Heberu 11:1-40
11 Abidadama ena anina be inai, oi daradara lasi to oi diba oi naria noho gauna be do ia vara. Bona oi diba momokani, oi abia dae gaudia be momokani, ena be unai gaudia oi itaia lasi.
2 Sene taudia edia abidadama dainai, Dirava ese ia gwauraia hedinarai ia be idia dekenai ia moale.
3 Abidadama dainai ita diba Dirava ena hereva amo guba bona tanobada gaudia* idia vara, unai dainai ita itaia gaudia be ita itaia lasi gaudia amo idia vara.
4 Abela ia abidadama dainai, Dirava dekenai ia henia boubou gauna ese Kaino ena ia hereaia, unai abidadama amo Dirava ese ia gwauraia kara maoromaoro tauna. Dirava ia hahedinaraia, ia ese ena harihari gaudia ia abia dae bona ena be ia mase vadaeni, to ena abidadama dainai ia do hereva noho.
5 Enoka ia abidadama dainai, Dirava ese ia abia lao, unai amo mase ia itaia lasi, bona ia be gabu ta dekenai idia davaria lasi, badina Dirava ese ia abia lao. To unai ia do vara lasi neganai, Dirava ia hahedinaraia ia be Enoka dekenai ia moale.
6 Danu, bema tau ta be abidadama lasi, ia ese Dirava ia hamoalea diba lasi, badina Dirava kahirakahira ia lao tauna ia abia dae be namo Dirava be ia noho bona Dirava ese mai momokani ida ia idia tahua taudia edia davana do ia henia.
7 Noa ia abidadama dainai, Dirava ese do idia vara gaudia be ia dekenai ia hadibaia murinai, ia ese Dirava gari henia karana ia hahedinaraia bona ena ruma bese hamauria totona lagatoi ta ia karaia. Bona iena abidadama amo ia ese tanobada ia hahemaoro henia bona abidadama amo ia vara kara maoromaorona ia abia.
8 Aberahamo ia abidadama dainai, Dirava ese ia boiria neganai, ia kamonai henia bona Dirava ia gwauhamata ia dekenai do ia henia gabuna dekenai ia lao, oibe ia lao, ena be ia lao henia gabuna ia diba lasi.
9 Ia abidadama dainai, ia be idau tauna bamona gwauhamata tanona dekenai ia noho. Ia be Isako bona Iakobo ida palai rumadia dekenai ia noho, idia dekenai danu Dirava ese unai gwauhamata tamona ia henia.
10 Badina ia be taoni mai ena badina aukana ia naria noho, unai taoni ena palani ia karaia tauna bona ia haginia tauna be Dirava.
11 Sara danu be ia abidadama dainai, siahu ia abia ia rogorogo bona natuna* ta ia abia, ena be ia buruka vadaeni bona natuna havaraia laganidia ia hanaia vadaeni, to ia diba ia dekenai unai gwauhamata ia karaia tauna ese ena hereva do ia badinaia.
12 Unai dainai, tau tamona amo natudia momo idia vara, ena be ia hegeregere lasi natudia ia havaraia totona. Oibe, ia amo natudia momo herea idia vara, guba ena hisiu bona kone ena miri edia momo hegeregerena, bona ta ese ia duahia diba lasi.
13 Idia ibounai be edia abidadama idia dogoatao ela bona idia mase, ena be Dirava ese idia dekenai ia gwauhamatalaia gaudia idia abia lasi. To idia ese daudau amo unai gaudia idia itaia bona mai moale ida idia abia dae, bona taunimanima vairanai idia gwau idia be idau taudia bona unai tano dekenai do idia noho daudau lasi.
14 Unai bamona idia hereva taudia idia hahedinaraia, idia be mai momokani ida edia gabu korikorina idia tahua noho.
15 To bema idia ese idia rakatania vadaeni gabuna idia do laloa noho, dala do ia noho idia giroa lou totona.
16 To hari idia ura gabu namona ta dekenai idia lao, unai gabu be guba gauna. Idia ese Dirava be edia Dirava idia gwauraia neganai, ia be idia dainai ia hemarai lasi, badina ia ese idia totona taoni ta ia hegaegaelaia vadaeni.
17 Aberahamo ia abidadama dainai, hahetoho ia davaria neganai, Isako be boubou gauna bamona ia halaoa, oibe, mai moale ida unai gwauhamata ia abia tauna be ia hegaegae, ena natuna tamona sibona ia bouboulaia totona,
18 ena be ia dekenai inai hereva idia gwauraia: “Inai tauna do idia gwauraia ‘oiemu garana,’ ia be Isako amo do ia vara.”
