Heberu 5:1-14
5 Taunimanima huana amo hahelaga tauna badana idia abia hidi. Ia be Dirava ena hesiai gaukara amo taunimanima ia durua. Bona ia ese kara dika dainai, harihari gaudia bona boubou gaudia ia henia.
2 Ia danu be mai ena manoka dainai, idia diba lasi bona kerere idia karaia taudia be mai hebogahisi ida ia kara henia.
3 Bona namona be ia ese ia sibona ena kara dika dainai boubou gaudia ia henia, taunimanima totona ia henia hegeregerena.
4 Bona danu, tau ta be sibona ena ura hegeregerena unai dagi ia abia lasi, to Dirava ese ia boiria negana sibona ai unai dagi ia abia, Dirava ese guna Arona ia boiria bamona.
5 Unai hegeregerena, Keriso danu ese ia sibona ia abia isi lasi hahelaga tauna badana ai ia lao totona, to Dirava ese ia abia isi, bona ia dekenai ia gwau: “Oi be egu natuna, hari dina lau be emu tamana ai lau lao.”
6 Ma kahana ta ai danu, ia gwau: “Oi be hahelaga tauna ela bona hanaihanai, Melekisedeka bamona.”
7 Keriso be tanobada ai ia noho neganai, mase amo ia do ia hamauria diba Tauna dekenai ia guriguri bona ia noinoi goadagoada, mai taitai bona mai mata ranu ida, bona Dirava ese ena noinoi ia kamonai, badina ia ese Dirava ia gari henia.
8 Ena be ia be Dirava ena Natuna, to ia hisihisilaia gaudia amo kamonai karana ia dibaia,
9 bona ia hegeregere momokani murinai, ia idia kamonai henia taudia ibounai be ia amo mauri hanaihanai idia abia diba,
10 badina Dirava ese ia ia abia hidi hahelaga tauna badana ai ia lao totona, Melekisedeka bamona.
11 Ia dainai ai ura hereva momo ai gwauraia, to ia auka ai gwauraia totona, badina kamonai karana dekenai umui haraga lasi.
12 Ena be hari umui be hadibaia taudia ai umui lao be namo, to ta ese Dirava ena hereva amo hahediba hereva ginigunadia be umui dekenai ia hadibaia lou be namo. Bona umui be idia ura rata sibona idia inua taudia bamona ai umui lao, to aniani korikorina umui ura lasi.
13 Rata idia inua noho taudia ibounai be kara maoromaoro herevana idia diba lasi, badina idia be idia do natuna maragidia.
14 To aniani korikorina be taunimanima badadia totona, idia ese edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia diba.
