Aposetolo edia Kara 23:1-35
23 Paulo ese Sanhedrin* taudia ia itaia bona ia gwau: “Tadikaka e, lau be mai lalomamina goevana ida Dirava vairanai lau noho ema bona hari.”
2 Unai neganai, hahelaga tauna badana Anania ese Paulo badinai idia gini taudia ia haganidia, Paulo ena uduna idia botaia totona.
3 Bena Paulo be ia dekenai ia gwau: “Oi be idia penia kurokuro magu bamona, Dirava ese oi do ia botaia. Oi be iniseniai oi helai bona Taravatu hegeregerena lau oi hahemaoro henia, to ma oi ese Taravatu oi utua, bona hahegani oi henia lau idia botaia totona, a?”
4 Ia badinai idia gini taudia idia gwau: “Dirava ena hahelaga tauna badana oi hereva dika henia, a?”
5 Bona Paulo ia gwau: “Tadikaka e, lau diba lasi ia be hahelaga tauna badana. Toretore Helagadia ia gwau, ‘Emu taunimanima ia lohiaia tauna do oi hereva dika henia lasi.’ ”
6 Vadaeni Paulo ia itaia Sanhedrin ena kahana ta be Sadukea* taudia bona kahana ma ta be Farisea taudia neganai, idia dekenai ia boiboi, ia gwau: “Tadikaka e, lau be Farisea tauna, bona Farisea taudia edia natuna. Mase taudia do idia toreisi lou helarona dainai, lau idia hahemaoro henia.”
7 Unai hereva ia gwauraia dainai, Farisea taudia bona Sadukea taudia idia hepapahuahu bona hutuma idia parara.
8 Badina Sadukea taudia idia gwau toreisi lou, aneru, bona lauma taudia be lasi, to Farisea taudia be unai gaudia ibounai idia abia dae.
9 Unai dainai idia boiboi badabada, bona Farisea taudia edia taravatu hadibaia taudia haida idia toreisi bona mai badu ida idia hereva, idia gwau: “Inai tauna dekenai kerere ta ai davaria lasi. To bema lauma tauna eiava aneru ta ese ia hereva henia, vadaeni. . . . ”
10 Bona hepapahuahu ia bada neganai, tuari biaguna be ia gari, idia ese Paulo idia veria lao veria mai bona idia darea garina. Bona ia ese tuari oreana ia hagania do idia diho bona taunimanima edia huana amo Paulo do idia abia siri, bona tuari taudia edia ruma dekenai do idia hakaua mai.
11 To unai hanuaboi ai, Lohiabada be ia badinai ia gini bona ia gwau: “Oi gari lasi! Ierusalema ai lau oi gwauraia hedinarai hegeregerena, namona be Roma dekenai danu lau oi gwauraia hedinarai.”
12 Daba ia rere neganai, Iuda taudia idia hereva hebou, bona gwauhamata metauna* idia karaia, idia gwau, do idia aniani bona inuinu lasi ela bona Paulo idia alaia mase.
13 Tatau 40 bona ma haida ese unai gwauhamata metauna idia karaia hebou.
14 Bona idia be dubu biagudia bona tau badadia dekenai idia lao bona idia gwau: “Ai be gwauhamata metauna ai karaia vadaeni, do ai aniani lasi ela bona Paulo ai alaia mase.
15 Vadaeni, umui bona Sanhedrin taudia be tuari biaguna umui hadibaia be namo, dahaka dainai Paulo be umui dekenai do idia hakaua diho, toana be umui ura ia dekenai ia vara gauna umui dibaia namonamo. To do ai noho hegaegae, bona ia be umui dekenai ia do mai lasi neganai, ia do ai alaia mase.”
16 To Paulo ena taihuna ena natuna mero be do idia karaia gauna ena palani ia kamonai, vadaeni tuari taudia edia ruma dekenai ia mai bona unai gaudia be Paulo dekenai ia gwauraia.
