Apokalupo 15:1-8
15 Vadaeni lau itaia, guba ai toa badana bona namo hereana ma ta ia vara, unai be aneru 7 bona hisihisi 7. Idia be hisihisi oredia, badina idia amo Dirava ena badu be do ia ore momokani.
2 Bona davara ta lau itaia, ena toana be galasi bamona bona ia be lahi ida idia mikisi, bona dagedage animal bona ena laulau bona ena ladana ena namba idia hadarerea taudia lau itaia. Idia be unai galasi bamona davara badinai idia gini, bona Dirava ena gita* ta ta idia dogoatao.
3 Idia ese Dirava ena igui hesiai tauna Mose ena ane bona Mamoe Natuna ena ane idia abia, idia gwau:
“Iehova Dirava, Siahu Ibounai Diravana e, oiemu gaukara be bada bona namo herea. Noho hanaihanai King e, oiemu dala be idia maoromaoro bona idia momokani.
4 Iehova e, oi sibona be emu taunimanima oi rakatania lasi dainai, daika ese oi do ia gari henia lasi bona oiemu ladana do ia hanamoa lasi? Bese ibounai be do idia mai bona oi vairanai do idia tomadiho, badina emu taravatu maorodia be idia hedinarai vadaeni.”
5 Unai murinai lau itaia, guba ai palai rumana* ena helaga herea gabuna ia kehoa,
6 bona aneru 7 be hisihisi 7 ida helaga herea gabuna amo idia mai, idia hahedokilaia dabua be ia goeva bona ia diaridiari, bona golo dabua be edia kemena dekenai idia kwatua.
7 Bona mauri gaudia 4 amo, idia ta ese unai aneru 7 dekenai golo disi 7 ia henidia. Unai disi be noho hanaihanai Diravana ena badu amo idia honu.
8 Vadaeni Dirava ena hairai bona ena siahu dainai, helaga herea gabuna be kwalahu ese ia koua, bona ta be unai helaga herea gabuna lalonai ia vareai diba lasi ela bona unai aneru 7 edia hisihisi 7 idia ore.
