Aposetolo edia Kara 16:1-40
16 Vadaeni Paulo be Derebe dekenai ia lao bona Lusitera dekenai danu. Unuseniai hahediba tauna ta ladana Timoteo ia noho. Ia be abidadama Iuda hahinena ena natuna, to ena tamana be Grik tauna.
2 Lusitera bona Ikonio ai idia noho tadikaka be Timoteo idia herevalaia, idia gwau ia be tau namona.
3 Paulo ia ura Timoteo be ia do ia bamoa. Vadaeni unai gabudia ai idia noho Iuda taudia dainai ena kopina ia utua, badina idia ibounai idia diba, iena tamana be Grik tauna.
4 Taoni idauidau dekenai idia lao neganai, unai gabu taudia dekenai taravatu idia henidia idia badinaia totona. Unai taravatu be Ierusalema ai idia noho aposetolo taudia bona tau badadia ese idia abia hidi gaudia.
5 Unai dainai kongrigeisen taudia edia abidadama ia goada ia lao bona dina ta ta ai edia namba ia bada daekau.
6 Danu, idia be Perigia bona Galatia tanona huana amo idia lao, badina lauma helaga ese idia ia koua Asia provinsi dekenai sivarai namona do idia gwauraia lasi.
7 Bona Musia dekenai idia diho lao neganai, dala idia tahua Bitunia dekenai do idia lao, to Iesu ese lauma helaga amo idia ia koua.
8 Vadaeni Musia idia hanaia bona Troa dekenai idia diho mai.
9 Bona hanuaboi ai Paulo ia matahanai, ia itaia Makedonia tauna ta be unuseniai ia gini, Paulo ia noia, ia gwau: “Makedonia dekenai oi mai bona ai oi durua.”
10 Unai matahanai ia itaia murinai, dala ai karaia Makedonia dekenai do ai lao totona, badina ai laloa Dirava ese ai ia boiria idia dekenai sivarai namona do ai harorolaia.
11 Unai dainai bouti ai guia bona Troa amo maoromaoro ai heau lao Samotrake dekenai, to murina dinana ai Neapoli dekenai ai lao.
12 Bona unuseni amo Filipi dekenai ai lao. Filipi be Roma ese ia naria taoni bona ia be Makedonia provinsi ena taoni badana. Unai taoni dekenai dina haida ai noho.
13 Sabati dinana ai, taoni ena geiti amo ai raka-lasi bona sinavai dekenai ai lao. Ai laloa unuseniai guriguri gabuna ta ia noho, vadaeni ai helai bona unuseniai idia haboua hahine ai hereva henidia matamaia.
14 Bona pepol dabua ia hoihoilaia* hahinena ta ladana Lidia ia noho, ia be Tuatira taoni amo. Ia be Dirava tomadiho henia hahinena bona ai ia kamonai henia noho. Vadaeni Iehova ese ena lalona* ia kehoa bona Paulo ia gwauraia herevadia ia abia dae.
15 Ia bona ena ruma taudia idia bapatiso neganai, ia noinoi, ia gwau: “Bema umui laloa lau be Iehova lau abidadama henia, umui mai bona egu ruma ai umui noho.” Ia ura bada dainai ai lao.
16 Vadaeni guriguri gabuna ai lao henia noho lalonai, hesiai kekenina ta be ai ia hedavari henia. Ia be demoni ta ese ia biagua dainai, vaira negana ia gwauraia diba. Ena biagudia be iena gaukara amo moni momo idia abia.
17 Unai kekeni be Paulo bona ai murinai ia raka noho bona ia boiboi, ia gwau: “Inai tatau be Atai Momokani Diravana ena igui hesiai taudia bona umui dekenai hahemauri dalana idia harorolaia noho.”
18 Dina momo lalonai unai bamona ia karaia noho. Dokonai, Paulo be unai ia hesikulaia bena ia giroa bona lauma dikana dekenai ia gwau: “Iesu Keriso ena ladanai oi lau oda henia, kekeni amo oi raka-lasi.” Bena maoromaoro ia raka-lasi.
19 Vadaeni ena biagudia idia itaia edia moni abia dalana ia ore neganai, Paulo bona Sila idia dogoatao bona lohia taudia dekenai idia veridia lao, idia be maketi* gabuna dekenai idia noho.
