona, bona edia toana be lahi bamona.
2 Bona iena imana dekenai lokua toretore maragina ta ia noho, ia kehoa gauna. Bona iena aena idibana be davara dekenai ia atoa, to iena aena laurina be tanobada dekenai ia atoa,
3 bona ia boiboi badabada, laiona ena boiboi bamona. Bona ia boiboi neganai, guba boiboi 7 idia hereva.
4 Vadaeni guba boiboi 7 idia hereva neganai, lau hegaegae unai hereva lau torea totona, to guba amo gado ta lau kamonai, ia gwau: “Guba boiboi 7 idia gwauraia hereva do oi hunia, bona do oi toredia lasi.”
5 Bona guna lau itaia aneruna, davara bona tanobada dekenai ia gini aneruna unai, ese ena imana idibana be guba dekenai ia abia isi,
6 bona ia mauri noho ela bona hanaihanai Tauna ladanai ia gwauhamata. Oibe, unai Tauna ese guba bona ia lalonai idia noho gaudia, tanobada bona ia lalonai idia noho gaudia, bona davara bona ia lalonai idia noho gaudia ia havaraia, iena ladanai ia gwauhamata, ia gwau: “Naria negana be ia ore vadaeni.
7 To aneru namba 7 ese ena kibi ia hiriria gwauraia neganai, Dirava ena hunia hereva helagana do ia guguru momokani. Unai hunia herevana be Dirava ese iena igui hesiai taudia, oibe, iena peroveta taudia dekenai ia gwauraia sivarai namona.”
8 Vadaeni guba amo lau kamonai gadona be lau dekenai ia hereva lou, ia gwau: “Oi lao, davara bona tanobada dekenai ia gini aneru ena imana dekenai ia noho lokua toretore, ia kehoa gauna, oi abia.”
9 Bona unai aneru dekenai lau lao, bona ia lau hamaoroa lau dekenai unai lokua toretore maragina do ia henia. Bona lau dekenai ia gwau: “Oi abia bona oi ania, bona unai ese emu bogana do ia hahisia,* to emu uduna ai ena mamina be do ia namo, hani bamona.”
10 Vadaeni lau ese aneru ena imana amo lokua toretore maragina lau abia, bona lau ania ore, bona egu uduna ai ena mamina be ia namo, hani bamona, to lau ania ore neganai, egu bogana ia hisihisi.
11 Bona lau dekenai idia gwau: “Namona be kopina idauidau, bese idauidau, gado idauidau, bona king taudia momo dekenai oi peroveta lou.”
