Heberu 8:1-13
8 Vadaeni, ita herevalaia gaudia edia hereva badana be inai: Ita be mai iseda hahelaga tauna badana, ia be guba ai King Hereadaena ena terona ena idibana kahanai ia helai.
2 Ia be helaga gabuna bona palai ruma momokanina ena hesiai tauna. Unai palai rumana be Iehova ese ia haginia, to taunimanima ese idia haginia lasi.
3 Hahelaga taudia badadia ibounai edia maduna be Dirava dekenai harihari gaudia bona boubou gaudia idia henia. Unai dainai ia danu be boubou gauna ta ia henia be namo.
4 Bema hari ia be tanobada dekenai ia noho, ia be hahelaga tauna lasi, badina tatau haida idia noho bona taravatu hegeregerena idia ese harihari gaudia idia henia.
5 Unai taudia ese idia karaia hesiai gaukara helagana be guba gaudia edia toana bona edia laulau sibona. Mose ese palai rumana ia haginia gwauraia neganai, Dirava ese ia henia haheganina ese unai ia hahedinaraia. Ia gwau: “Namona be ororo ai oi dekenai lau hahedinaraia laulauna hegeregerena, gau ibounai do oi karaia.”
6 To hari Iesu be hesiai gaukara hereadaena ia abia, badina ia be kontraka gunana ia hereaia kontrakana ena medieita* danu, taravatu hegeregerena unai kontraka be gwauhamata namodia latanai idia haginia.
7 To bema unai kontraka ginigunana be kerere lasi, vadaeni iharuana ese ena gabu ia abia be anina lasi.
8 To Dirava ese inai hereva amo ia hahedinaraia taunimanima be mai edia kerere, “Iehova ia gwau, ‘Nega ta do ia ginidae, lau be Israela taudia bona Iuda taudia ida kontraka matamatana do lau karaia.
9 Unai be edia sene taudia ida lau karaia kontraka hegeregerena lasi. Unai negai, edia imana lau dogoatao bona Aigupito tanona amo idia lau hakaua raka-lasi, to Iehova ia gwau, idia ese egu kontraka idia badinaia lasi dainai, idia lau naria noho lasi.’ ”
10 “Iehova ia gwau, ‘Unai dinadia murinai, lau ese Israela taudia ida inai kontraka do lau karaia. Lauegu taravatu be edia lalona ai do lau atoa, bona edia kudouna ai do lau torea. Bona lau be edia Dirava ai do lau lao, bona idia be egu taunimanima ai do idia lao.
11 “ ‘Bona idia ese edia bese tamona taudia bona edia tadikaka be inai bamona do idia hadibaia lasi: “Iehova umui dibaia!” Badina idia ibounai be lau do idia diba, maragidia amo ela bona badadia.
12 Lau ese edia kara dika do lau gwauatao, bona edia kara dika do lau laloatao lou lasi.’ ”
13 “Kontraka matamatana” ia herevalaia neganai, ia ese gunana ia hadokoa. Unai ia hadokoa gauna be ia gunana ia lao noho bona kahirakahira do ia boio.
