Aposetolo edia Kara 13:1-52
13 Antioka ena kongrigeisen ai, peroveta taudia bona hadibaia taudia idia noho. Idia be Banaba, Simeona, ena ladana ma ta be Nigera, Kurene tauna Lukio, bona distrik naria tauna Heroda ida ia sikuli hebou tauna Manaena, bona Saulo.
2 Idia be Iehova idia hesiai henia bona idia anivaga noho lalonai, lauma helaga ia gwau: “Banaba bona Saulo umui abia hidi, lau gwauraia gaukarana idia karaia totona.”
3 Vadaeni idia anivaga, idia guriguri bona edia imana be Banaba bona Saulo latanai idia atoa, bena idia siaidia lao.
4 Bona unai taudia, lauma helaga ese ia siaia taudia unai, be Seleukia dekenai idia diho bona unuseniai bouti amo Kupro dekenai idia lao.
5 Salami dekenai idia ginidae neganai, Iuda taudia edia sinagoga lalodiai Dirava ena hereva idia harorolaia matamaia. Ioane danu be idia ida ia lao bona idia ia durua.
6 Kupro motumotu ena gabu ibounai dekenai idia loaloa ela bona Papo dekenai, unuseniai Iuda tauna ta idia davaria, iena ladana be Bariesu. Ia be meamea tauna bona peroveta koikoi tauna.
7 Ia be Seregio Paulo ida ia noho. Seregio Paulo be provinsi ena gavana bona aonega tauna. Bona ia ese Banaba bona Saulo ia boiria, badina ia ura bada Dirava ena hereva ia kamonai.
8 To meamea tauna Eluma ese idia ia inai henia matamaia, provinsi ena gavana ia koua toho Lohiabada ia abidadama henia lasi totona. (Inai ladana Eluma ena anina be meamea tauna.)
9 Saulo, ena ladana ma ta Paulo, be lauma helaga amo ia honu bona unai tauna ia itaia auka,
10 bona ia gwau: “Koikoi bona dika idauidau karaia tauna e, oi be Diabolo ena natuna, bona kara maoromaoro oi inai henia. Iehova ena dala maorodia hagagevaia karana be edena negai do oi hadokoa?
11 Iehova ena imana be oi latanai bona do oi matakepulu, nega sisina lalonai dina ena diari do oi itaia lasi.” Bena maoromaoro kwalahu bamona gauna ese ena matana ia koua bona ena matana idia dibura. Vadaeni ia lao bona taunimanima ia tahua idia ese imana amo ia idia hakaua totona.
12 Bena provinsi ena gavana be unai gauna ia itaia neganai, ia be abidadama tauna ai ia lao, badina Iehova ena hadibaia hereva dekenai ia hoa.
13 Paulo bona ia idia bamoa tatau be Papo idia rakatania bona bouti amo Perega dekenai idia lao. Perega be Pamupulia tanona ai ia noho. To Ioane be idia ia rakatania bona Ierusalema dekenai ia giroa.
14 To idia be Perega idia rakatania bona Antioka dekenai idia mai, Antioka be Pisidia tanona ai ia noho. Bona Sabati dinana ai, sinagoga lalonai idia vareai bona idia helai.
15 Taravatu bona Peroveta Taudia edia toretore* idia duahia murinai, sinagoga ena ofesa taudia ese idia dekenai hereva idia siaia, idia gwau: “Tadikaka e, bema umui ura taunimanima umui hagoadaia, umui hereva diba.”
16 Unai dainai Paulo ia toreisi bona ena imana ia abia isi, ia gwau:
“Israela taudia bona Dirava gari henia taudia e, kamonai.
17 Inai Israela taudia edia Dirava ese iseda sene taudia ia abia hidi, bona idau taudia bamona Aigupito tanona ai idia noho neganai, idia ia abia isi bona mai ena siahu bada ida* ia hakaudia raka-lasi.
18 Bona lagani 40 bamona lalonai, tano gagaena ai edia kara ia haheaukalaia.
19 Bona Kanana tanona ai bese 7 ia hadikaia ore murinai, Israela taudia dekenai edia tano ia haria.
20 Unai ibounai be lagani 450 bamona lalonai idia vara.
“Unai murinai, idia dekenai hahemaoro taudia ia henia ela bona peroveta tauna Samuela ena nega.
21 To unai nega amo king ta abia totona idia hereva goadagoada, bona Dirava ese idia dekenai Kisi ena natuna, Saulo, ia henia. Ia be Beniamina ena iduhu tauna, bona lagani 40 lalonai ia lohia.
22 Dirava ese Saulo ia kokia murinai, Davida be edia king ai ia halaoa. Dirava ese Davida ia herevalaia, ia gwau, ‘Lau itaia Iese ena natuna Davida, be egu lalohadai* hegeregerena gau ibounai ia karaia. Unai dainai ia ese egu ura gaudia ibounai do ia karaia.’
23 Dirava ena gwauhamata hegeregerena, inai tauna ena bese amo ia ese Israela taudia dekenai hahemauri tauna, Iesu ia henia.
24 Ia do mai lasi neganai Ioane ia mai guna, bona ia be Israela taudia ibounai dekenai ia haroro, bapatiso do idia abia totona, unai amo edia helalo-kerehai toana idia hahedinaraia.
25 To Ioane be ena haroro gaukara ia karaia noho lalonai, ia gwau, ‘Umui laloa lau be daika? Lau be umui laloa tauna lasi. To ta be egu murinai ia mai noho bona lau hegeregere lasi ena tamaka varona lau kokia totona.’