20 Bona majistret taudia dekenai idia hakaudia lao, idia gwau: “Inai tatau ese emai taoni ena mauri idia hadikaia noho. Idia be Iuda taudia,
21 bona idia harorolaia kastom karadia ai abia dae eiava badinaia be maoro lasi, badina ai be Roma taudia.”
22 Vadaeni hutuma idia toreisi bona mai badu ida idia hereva henidia, bona majistret taudia ese Paulo bona Sila edia atai dabua idia darea oho murinai, oda idia henia au amo idia dadabadia totona.
23 Vadaeni idia dadabadia murinai, dibura ruma ai idia atodia, bena dibura ruma naria tauna idia oda henia do ia gimadia namonamo totona.
24 Unai oda ia abia dainai, dibura ruma ena lalona momokani daiutuna lalonai idia ia atoa bona edia aena be au metaudia rua huanai ia koudia.
25 To hanuaboi momokani ai, Paulo bona Sila idia guriguri bona Dirava hanamoa anedia idia abia bona dibura taudia be idia kamonai noho.
26 Bena karaharaga tano mareremarere bada ia vara bona dibura ruma ena badina idia marere. Danu, maoromaoro dibura ruma ena iduara ibounai idia kehoa bona dibura taudia ibounai edia seini idia makohi.
27 Dibura naria tauna be ia noga bona ia itaia dibura ruma ena iduara ibounai idia kehoa neganai, ena tuari kaia ia abia bona ia ura sibona ia alaia mase, badina ia laloa dibura taudia ibounai idia heau boio vadaeni.
28 To Paulo be ia boiboi badabada, ia gwau: “Oi sibona oi hadikaia lasi, ai ibounai ai noho!”
29 Bena diari gauna ta totona ia noinoi bena ia heau vareai, mai gari bona heudeheude danu Paulo bona Sila vairanai ia tui diho.
30 Vadaeni idia ia hakaua raka-lasi bona ia gwau: “Tau badadia e, dahaka lau karaia be namo hahemauri lau abia totona?”
31 Idia gwau: “Lohiabada Iesu oi abidadama henia bena oi bona emu ruma taudia be hahemauri do umui abia.”
32 Vadaeni Iehova ena hereva be ia bona ena ruma dekenai idia noho taudia ibounai dekenai idia gwauraia.
33 Bona unai hanuaboi horana ai idia ia abia lao, edia bero ia huria. Bona ia bona ena ruma taudia ibounai be maoromaoro bapatiso idia abia.
34 Ia ese ena ruma dekenai ia abidia vareai bona aniani ia henidia, bona ia bona ena ruma taudia idia moale bada, badina ia be Dirava ia abidadama henia.
35 Daba ia rere neganai, majistret taudia ese gadi* taudia idia siaia bona idia hamaorodia do idia gwau: “Unai tatau do umui ruhaia.”
36 Vadaeni dibura naria tauna ese edia hereva be Paulo dekenai ia gwauraia: “Tatau haida be majistret taudia amo umui ruhaia herevana idia mailaia. Unai dainai umui raka-lasi bona mai maino ida umui lao.”
37 To Paulo be idia dekenai ia gwau: “Ai be kota vairanai ai gini lasi, to taunimanima vairanai ai idia dadabaia bona dibura ruma lalonai ai idia atoa, ena be ai be Roma taudia. Bona hari idia ura hehuni dalanai ai idia ruhaia, a? Lasi momokani! Namona be idia sibodia idia mai bona ai idia hakaua raka-lasi.”
38 Vadaeni gadi* taudia ese unai hereva be majistret taudia dekenai idia gwauraia. Majistret taudia idia kamonai idia be Roma taudia neganai, idia gari dikadika.
39 Vadaeni idia mai bona Paulo bona Sila dekenai edia noinoi idia gwauraia bona murimuri dekenai idia hakaudia mai, bena idia noidia taoni do idia rakatania.
40 Idia be dibura ruma amo idia raka-lasi neganai, Lidia ena ruma dekenai idia lao, bona tadikaka idia itaia bona idia hagoadaia murinai, idia lao.
