Heberu 3:1-19
3 Unai dainai, helaga tadikakadia e, umui be guba ena boiboi umui abia taudia, mani inai aposetolo tauna bona hahelaga tauna badana umui laloa, ita gwauraia hedinarai ia ita abidadama henia, ia be Iesu.
2 Ia ese ia dekenai unai dagi ia henia Tauna ia badinaia momokani, Mose ese Dirava ena ruma* lalonai badinaia karana ia hahedinaraia hegeregerena.
3 Iesu ena hairai ese Mose ena hairai ia hereaia, unai be maoro, badina ruma haginia tauna idia matauraia bada, to ia karaia rumana idia matauraia bada lasi.
4 Momokani, ruma ibounai be mai edia karaia tauna, to gau ibounai ia karaia tauna be Dirava.
5 Bona Mose be hesiai tauna bamona mai kamonai ida Dirava ena ruma lalonai ia gaukara. Ia karaia gaukarana amo, gabeai do idia hedinarai gaudia ia hamomokania.
6 To Keriso be ruma biaguna ena natuna bona ia ese mai kamonai ida Dirava ena ruma ia naria. Bema ita be mai gari lasi ida ita hereva bona iseda helaro heagilaia karana ita dogoatao ela bona dokona, ita be unai Tauna ena ruma.
7 Unai dainai lauma helaga ia gwau: “Hari dina bema umui ese iena gadona umui kamonai,
8 emui kudouna umui ha-aukaia lasi, emui sene taudia ese lau idia habadua negana hegeregerena, unai nega ai idia ese tano gagaena ai lau idia tohoa,
9 oibe, emui sene taudia ese lau idia tohoa, ena be idia ese lagani 40 lalonai lau karaia gaudia idia itaia.
10 Unai badina dainai unai uru taudia lau badu henia bona lau gwau, ‘Nega ibounai edia kudouna ai egu hereva idia dadaraia, bona egu dala idia dibaia lasi.’
11 Unai dainai egu badu lalonai lau gwauhamata, lau gwau, ‘Idia be egu laga-ani lalonai do idia vareai lasi.’ ”
12 Tadikaka e, umui naria namonamo, badina mauri Diravana amo umui raka siri karana amo, abidadama lasi kudou dikana umui abia garina.
13 To inai nega, idia gwauraia “Hari Dina” ia do noho lalonai, dina iboudiai umui ta ta umui hagoadaia noho, unai amo kara dika ena koikoi siahuna ese umui ta ena kudouna do ia ha-aukaia lasi.
14 Bema matamana amo ita abia abidadama ita dogoatao auka ela bona dokona, vadaeni Keriso dekenai idia vara gaudia be ita dekenai do idia vara danu.
15 Toretore Helagadia ia gwau: “Hari dina bema umui ese iena gadona umui kamonai, emui kudouna umui ha-aukaia lasi, emui sene taudia ese lau idia habadua negana hegeregerena.”
16 Dirava ena gadona idia kamonai to ia idia habadua taudia be daidia? Momokani, idia be Mose ese Aigupito amo ia hakaua raka-lasi taudia, ani?
17 Danu, lagani 40 lalodiai Dirava be daidia dekenai ia badu? Idia kara dika bona tano gagaena ai idia mase taudia dekenai, ani?
18 Bona daidia dekenai ia gwauhamata, ia gwau, idia be iena laga-ani lalonai do idia vareai lasi? Ia idia kamonai henia lasi taudia dekenai unai ia gwauraia, ani?
19 Unai dainai ita itaia idia be edia abidadama lasi karana dainai, unai laga-ani lalonai idia vareai lasi.
