Apokalupo 12:1-17
12 Vadaeni toa badana ta be guba dekenai ia hedinarai, hahine ta ese dina be dabua bamona ia hahedokilaia, hua be iena aena henunai ia noho, bona hisiu 12 be korona ta bamona, iena kwarana ai idia noho,
2 bona unai hahine be ia rogorogo. Bona do ia mara dainai ia boiboi bona hisihisi bada ia mamia.
3 Bona toa badana ma ta be guba dekenai ia hedinarai, unai be huala badana ta, kakakaka gauna, iena kwarana be 7, bona iena doana be 10, bona iena kwaradia latanai be korona 7,
4 bona iena iuna ese hisiu orea toi amo orea ta ia veria bona tanobada dekenai ia negea diho. Bona huala be ia mara gwauraia hahinena vairanai ia gini noho, unai hahine ia mara neganai, ia ese ena natuna do ia ania ore totona.
5 Bona hahine ese natuna ta, oibe, mero ta ia havaraia, ia ese auri itotohi amo bese ibounai do ia lohiaia. Bona unai natuna be Dirava bona ena terona dekenai idia abia lao haraga.
6 Bona unai hahine be tano gagaena dekenai ia heau lao, Dirava ese ia totona ia hegaegaelaia gabuna dekenai, unuseniai ia be dina 1,260 lalonai do idia ubua.
7 Vadaeni guba dekenai tuari ia vara. Mikaela mai ena aneru be huala ida idia tuari, bona huala mai ena aneru be idia ida idia tuari,
8 to idia* kwalimu lasi, bona guba dekenai idia totona gabu ta be lasi.
9 Unai dainai unai huala badana be idia negea diho, ia be unai idaunegai gaigaina, iena ladana be Diabolo bona Satani, ia be tanobada ibounai ia hakaua kerere noho. Oibe, ia be tanobada dekenai idia negea diho, bona iena aneru be ia ida idia negea diho.
10 Bona guba dekenai gado badana ta lau kamonai, ia gwau:
“Harihari iseda Dirava ese taunimanima dekenai hahemauri ia mailaia, iena siahu ia hedinarai, iena basileia be ia gini bona iena Keriso* ena lohia siahuna be ia matamaia vadaeni, badina iseda tadikaka ia samania tauna be idia negea diho vadaeni, ia ese iseda Dirava vairanai dina bona hanuaboi idia ia samania!
11 Bona Mamoe Natuna ena rarana dainai, bona idia harorolaia herevana dainai, idia ese ia idia hadarerea. Bona ena be idia mase diba, to edia mauri* idia laloa bada lasi.
12 Unai dainai guba bona guba ai umui noho taudia e, umui moale! Tanobada bona davara, madi o, badina Diabolo be umui dekenai ia diho mai vadaeni, bona ia badu dikadika, badina ia diba iena nega be ia kwadogi.”
13 Vadaeni huala ia itaia ia be tanobada dekenai idia negea diho neganai, unai natuna mero ia havaraia hahinena, ia dagedage henia.
14 To ugava badana ena apena rua be unai hahine dekenai idia henia, unai amo ia totona idia hegaegaelaia gabuna, tano gagaena dekenai ia roho lao diba, bona unuseniai ia be nega ta bona nega rua bona nega kahana ta lalonai do idia ubua. Bona ia be gaigai amo do ia noho daudau.
15 Vadaeni unai gaigai ese iena uduna amo ranu, sinavai bamona, be unai hahine murinai ia negea lao, hahine be sinavai lalonai ia maloa totona.
16 To tanobada ia mai hahine ia durua totona, bona tanobada ese iena uduna ia kehoa bona huala ese iena uduna amo ia negea sinavai ranuna ia hadonoa.
17 Bona huala ese unai hahine ia badu henia, vadaeni ia lao bona unai hahine ena garana oredia ia tuari henia. Unai taudia ese Dirava ena taravatu idia badinaia bona edia gaukara be Iesu idia gwauraia hedinarai.
