Heberu 7:1-28
7 Inai Melekisedeka be Salema ena king bona Atai Momokani Diravana ena hahelaga tauna. Aberahamo ese king haida ia hadarerea bona ia giroa lou neganai, Melekisedeka ese ia hedavari henia bona ia hanamoa,
2 bona Aberahamo ese kohu kahana 10 amo kahana ta be ia dekenai ia henia. Guna, ena ladana idia hahanaia “Kara Maoromaoro ena King,” bona danu ia be Salema ena king, anina be “Maino ena King.”
3 Ia be mai ena tamana lasi, mai ena sinana lasi, ena sene taudia edia ladadia ena lista idia torea lasi, bona ena vara dinana bona mase dinana be ta ia diba lasi,* to Dirava ese ia be ena Natuna bamona ai ia halaoa, ia be hahelaga tauna ela bona hanaihanai.
4 Vadaeni mani umui laloa, unai tauna be siahu bada tauna. Iduhu kwarana Aberahamo ese tuari amo ia abia kohu namodia ena kahana 10 amo kahana ta be ia dekenai ia henia.
5 Momokani, Taravatu hegeregerena, Levi ena bese amo hahelaga dagi idia abia taudia ese taunimanima amo kohu ena kahana 10 amo kahana ta idia gogoa, unai be edia tadikaka amo idia abia, herevana idia be Aberahamo ena bese taudia.
6 To Levi iduhuna amo ia vara lasi tauna ese Aberahamo amo kohu kahana 10 amo kahana ta ia abia, bena ia ese gwauhamata ia abia tauna, Aberahamo, ia hanamoa.
7 Taunimanima ibounai be inai hereva dekenai idia lalotamona, hanamoa ia henia tauna ese hanamoa ia abia tauna ia hereaia.
8 Levi taudia ese kohu kahana 10 amo kahana ta idia abia, to idia be do idia mase taudia, to kohu kahana 10 amo kahana ta ia abia tauna ma ta, Toretore Helagadia ia gwau bamona, ia be ia mauri noho.
9 Bona ita gwau diba, Levi be vaia kohu kahana 10 amo kahana ta ia abia, to Aberahamo amo ia danu ese kohu kahana 10 amo kahana ta ia henia,
10 badina Melekisedeka ese Aberahamo ia hedavari henia neganai, Levi be ena sene tauna lalonai* ia do noho.
11 Vadaeni bema Levi hahelaga oreana amo taunimanima idia goevadae diba, (unai be Dirava ese taunimanima dekenai ia henia Taravatu ena kahana ta,) dahaka dainai Dirava ia gwau hahelaga tauna ma ta do ia toreisi, ia be Melekisedeka bamona to Arona bamona lasi?
12 Bema hahelaga gaukarana idia haidaua, taravatu danu idia haidaua be namo.
13 Inai sivarai ese ia herevalaia tauna be iduhu idauna amo, unai iduhu amo tau ta ese boubou patana dekenai hahelaga gaukarana ia karaia lasi.
14 Ia hedinarai goevagoeva iseda Lohiabada be Iuda ena bese amo ia vara, to Mose be nega ta ia hereva lasi unai iduhu amo hahelaga taudia do idia vara.
15 Bona hahelaga tauna ma ta, Melekisedeka bamona ia toreisi neganai, unai ia hedinarai goevagoeva.
16 Ia be hahelaga tauna ai ia lao, Taravatu ese ia gwauraia iduhuna dainai lasi, to ia dika diba lasi maurina ena siahu dainai, ia be hahelaga tauna ai ia lao.
17 To Toretore Helagadia ena kahana ta ese ia be inai bamona ia herevalaia: “Oi be hahelaga tauna ela bona hanaihanai, Melekisedeka bamona.”
18 Vadaeni Dirava ese taravatu gunana ia haorea, badina ia manoka bona anina namona ia havaraia momokani lasi.
19 Taravatu ese gau ta ia hanamoa momokani lasi, to Dirava ese ia mailaia helaro namona ese gau ibounai ia hanamoa momokani, bona unai amo Dirava kahirakahira ita lao.
20 Danu, Dirava be mai gwauhamata metauna ida Iesu dekenai hahelaga tauna ena dagi ia henia,
21 (momokani, tatau haida be hahelaga taudia ai idia lao bona Dirava ese idia dainai gwauhamata metauna ia karaia lasi, to inai tau be hahelaga tauna ai ia lao, bona Dirava ese ia dainai gwauhamata metauna ia karaia, ia gwau: “Iehova ia gwauhamata bona unai do ia lalohisihisilaia lasi, ia gwau, ‘Oi be hahelaga tauna ela bona hanaihanai’ ”),
22 unai dainai Iesu be kontraka namo hereana ia hamomokania tauna ai ia lao.
23 Guna momo be hahelaga taudia, to idia mase dainai edia gaukara amo idia doko, bona ma haida ese edia gabu idia abia.
24 To Iesu be ia noho hanaihanai dainai, ta ese iena gabu do ia abia lasi hahelaga gaukarana ia karaia totona.
25 Unai dainai ia amo Dirava kahirakahira idia lao taudia do ia hamauridia momokani, badina ia noho hanaihanai bona idia totona Dirava do ia noinoi henia.
26 Unai bamona hahelaga tauna badana ita abia be maoro. Ia be Dirava ia abidadama henia, ia kerere lasi, ia miro lasi, ia be kara dika taudia amo ia idau, bona ia be guba ataiai idia abia isi.
27 Ia be unai hahelaga taudia bamona lasi, dina ta ta ai, guna ia sibona ena kara dika totona bona gabeai taunimanima totona boubou gauna ia henia be anina lasi, badina ia ese ia sibona be boubou gauna bamona ia henia neganai, unai boubou gauna be nega tamona sibona ia henia.
28 Taravatu ese mai edia manoka taudia ia abia hidi hahelaga taudia badadia ai idia lao totona, to Taravatu murinai ia mai gauna, gwauhamata metauna ena hereva unai, ese Natuna ta ia abia hidi, ia be goevadae tauna ai ia lao ela bona hanaihanai.