19 To Aberahamo ia laloa Dirava ese mase amo danu Isako ia hatorea isi lou diba, bona iena natuna be mase amo ia abia lou, bona unai be gau ta ia laulaulaia.
20 Danu, Isako ia abidadama dainai, Iakobo bona Esau ia hanamoa bona idia dekenai gabeai do idia vara gaudia ia gwauraia.
21 Iakobo ia abidadama dainai, kahirakahira ia mase neganai, ia ese Iosepa ena natudia memero rua ia hanamodia bona ena itotohi latanai ia tabekau bona Dirava ia tomadiho henia.
22 Iosepa ia abidadama dainai, kahirakahira ia mase neganai, ia ese Israela besena be Aigupito do idia rakatania sivaraina ia gwauraia, bona hadibaia hereva ia henia ena turia be unuseni amo do idia abia lao.
23 Mose ena tama sina idia abidadama dainai, ia vara murinai hua toi lalonai ia idia hunia, badina idia itaia ia be mai hairai bona king ena oda herevana dekenai idia gari lasi.
24 Mose ia abidadama dainai, ia bada neganai ia ura lasi ia idia gwauraia Farao ena natuna kekeni ena natuna.
25 Ena lalona ia hadaia Dirava ena taunimanima ida hisihisi ia abia hebou, to kara dika ena moale, nega sisina do ia noho gauna ia ura henia lasi,
26 badina ia laloa Horoa Tauna dainai ia abia hemarai be dava bada gauna bamona, bona unai ese Aigupito ena dava bada gaudia ia hereaia, bona do ia abia davana namona sibona ia laloa.
27 Abidadama dainai, ia ese Aigupito ia rakatania bona king ena badu garina ia gari lasi, badina ia gini goada noho, ita itaia diba lasi Tauna ia itaia bamona.
28 Ia abidadama dainai, ia ese pasova ia karaia bona rara be iduara dekenai ia atoa, unai amo Dirava ena aneru ese edia vara guna natudia do ia alaia mase lasi.
29 Israela taudia idia abidadama dainai, Davara Kakakakana idia raka hanai, hegeregere idia be tano kaukauna ai idia raka hanai bamona, to Aigupito taudia be idia raka hanai gwauraia neganai, idia maloa mase.
30 Israela taudia idia abidadama dainai, dina 7 Ieriko ena magu idia raka hagegea murinai, magu ia moru.
31 Ariara hahinena Rahaba ia abidadama dainai, ia be gwau-edeede taudia ida ia mase lasi, badina ia ese maino dalanai spai taudia ia abia dae.
32 Bona ma dahaka do lau gwau? Nega do ia ore bema lau ese Gideona, Baraki, Samson, Iepeta, Davida, Samuela, bona peroveta taudia ma haida lau herevalaia.
33 Unai taudia be idia abidadama dainai, basileia idauidau idia halusidia, kara maoromaoro idia hahedinaraia, Dirava amo gwauhamata herevadia idia abia, laiona edia uduna idia koua,
34 lahi ena siahu idia koua, tuari kaia amo idia heau mauri, idia manoka to ma idia goada, tuari lalonai idia gari lasi, bona idau tano taudia edia tuari taudia idia lulua.
35 Hahine edia lalokau taudia be mase amo idia toreisi lou. To tatau ma haida be idia hahisia ela bona idia mase, badina idia ura lasi edia abidadama idia negea bena do idia ruhaia. Unai bamona idia karaia, unai amo toreisi lou hereadaena do idia abia.
36 Oibe, ma haida be inai dala ai hahetoho idia davaria, hegeregere haida ese idia kirikirilaidia, idia kwadidia, bona unai sibona lasi to seini amo idia guidia bona dibura rumadia ai idia atodia danu.
37 Idia be nadi amo idia hodoa, edia abidadama idia tohoa, idia be iri amo kahana rua ai idia utua, tuari kaia amo idia alaia mase, bona mamoe bona nanigosi kopina amo idia karaia dabua idia hahedokilaia. Idia be idia dabu, hisihisi idia davaria, idia kara dika henidia,
38 bona tanobada be ia hegeregere lasi idia totona. Idia be tano gagaena ai, ororo ai, kohua bona guri lalodiai idia noho.
39 Bona edia abidadama dainai, Dirava ese ia hahedinaraia ia be idia dekenai ia moale, ena be ia gwauhamatalaia gauna idia abia lasi,
40 badina Dirava ese ita totona gau hereana ta ia itaia vadaeni, unai taudia be ita amo do idia goevadae guna lasi.