26 “Umui tadikaka, Aberahamo ena bese taudia bona Dirava gari henia taudia ma haida e, Dirava ese ita dekenai unai hahemauri herevana ia siaia.
27 Ierusalema ai idia noho taudia bona edia tomadiho gunalaia taudia* be unai Tauna idia diba lasi. To ia idia hahemaoro henia neganai, idia ese peroveta taudia ese idia gwauraia herevadia idia hagugurua, unai hereva be Sabati ibounai lalonai idia duahia badabada.
28 Bena ena be ia idia hamasea ena badina ta idia davaria lasi, to Pilato idia noia ia idia hamasea totona.
29 Ia idia sivarailaia toretoredia ibounai idia hagugurua neganai, au amo ia idia abia diho bona guria gabuna* dekenai idia atoa.
30 To Dirava ese mase amo ia hatorea isi lou.
31 Bona dina momo lalonai haida dekenai ia hedinarai. Idia be ia ida Galilea amo Ierusalema dekenai idia daekau taudia. Unai taudia ese taunimanima dekenai ia idia gwauraia hedinarai.
32 “Unai dainai sene taudia ese idia abia gwauhamata ena sivarai namona be umui dekenai ai harorolaia.
33 Dirava ese Iesu ia hatorea isi lou neganai, ia ese ita, edia natudia, dekenai unai gwauhamata ia hagugurua, salamo iharuana dekenai idia torea bamona, ‘Oi be egu natuna, hari dina lau be emu Tamana ai lau lao.’
34 Dirava ese ia be mase amo ia hatorea isi, bona ena tauanina be do ia bodaga lou lasi. Dirava be inai bamona ia gwau, ‘Lau ese Davida dekenai lau gwauhamatalaia hebogahisi hereadaena, be umui dekenai do lau hahedinaraia noho.’
35 Unai dainai salamo ma ta dekenai ia gwau, ‘Oi ia abidadama henia tauna be do oi rakatania lasi ia bodaga totona.’
36 To Davida be ena nega ai Dirava ia hesiai henia, bona mase dekenai ia mahuta bona ena sene taudia ida idia guria, bena ena tauanina ia bodaga.
37 To Dirava ese ia hatorea isi vadaeni tauna ena tauanina be ia bodaga lasi.
38 “Tadikaka e, namona be umui diba, unai Tauna amo Dirava ese emui kara dika do ia gwauatao, unai be umui dekenai ai gwauraia noho,
39 bona ia idia abidadama henia taudia be Dirava ese ia gwauraidia kerere lasi. To Mose ena taravatu be ia hegeregere lasi emui kerere ia kokia totona.
40 Unai dainai umui naria namonamo, namo lasi peroveta taudia ese idia gwauraia gaudia be umui dekenai idia vara.
41 ‘Hemataurai lasi taudia e, inai umui itaia, umui hoa bona lau vairana amo do umui boio, badina emui nega ai lau be gaukara ta lau karaia noho, to unai gaukara do umui abia dae lasi, ena be ta ese umui dekenai ia gwauraia hedinarai namonamo.’ ”
42 Vadaeni Paulo bona Banaba be sinagoga amo idia raka-lasi neganai, taunimanima ese idia noidia, murina Sabati ai unai gaudia do idia herevalaia lou.
43 Bena sinagoga ena hebou ia ore murinai, Iuda taudia bona Iuda tomadihona idia abia dae taudia momo, Dirava idia tomadiho henia taudia unai, be Paulo bona Banaba idia badinaia. Idia ese unai taudia idia hagoadaia, Dirava ena hebogahisi hereadaena ena dala do idia badinaia noho.
44 Murina Sabati ai, kahirakahira taoni taudia ibounai idia hebou, Iehova ena hereva idia kamonai totona.
45 Iuda taudia ese hutuma idia itaia neganai, idia mama bona hadikaia herevadia amo, Paulo ena hereva idia gorea.
46 Bena Paulo bona Banaba be mai gari lasi ida idia hereva idia dekenai, idia gwau: “Dirava ena hereva be umui dekenai ai gwauraia guna be namo. To unai hereva umui dadaraia bona umui laloa umui hegeregere lasi mauri hanaihanai umui abia totona, vadaeni idau bese taudia dekenai do ai lao.
47 Momokani, Iehova ese ai dekenai inai hahegani ia henia, ia gwau, ‘Lau ese oi lau abia hidi bese idauidau edia diari ai oi lao, bona taunimanima lau hamauria dalana be tanobada ibounai dekenai oi harorolaia totona.’ ”
48 Idau bese taudia ese unai hereva idia kamonai neganai, idia moale bona Iehova ena hereva idia abia isi, bona mauri hanaihanai idia ura kudou-maoro taudia ibounai be abidadama taudia ai idia lao.
49 Danu, Iehova ena hereva be unai tano ena gabu ibounai dekenai idia abia lao.
50 To Iuda taudia ese Dirava idia tomadiho henia hahinedia, idia be ladana bada hahinedia, bona taoni ena tau badadia edia lalona idia ania, bena Paulo bona Banaba idia dagedage henia bona taoni murimurinai idia negedia.
51 Vadaeni Banaba bona Paulo ese edia aena ena kahu idia dahua oho, unai be toa ta idia ia hadibaia totona. Bena Ikonio dekenai idia lao.
52 Bona hahediba taudia be moale bona lauma helaga amo idia honu.