17 Unai dainai Paulo ese ami ofesa* ta ia boiria bona ia gwau: “Inai tau matamata be tuari biaguna dekenai oi hakaua lao, badina ia ura ia dekenai hereva ta ia gwauraia.”
18 Vadaeni ami ofesa ese unai tau matamata be tuari biaguna dekenai ia hakaua lao bona ia gwau: “Dibura tauna Paulo ese lau ia boiria bona ia noia inai tau matamata be oi dekenai do lau hakaua mai, badina ia ura oi dekenai hereva ta ia gwauraia.”
19 Tuari biaguna ese unai tau matamata ena imana ia abia bona ia hakaua siri bona hehuni ai ia nanadaia: “Oi ura lau dekenai dahaka oi gwauraia?”
20 Ia gwau: “Iuda taudia idia lalotamona oi do idia noia, kerukeru dina ai Paulo be Sanhedrin dekenai do oi hakaua diho, toana be idia ura iena sivarai ma haida idia dibaia.
21 To namo lasi idia ese emu lalona idia veria, badina edia tatau 40 bona ma haida be Paulo totona idia naria noho. Bona gwauhamata idia karaia do idia aniani bona inuinu lasi ela bona ia idia alaia mase. Bona hari idia naria noho edia noinoi oi abia dae totona.”
22 Vadaeni tuari biaguna ese tau matamata ia oda henia, ia gwau: “Tau ta oi hamaoroa lasi lau dekenai inai gaudia oi gwauraia.” Unai murinai, unai tau matamata ia siaia lao.
23 Bona ami ofesa rua ia boiria bona idia dekenai ia gwau: “Tuari taudia 200, hosi guia taudia 70, bona io idia dogoatao taudia 200 umui abia hegaegae bona hanuaboi 9 oklok* ai Kaisarea dekenai do umui lao.
24 Danu, hosi haida umui abia Paulo ia guia totona, bona ia umui hakaua lao namonamo gavana tauna Feliki dekenai.”
25 Bona ia torea revarevana be inai bamona:
26 “Lau Klaudio Lusia ese oi, egu lohia, Gavana Feliki dekenai inai revareva lau torea: Namo!
27 Inai tauna be Iuda taudia ese idia dogoatao bona idia ura ia idia alaia mase, to lau kamonai ia be Roma tauna dainai, tuari oreana ida lau mai haraga bona ia lau hamauria.
28 Bona ia idia samania ena badina lau ura diba dainai, edia Sanhedrin dekenai ia lau hakaua diho.
29 Lau itaia edia Taravatu ena hereva haida dainai ia idia samania, to badina ta lau davaria lasi ia lau hamasea eiava hadiburaia totona.
30 To inai tauna hamasea totona idia karaia palani be ta ese lau dekenai ia gwauraia dainai, harihari ia be oi dekenai lau siaia. Bona ia idia samania taudia lau hagania, oi vairanai ena kerere do idia gwauraia hedinarai.”
31 Unai dainai, tuari taudia be idia abia oda hegeregerena, hanuaboi ai Paulo be Anetipatiri dekenai idia abia lao.
32 Murina dinana ai, idia be tuari taudia edia ruma dekenai idia giroa lou, to idia ese hosi guia taudia dekenai maoro idia henia Paulo ida idia lao totona.
33 Hosi guia taudia be Kaisarea dekenai idia ginidae, bona gavana dekenai revareva idia henia bona Paulo danu be ia dekenai idia hakaua mai.
34 Vadaeni revareva ia duahia bona Paulo ia nanadaia ia be edena provinsi amo, bona ia davaria ia be Kilikia amo.
35 Vadaeni gavana ia gwau: “Oi idia samania taudia danu idia ginidae neganai, oiemu sivarai ibounai do lau kamonai.” Bona oda ia henia Paulo be Heroda ena pavapava rumana ai do idia gimaia.
