Apokalupo 16:1-21
16 Bona daiutu helagadia amo gado badana ta lau kamonai, aneru 7 dekenai ia gwau: “Umui lao, bona Dirava ena badu ena disi 7 be tanobada dekenai umui bubua.”
2 Bona aneru ginigunana ia lao bona ena disi be tanobada dekenai ia bubua. Vadaeni dagedage animal ena maka idia abia bona ena laulau idia tomadiho henia taudia be toto dikadia mai hisihisina idia abia.
3 Bona aneru iharuana ese ena disi be davara dekenai ia bubua. Vadaeni davara be mase tauna ena rara hegeregerena ai ia lao, bona mauri* gaudia ibounai idia mase, oibe, davara lalonai idia noho gaudia ibounai idia mase.
4 Bona aneru ihatoina ese ena disi be sinavai bona idia lohilohi ranu lalodiai ia bubua. Vadaeni idia be rara ai idia lao.
5 Bona ranu ia biagua aneruna ena gadona lau kamonai, ia gwau: “Dirava e, oi be harihari oi noho, gunaguna oi noho, oi be emu taunimanima oi rakatania lasi Tauna, bona oiemu kara be maoromaoro, unai dainai oi ese unai hahemaoro herevadia oi henia,
6 badina idia ese helaga taudia bona peroveta taudia edia rara idia bubua, bona oi ese idia dekenai rara oi henia, idia inua totona, idia dekenai unai ia vara be maoro.”
7 Bona lau kamonai pata helagana ia gwau: “Oibe, Iehova Dirava, Siahu Ibounai Diravana e, oiemu kota henia karadia be momokani bona maoromaoro.”
8 Bona aneru namba 4 ese ena disi be dina latanai ia bubua. Bona dina ese maoro ia abia taunimanima ia araia totona.
9 Vadaeni ena siahu bada ese taunimanima ia araia, to idia ese Dirava ena ladana idia hadikaia, ia dekenai unai hisihisi biagua siahuna ia noho, bona idia be idia helalo-kerehai lasi bona ia idia hanamoa lasi.
10 Bona aneru namba 5 ese ena disi be dagedage animal ena terona latanai ia bubua. Vadaeni ena basileia be ia dibura, bona edia hisihisi dainai edia malana idia koria matamaia,
11 to edia hisihisi bona edia toto dainai, guba Diravana ena ladana idia hadikaia bona edia kara amo idia helalo-kerehai lasi.
12 Bona aneru namba 6 ese ena disi be Euperate sinavai badana lalonai ia bubua, vadaeni ena ranu ia kaukau, unai ese dala ia hegaegaelaia dina daekau kahana amo king idia mai totona.
13 Bona lau itaia, lauma edia hereva mirodia toi, edia toana be paroparo bamona, idia be huala badana ena uduna amo, dagedage animal ena uduna amo, bona peroveta koikoi tauna ena uduna amo idia raka-lasi.
14 Unai hereva be demoni edia hereva bona hoa karadia idia karaia, bona idia be tanobada ibounai edia king taudia dekenai idia lao, vadaeni unai king ibounai idia haboua, Siahu Ibounai Diravana ena dina badana ena tuari totona.
15 “Lau be henaohenao tauna bamona do lau mai. Ia noga noho bona ena dabua ia hahedokilaia noho tauna be do ia moale. Dika kopina kavakava ia raka, bona taunimanima ese ia do idia itaia bena do ia hemarai garina.”
16 Bona idia ese unai king taudia be gabu ta dekenai idia haboua, Heberu gado ai, unai gabu ena ladana be Aramagedono.
17 Bona aneru namba 7 ese ena disi be hodahoda latanai ia bubua. Unai neganai helaga daiutudia lalonai terona amo gado badana ta ia hereva, ia gwau: “Ia ore vadaeni!”
18 Vadaeni kevaru, gado regedia, guba ena boiboi, bona tano mareremarere bada idia vara. Taunimanima be tanobada ai idia noho negana amo, unai bamona tano mareremarere ia vara lasi, oibe, ia be tano mareremarere bada herea momokani.
19 Bona unai taoni badana be kahana toi dekenai ia parara, bona bese idauidau edia taoni idia moru. Bona Dirava ese Babulonia Badana ia laloatao, ia dekenai ena badu siahuna ena wain kapusina ia henia totona.
20 Bona motumotu ibounai idia heau boio bona ororo idia davaridia lasi.
21 Bona medu badana, aisi nadi bamona idia diho. Unai nadi ta ta edia metau be kilogram 20* bamona, idia be guba amo taunimanima latanai idia moru. Vadaeni unai dika badana dainai, taunimanima ese Dirava ena ladana idia hadikaia, badina unai dika be bada herea momokani.
