Apokalupo 9:1-21
9 Bona aneru namba 5 ese iena kibi ia hiriria. Bona lau ese guba amo tanobada dekenai guna ia moru hisiuna lau itaia, bona Dirava ese ia dekenai guri dobu masemase ena ki ia henia.
2 Bona ia ese unai guri dobu masemase ia kehoa, bona kwalahu be unai guri amo ia daekau, lahi badana ena kwalahu bamona. Bona unai guri amo ia daekau kwalahuna ese dina bona hodahoda ia hadiburaia.
3 Vadaeni unai kwalahu amo kwadi idia raka-lasi bona tanobada dekenai idia mai. Bona Dirava ese idia dekenai ia henia siahuna be tanobada ena doadoa ese idia abia siahuna hegeregerena.
4 Bona idia be oda idia abia tanobada ena tubutubu gaudia, eiava rei bona au do idia hadikaia lasi, to edia baguna ai Dirava ena maka idia abia lasi taudia sibona do idia hadikaia.
5 Bona kwadi ese maoro idia abia unai taudia do idia hamasea lasi, to hua 5 lalonai do idia hahisia bada, bona edia hisihisi be doadoa ese tau ta ia hahisia hisihisina bamona.
6 Bona unai negadia ai, unai taudia ese mase do idia tahua, to do idia davaria lasi momokani, bona do idia ura idia mase, to mase be idia amo do ia heau siri.
7 Bona unai kwadi edia toana be tuari totona idia hegaegae hosi edia toana bamona, bona edia kwarana ai, toana be golo bamona korona idia noho, bona edia vairana be taunimanima edia vairana bamona,
8 to edia huina be hahine edia huina bamona. Bona edia isena be laiona edia isena bamona,
9 bona edia kemena ai ia noho kesina be auri kesina bamona. Bona edia apena edia regena be hosi ese idia veria kariota edia regena bamona, idia be tuari totona idia heau lao.
10 Danu idia be mai edia iuna bona mai edia gwadaia gaudia, doadoa bamona. Bona edia iuna ai siahu ia noho, hua 5 lalonai taunimanima idia hahisia totona.
11 Idia be mai edia king, ia be guri dobu masemase ena aneru. Heberu ai iena ladana be Abadoni,* to Grik ai iena ladana be Apoliona.*
12 Dika ta ia ore vadaeni. Inai gaudia murinai ma dika rua do idia mai.
13 Vadaeni aneru namba 6 ese iena kibi ia hiriria. Bona Dirava vairanai ia noho golo pata helagana ena kona* 4 amo gado ta lau kamonai,
14 ia ese kibi ia dogoatao aneru namba 6 dekenai ia gwau: “Euperate sinavai badana dekenai idia guia noho aneru 4 oi ruhaia.”
15 Vadaeni unai aneru 4 idia ruhaia, bona idia noho hegaegae, unai hora, unai dina, unai hua, bona unai lagani ai, tanobada taudia edia orea toi amo orea ta do idia alaia mase totona.
16 Hosi guia tuari taudia edia namba be 200 milioni. Lau ese edia namba lau kamonai.
17 Bona matahanai lalonai hosi bona hosi guia taudia be inai dala amo lau itadia. Unai taudia edia kemena ai ia noho kesina ena kala be kakakaka, lahi bamona, bona bulu, bona yelo, salipa bamona. Bona hosi edia kwarana be laiona edia kwarana bamona, bona edia uduna amo, lahi bona kwalahu bona salipa idia raka-lasi.
18 Unai hisihisi toi amo, tanobada taudia edia orea toi amo orea ta ia hamasea. Oibe, unai hosi edia uduna amo idia raka-lasi lahi, kwalahu, bona salipa amo idia mase.
19 Hosi edia siahu be edia uduna bona edia iuna dekenai. Edia iuna be gaigai bamona, mai edia kwarana bona unai amo taunimanima idia hahisia.
20 To tanobada taudia oredia, inai hisihisi ese ia hamasea lasi taudia unai, be edia imana amo idia karaia gaudia amo idia helalo-kerehai lasi, to idia ese demoni bona kaivakuku idia tomadiho henia noho. Unai kaivakuku be golo, siliva, kopa, nadi, bona au amo idia karaia, idia be gau ta idia itaia diba lasi, idia kamonai diba lasi, bona idia raka diba lasi.
21 Bona unai taudia be edia ala-ala karadia, edia meamea karadia, edia matabodaga karadia, bona edia henaohenao karadia amo idia helalo-kerehai lasi.
