Apokalupo 21:1-27
21 Bona guba matamata bona tanobada matamata lau itaia. Guba gunana bona tanobada gunana be idia boio vadaeni, bona davara danu be ia boio.
2 Bona taoni helagana lau itaia, Ierusalema Matamatana unai, guba amo ia diho mai, Dirava dekena amo. Ia be headava matamata kekenina bamona, sibona ia hahairaia bona do ia adavaia tauna totona ia hegaegae.
3 Vadaeni gado badana ta lau kamonai, terona amo ia mai, ia gwau: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho.
4 Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”
5 Bona terona latanai ia helai Tauna ia gwau: “Lau ese gau ibounai lau hamatamataia noho.” Danu, ia gwau: “Inai hereva oi torea, badina idia be taunimanima ese idia abia dae diba bona idia be momokani.”
6 Bona ia be lau dekenai ia gwau: “Unai hereva be idia guguru vadaeni! Lau be Alepa bona Omega,* matamana bona dokona. Ia ranu mase tauna dekenai ia lohilohi mauri ranuna do lau henia, davana lasi.
7 Ia kwalimu tauna ese unai gaudia do ia abia, bona lau be iena Dirava ai do lau lao, bona ia be egu natuna ai do ia lao.
8 To gari taudia, abidadama lasi taudia, goeva lasi bona kara bodagadia idia karaia taudia, ala-ala taudia, matabodaga taudia, meamea karadia idia karaia taudia, kaivakuku idia tomadiho henia taudia, bona koikoi taudia ibounai, edia davana be ia araia noho lahi bona salipa gohuna dekenai do idia lao. Unai ena anina be mase iharuana.”
9 Vadaeni aneru ta be lau dekenai ia mai. Ia be aneru 7 edia ta, guna idia ese disi 7 idia dogoatao, unai disi be hisihisi ginigabedia 7 amo idia honu, bona ia be lau ia hereva henia, ia gwau: “Oi mai, bona lau ese oi dekenai headava matamata hahinena do lau hahedinaraia, ia be Mamoe Natuna ena adavana.”
10 Vadaeni lauma helaga ena siahu amo, ia ese ororo badana ta dekenai lau ia abia lao. Bona ia ese lau dekenai taoni helagana, Ierusalema, ia hahedinaraia, unai taoni be guba amo ia diho mai, Dirava dekena amo,
11 bona Dirava ena hairai be ia dekenai ia noho. Ia be ia diaridiari, dava bada nadina bamona, iasipa nadina ena diaridiari bamona, bona ia be galasi bamona.
12 Unai taoni ena magu be ia bada bona ia lata bona ena iduara be 12. Unai iduara badinai aneru 12 idia gini bona unai iduara dekenai Israela ena iduhu 12 edia ladadia idia torea.
13 Unai magu ena ist kahanai iduara toi idia noho, ena not kahanai iduara toi idia noho, ena saut kahanai iduara toi idia noho, bona ena west kahanai iduara toi idia noho.
14 Unai taoni ena magu ena badina nadidia danu be 12, bona idia latanai be Mamoe Natuna ena aposetolo taudia 12 edia ladadia idia noho.
15 Vadaeni lau ia hereva henia aneruna be hahetohoa gauna ta, golo sirihona unai, ia dogoatao, unai taoni, ena iduara, bona ena magu ia hahetohoa totona.
16 Bona unai taoni ena kahana 4 edia bada be hegeregere, bona ena lata bona ena lababa be idia hegeregere. Vadaeni unai aneru ese siriho amo unai taoni ia hahetohoa, bona ia be kilomita* 2,220 bamona, ena lata, ena lababa, bona ena atai ena lata be idia hegeregere.
17 Danu, ena magu ena bada ia hahetohoa, bona ia be kiubit 144.* Unai aneru ese ia gaukaralaia hahetohoa gauna be taunimanima ese idia gaukaralaia hahetohoa gauna hegeregerena.
18 Bona Dirava ese magu be iasipa nadina amo ia karaia, bona unai taoni be golo goevana amo ia karaia, ia be galasi bamona.
19 Bona Dirava ese unai taoni ena badina nadi be dava bada nadi idauidau amo ia hahairaia. Unai badina nadi ginigunana be iasipa, iharuana be sapairo, ihatoina be kalakedo, namba 4 be samaragi,
20 namba 5 be sadonu, namba 6 be sadio, namba 7 be krusolito, namba 8 be berulo, namba 9 be topasio, namba 10 be krusoparaso, namba 11 be huakinto, namba 12 be ametuso.
21 Danu, iduara 12 be pel nadi 12, oibe, unai iduara ta ta be pel nadi amo idia karaia. Bona Dirava ese unai taoni ena dala badana be golo goevana amo ia karaia, ia be galasi bamona.
22 Bona unai taoni lalonai dubu helaga ta lau itaia lasi badina Iehova Dirava, Siahu Ibounai Diravana unai, be unai taoni ena dubu helaga bona Mamoe Natuna danu be unai taoni ena dubu helaga.
23 Bona dina bona hua ese unai taoni idia hadiaria be anina lasi, badina Dirava ena hairai ese unai taoni ia hadiaria bona ena lamepa be Mamoe Natuna.
24 Bona bese ibounai be ena diari lalonai do idia raka, bona tanobada ena king taudia ese edia hairai be ia lalonai do idia abia vareai.
25 Bona dina ai ena iduara do idia koua lasi, badina unuseniai hanuaboi be lasi.
26 Bona bese ibounai edia hairai bona hanamoa be ia lalonai do idia abia vareai.
27 To miro gauna ta bona gau dika rohorohona ia karaia tauna bona koikoi tauna be unai taoni lalonai do idia vareai diba lasi, to Mamoe Natuna ena mauri bukana lalonai edia ladana idia noho taudia sibona be do idia vareai.
