Heberu 12:1-29
12 Vadaeni, witnes orea badana* be ita idia hagegea dainai, namona be ita idia hametaua gaudia ibounai bona ita idia guia noho kara dika ita negea, bona namona be iseda vairanai ia noho heau helulu lalonai do ita heau mai haheauka ida,
2 bona iseda abidadama ia Gunalaia Tauna bona ia Hagugurua Tauna, Iesu, ita itaia noho. Ia be iena vairanai ia noho moalena dainai, hisihisi auna* ia haheaukalaia, bona do ia abia hemaraina ia laloa lasi. Bona ia be Dirava ena terona ena idibana kahanai ia helai vadaeni.
3 Oibe, unai tauna do umui laloa namonamo, ia ese kara dika taudia edia hadikaia herevadia ia haheaukalaia, to idia gwauraia hereva amo idia sibodia idia hadikaia. Namona be ia umui laloa, unai amo do umui hesiku lasi bona do umui lalomanoka lasi.
4 Umui ese kara dika umui tuari henia noho, to ema bona hari emui rara ia do hebubu lasi.
5 Bona inai sisiba herevana lalonai, umui be natudia bamona ia gwauraia, to umui ese unai sisiba umui laloaboio, ia gwau: “Lauegu natuna e, Iehova amo ia mai matahakani do oi laloa maragi lasi, bona oi ia hamaoromaoroa neganai, oi lalomanoka lasi.
6 Badina be Iehova ese ia lalokau henia tauna ia matahakani henia, momokani, ia ese iena natuna ai ia halaoa taudia ibounai ia panisia.”*
7 Namona be umui haheauka badina unai be emui matahakani ena kahana ta. Dirava ese umui be ena natudia bamona ia kara henia. Edena mero be ena tamana ese ia matahakani henia lasi?
8 To bema Dirava ese umui ia matahakani henia lasi, ma haida ia matahakani henia bamona, vadaeni umui be ariara natudia, to iena natudia korikori lasi.
9 Danu, iseda tanobada tamadia ese vaia ita idia matahakani henia, bona idia ita matauraia. Vadaeni ita mauri totona, namona be lauma helaga amo ita ia abia hidi Tamana ena henunai ita noho.
10 Badina tanobada tamadia ese nega sisina lalonai edia ura hegeregerena ita idia matahakani henia, to Dirava ese iseda namo totona ita ia matahakani henia, unai amo ita be ia hegeregerena do ita helaga.
11 Momokani, ta ese matahakani ia abia neganai, unai ia moalelaia lasi, to ia lalohisihisilaia. To gabeai, unai matahakani amo diba idia abia taudia dekenai maino bona kara maoromaoro ia havaraia.
12 Unai dainai idia manoka imadia bona idia goada lasi tuidia do umui hagoadaia,
13 bona emui aena edia raka daladia do umui hamaoromaoroa noho, unai amo ia dika aena be do ia dika momokani lasi, to do ia namo lou.
14 Do umui gaukara goada taunimanima ibounai ida maino ai umui noho totona, bona do umui helaga noho, badina bema ta ia helaga lasi, ia ese Lohiabada do ia itaia lasi.
15 Bona umui naria namonamo, dika umui ta ese Dirava ena hebogahisi hereadaena ia abia lasi, bona ia lalonai poisini ramuna ia tubu bena hekwakwanai ia havaraia bona momo ia hamiroa.
16 Bona namo lasi umui huanai matabodaga tauna ta eiava helaga gaudia ia laloa bada lasi tauna ta ia noho, Esau bamona, ia ese aniani tamona totona iena vara guna ahuna ia henia.
17 Badina umui diba, gabeai ia ura hahenamo ia abia neganai, ena tamana ese ia dadaraia, bona ena be mai mata ranu ida ia ura ena tamana ena lalona ia haidaua, to ia haidaua lasi.
18 Umui be ororo kahirakahira* umui lao lasi, unai be idia dogoatao diba gauna. Unai ororo be lahi ese ia araia bona ia be ori koremana bona dibura badana bona lai gubana ese ia koua,
19 bona taunimanima ese kibi regena bona gado ta idia kamonai, unai neganai idia ese Mose idia noia, idia ura lasi unai gadona amo idia mai hereva ma haida idia kamonai lou.
20 Badina idia be inai oda dainai idia gari, ia gwau: “Bema animal ta be inai ororo dekenai ia daekau, nadi amo umui hodoa be namo.”
21 Idia vara gaudia ese taunimanima ia hagaridia momokani, bona Mose danu ia gwau: “Lau gari dikadika bona lau heudeheude.”
22 To umui be guba ena Siona Ororo kahirakahira umui lao bona ia be mauri Diravana ena taoni, guba Ierusalema, bona aneru tausen momo*
23 be unuseniai idia hebou. Bona vara guna natudia edia kongrigeisen, edia ladadia be guba ai idia torea vadaeni, bona Dirava be taunimanima ibounai edia Hahemaoro Tauna, bona Dirava ese kara maoromaoro taudia edia mauri be ena lauma helaga amo ia abia hidi bona idia be goevadae taudia ai idia lao.
24 Bona Iesu be kontraka matamata ena medieita* bona ita dekenai rara ia negea lao, unai rara be dala namona ai ia hereva bona Abela ena rara ia hereaia.
25 Namona be ia hereva noho tauna umui kamonai henia. Badina guna tanobada taudia ese Dirava amo hadibaia hereva idia abia, to idia kamonai lasi, unai dainai idia ese panisi idia abia. Vadaeni bema guba amo ita ia hereva henia tauna ena hereva ita kamonai henia lasi, ita danu be panisi do ita abia momokani.
26 Unai nega ai Dirava ena gadona ese tanobada ia hamarerea, to hari ia gwauhamata, ia gwau: “Nega ma ta ai, lau ese tanobada sibona do lau hamarerea lasi, to guba danu do lau hamarerea.”
27 Inai hereva “Nega ma ta ai” ese ia hahedinaraia, Dirava ese ia hamarerea vadaeni gaudia do ia kokia, unai gaudia be Dirava ese ia havaraia lasi. Vadaeni ia hamarerea lasi gaudia be do idia noho.
28 Oibe, ita be idia hamarerea diba lasi basileiana do ita abia dainai, namona be hebogahisi hereadaena do ita moalelaia noho, unai amo mai gari bona hemataurai ida, Dirava ese ia moalelaia dalanai hesiai gaukara helagana ita karaia diba.
29 Badina iseda Dirava be gau ibounai ia gabua ore lahina.
