Aposetolo edia Kara 28:1-31
28 Bona ai be kone dekenai ai ginidae murinai, ai davaria unai motumotu ena ladana be Melita.
2 Bona idau gado herevalaia taudia be ai dekenai hebogahisi bada idia hahedinaraia. Idia ese lahi idia karaia bona ai ibounai idia durua, badina medu ia diho bona gabu ia keru.
3 To Paulo be au ia gogoa bona lahi dekenai ia atoa neganai, lahi ena siahu dainai gaigai ta ia raka-lasi bona Paulo ena imana ia koria.
4 Idau gado herevalaia taudia idia itaia unai gaigai be Paulo ena imana dekenai ia tauadae neganai, ta ta dekenai idia gwau: “Momokani inai tauna be ala-ala tauna, ena be davara amo ia mai neganai dika ta ia davaria lasi, to inai be iena panisi maorona, do ia mauri lasi.”
5 To Paulo ese ena imana ia hamarerea bena unai poisini gaigai be lahi lalonai ia moru bona Paulo be dika ta ia davaria lasi.
6 To idia laloa iena imana do ia gudu eiava maoromaoro do ia moru bona do ia mase. Nega daudau idia naria bona idia itaia gau ta ia vara lasi neganai, edia lalona idia haidaua bona idia gwau ia be dirava ta.
7 Unai motumotu ai dagi bada tauna ta ia noho, ena ladana be Pobelio bona ia be mai ena tano momo. Ia ese ai ia abia dae bona dina toi lalonai ai ia naria namo herea.
8 To Pobelio ena tamana be ia fiva bona ia rara kukuri. Bena Paulo be ia dekenai ia lao, ia guriguri, bona ena imana be ia latanai ia atoa bona ia hanamoa.
9 Unai ia vara murinai, unai motumotu ai idia noho gorere taudia ma haida danu be ia dekenai idia mai bona ia hanamodia.
10 Bona ai dekenai harihari gaudia momo idia henia bona bouti amo ai heau gwauraia neganai, ai dabu gaudia momo be bouti dekenai idia udaia.
11 Hua toi murinai, ai be bouti ta dekenai ai guia, ia dekenai Dio ena hekapa memero rua edia laulau ia noho. Unai bouti be Alesandria amo bona keru neganai unai motumotu dekenai ia noho.
12 Bena Surakusa ena haba dekenai ai ginidae neganai, unuseniai dina toi ai noho.
13 Bona unai gabu amo ai heau hegege bona Regio dekenai ai ginidae. Dina ta murinai, saut kahana amo lai ia toa bona dina iharuana ai, Puteoli dekenai ai ginidae.
14 Unuseniai tadikaka ai hedavari henidia bona ai idia noia idia ida dina 7 do ai noho. Bona unai murinai, ai be Roma dekenai ai mai.
15 Bona unuseniai tadikaka ese emai sivarai idia kamonai neganai, idia be Laga-Ani Ruma Toi dekenai ai idia naria, to idia haida be ai hedavari henia totona idia mai ela bona Apia ena maketi dekenai. Bona Paulo ese idia ia itaia neganai, Dirava ia tanikiu henia bona goada ia abia.
16 Dokonai, ai be Roma dekenai ai ginidae neganai, Paulo dekenai gwaumaoro idia henia, ia be sibona do ia noho bona tuari tauna ta ese ia do ia gimaia.
17 To dina toi murinai, Paulo ese Iuda taudia edia dagi bada taudia ia boiridia. Idia hebou neganai, idia dekenai ia gwau: “Tadikaka e, ena be iseda bese bona iseda sene taudia edia kastom lau hadikaia lasi, to lau be Ierusalema amo Roma taudia edia imana dekenai idia atoa, dibura tauna ta bamona.
18 Bona idia ese lau idia tahua murinai, idia ura lau idia ruhaia, badina lau hamasea ena badina ta idia davaria lasi.
19 To Iuda taudia idia ura lasi lau idia ruhaia neganai, lau ura Kaisara danu ese egu kota herevana do ia kamonai, to unai be egu bese taudia samania totona lasi.
20 Unai dainai lau noinoi umui do lau itaia bona lau hereva henia, Israela ena helaro dainai seini amo lau idia guia.”
21 Ia dekenai idia gwau: “Ai be Iuda amo oi ia sivarailaia revarevana ta ai abia lasi, bona unuseni amo idia mai tadikaka danu be oi dainai sivarai dikana ta idia gwauraia lasi.
22 To ai laloa do ia namo bema oiemu lalohadai ai kamonai, badina ai diba momokani, gabu ibounai dekenai taunimanima ese inai tomadiho oreana idia gwauraia dika.”
23 Vadaeni dina ta idia abia hidi, ia ida idia hebou totona. Bona idia momo be iena ruma dekenai idia mai. Daba amo ela bona hanuaboi ai, idia dekenai gau ibounai ia herevalaia namonamo, oibe, ia ese Dirava ena Basileia ia gwauraia guguru. Bona lalona veria dalanai, Mose ena taravatu bona Peroveta Taudia edia toretore amo, Iesu ia herevalaia.
24 Bona haida ese Paulo ia herevalaia gaudia idia abidadama henia, to ma haida ese idia abidadama henia lasi.
25 Idia lalotamona lasi dainai, unai gabu idia rakatania neganai, Paulo ese inai hereva tamona ia gwauraia:
“Lauma helaga be peroveta tauna Isaia amo emui sene taudia ia hereva henia,
26 ia gwau, ‘Inai taudia dekenai oi lao bona oi gwau: “Do umui kamonai, to do umui laloparara lasi, bona do umui itaia, to gau ta do umui itaia lasi.
27 Inai taudia edia kudouna be ia auka dainai, edia taiana amo idia kamonai, to kara ta idia karaia lasi. Bona edia matana idia koua vadaeni, dika edia matana be gau ta idia itaia. Bona idia ura lasi edia taiana amo hereva idia kamonai, dika edia lalona* ia kehoa bena idia helalo-kerehai bona idia lau hanamoa garina.” ’
28 Unai dainai namona be umui diba, Dirava ese hahemauri ia mailaia dalana ena sivarai be idau bese taudia dekenai idia harorolaia. Idia ese unai hereva do idia kamonai henia.”
29 *—
30 Unai dainai lagani rua lalonai Paulo be ia rentaia rumana ai ia noho, bona ia dekenai idia mai taudia ibounai be mai moale ida ia abia dae,
31 idia dekenai Dirava ena Basileia ia herevalaia, bona mai gari lasi ida Lohiabada Iesu Keriso ena sivarai be idia dekenai ia hadibaia, bona gau ta ese ia koua lasi.
