Heberu 13:1-25
13 Namona be tadikaka bamona do umui lalokau heheni noho.
2 Heabidae karana do umui laloaboio lasi, badina unai kara amo, ena be haida idia diba lasi, to idia ese aneru idia abia dae.
3 Dibura ruma lalonai idia noho taudia umui laloa, hegeregere umui be idia danu dibura ruma ai umui noho. Bona idia kara dika henia taudia danu do umui laloa, badina umui danu be tanobada dekenai umui do noho.
4 Taunimanima ibounai ese headava idia matauraia be namo, bona headava gedana* idia hamiroa lasi, badina Dirava ese matabodaga taudia bona heudahanai taudia do ia hahemaoro henidia.
5 Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere. Badina Dirava ia gwau: “Lau ese umui do lau negea lasi, bona umui do lau rakatania lasi momokani.”
6 Unai dainai mai lalogoada ida do ita gwau: “Iehova be egu durua tauna, lau be do lau gari lasi. Taunimanima be lau dekenai dahaka idia karaia diba?”
7 Umui idia hakaua taudia do umui laloatao, idia ese umui dekenai Dirava ena hereva idia gwauraia vadaeni, bona edia kara amo idia vara anina namodia umui laloa noho lalonai, edia abidadama umui tohotohoa.
8 Iesu Keriso be ia idau lasi, varani, hari, bona ela bona hanaihanai.
9 Namo lasi hadibaia hereva idauidau bona idau hereadia ese umui idia hakaua kerere. To namona be Dirava ena hebogahisi hereadaena ese emui kudouna ia hagoadaia, to aniani gaudia lasi, badina unai gaudia idia laloa bada taudia be namo ta idia davaria lasi.
10 Ita be mai iseda boubou patana, to palai ruma ai hesiai gaukara helagana idia karaia taudia be maoro lasi, unai pata ai idia noho gaudia idia ania totona.
11 Hahelaga taudia ese animal edia rara be helaga gabuna lalonai idia abia vareai, kara dika dainai boubou idia henia totona, to unai animal edia tauanina be kamepa ena murimuri ai idia gabua.
12 Unai dainai, Iesu danu be iena rara amo taunimanima ia hahelagaia totona, taoni ena geiti ena murimuriai hisihisi ia abia.
13 Vadaeni namona be ia dekenai ita lao, kamepa ena murimuri ai, bona ia abia hemaraina ita abia.
14 Ita diba, ita dekenai noho hanaihanai taoni ta be lasi, to mai iseda ura bada ida do ia mai gauna ita naria noho.
15 Unai dainai, namona be hanaihanai Iesu amo Dirava ita hanamoa. Unai be boubou gauna bamona Dirava dekenai ita henia. Ita ese iseda uduna ita gaukaralaia, ma haida dekenai iena ladana ita gwauraia totona.
16 Ma danu, umui laloaboio lasi, kara namodia do umui karaia noho bona ma haida ida emui kohu do umui haria, badina Dirava ese unai bamona boubou karadia ia moalelaia.
17 Umui idia hakaua taudia do umui kamonai henia, bona idia henunai do umui noho, badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.
18 Ai totona do umui guriguri noho, badina ai diba emai lalomamina be ia goeva.* Bona ai ura mai momokani ida gau ibounai ai karaia.
19 To umui lau noia goadagoada do umui guriguri, unai amo umui dekenai do lau giroa mai haraga.
20 Maino Diravana ese iseda Lohiabada Iesu be mase amo ia hatorea isi lou. Bona ia noho hanaihanai kontraka rarana be Iesu ida. Ia be mamoe edia mamoe naria tauna badana. Vadaeni, namona be maino Diravana
21 ese umui dekenai gau namodia ibounai ia henia, iena ura umui karaia totona. Iesu Keriso amo ia ese ita ia hagoadaia ia hamoalea gaudia ita karaia totona. Namona be Dirava dekenai hanamoa ita henia ela bona hanaihanai. Amen.
22 Lauegu tadikaka e, umui lau noia, inai hagoadaia revarevana do umui kamonai bona umui hesiku lasi, badina inai revareva lalonai hereva momo lau torea lasi.
23 Namona be umui diba, iseda tadikaka Timoteo be dibura rumana amo idia ruhaia vadaeni. Bema ia mai haraga, ai ruaosi be umui dekenai do ai mai.
24 Umui idia hakaua taudia ibounai bona helaga taudia ibounai dekenai egu hanamoa hereva umui henia. Italia dekenai idia noho taudia ese umui dekenai edia hanamoa hereva idia siaia.
25 Dirava ena hebogahisi hereadaena be umui ibounai dekenai do ia noho.
