Ioane 1:1-51
1 Matamana negana ai Hereva ia noho, bona Hereva be Dirava ida ia noho, bona Hereva be dirava ta.
2 Ia be matamana negana ai Dirava ida ia noho.
3 Gau ibounai be ia amo idia vara, ma dala idauna ta amo idia vara lasi.
4 Ia amo ia vara gauna be mauri, bona unai mauri be taunimanima edia diari.
5 Bona diari be dibura lalonai ia diaridiari noho, to dibura ese unai diari ia koua lasi.
6 Tau ta be Dirava ena gwaukau tauna bamona idia siaia, ena ladana be Ioane.
7 Ia be hereva hamomokania totona ia mai, diari do ia gwauraia hedinarai, unai amo taunimanima idauidau ibounai be ia amo idia abidadama diba.
8 Ia be unai diari lasi, to ia mai unai diari ia gwauraia hedinarai totona.
9 Taunimanima idauidau ibounai dekenai diari ia henia diari momokanina, be kahirakahira tanobada dekenai do ia mai.
10 Ia be tanobada dekenai ia noho, bona tanobada be ia amo ia vara, to tanobada be ia ia diba lasi.
11 Ia be ena hanua dekenai ia mai, to ia idia abia dae lasi.
12 To ia idia abia dae taudia iboudiai dekenai maoro ia henia Dirava ena natudia ai idia lao totona, badina ena ladana idia abidadama henia.
13 Bona idia be hidio bona rara amo idia vara lasi bona tanobada tamadia edia ura dainai idia vara lasi, to Dirava amo idia vara.
14 Unai dainai Hereva be taunimanima ai ia lao bona ita huanai ia noho, bona ena hairai ita itaia, unai bamona hairai be natuna korikorina* ese tamana ta amo ia abia hairaina hegeregerena. Bona ia be hebogahisi hereadaena bona hereva momokani amo ia honu.
15 (Ioane ese unai tauna ia gwauraia hedinarai, oibe, ia boiboi—Ioane ese inai hereva ia gwauraia—ia gwau: “Lau murinai ia mai tauna be lau vairanai ia lao vadaeni, badina lau do vara lasi neganai, ia be ia noho vadaeni.”)
16 Ita ibounai be ia amo hebogahisi hereadaena ita abia guguru, badina ia be hebogahisi hereadaena amo ia honu.
17 Dirava ese Mose amo Taravatu ia henia, to hebogahisi hereadaena bona hereva momokani be Iesu Keriso amo ia mai.
18 Tau ta ese nega ta Dirava ia itaia lasi. To Tamana ese ia lalonamo henia* natuna korikorina, ia be Dirava bamona, ia sibona ese Dirava ia gwauraia hedinarai vadaeni.
19 Vadaeni Ierusalema amo Iuda taudia ese dubu biagudia bona Levi taudia idia siaia, Ioane idia nanadaia totona: “Oi be daika?”
20 Ioane ia hunia lasi, to ia hereva hedinarai, ia gwau: “Lau be Keriso lasi.”
21 Bona ia idia nanadaia: “Vadaeni oi be daika? Oi be Elia, a?” Bona ia gwau: “Lasi, lau be Elia lasi.” “Vadaeni oi be idia gwauraia peroveta tauna, a?” Ia haere: “Lasi!”
22 Unai dainai ia dekenai idia gwau: “Oi be daika? Ai oi hamaoroa, bena ai idia siaia taudia dekenai haere ta ai henia diba. Oi sibona oi gwau oi be daika?”
23 Ia gwau: “Lau be tano gagaena* ai ia boiboi tauna ena gadona, ‘Iehova ena dala umui hamaoromaoroa,’ peroveta tauna Isaia ia hereva bamona.”
24 Vadaeni idia siaia taudia be Farisea taudia amo idia mai.
25 Bona Ioane idia nanadaia, idia gwau: “Dahaka dainai bapatiso oi karaia bema oi be Keriso eiava Elia eiava idia gwauraia peroveta tauna lasi?”
26 Ioane ia haere, ia gwau: “Lau be ranu lalonai bapatiso lau karaia. Umui huanai ta ia gini noho, bona ia umui diba lasi.
27 Ia be egu murinai ia mai noho, to lau hegeregere lasi ena tamaka varona lau kokia totona.”
28 Unai gaudia be Betania, Ioridane ena unai kahana ai idia vara, unuseniai Ioane be bapatiso ia karaia noho.
29 Murina dinana ai, ia ese Iesu ia itaia ia dekenai ia mai noho, bona ia gwau: “Itaia, Dirava ena Mamoe Natuna, ia be tanobada taudia edia kara dika kokia tauna!
30 Lau herevalaia tauna be inai, lau gwau, lau murinai tau ta ia mai, ia be egu vairanai ia lao vadaeni, badina lau do vara lasi neganai, ia be ia noho vadaeni.
31 Lau danu be ia lau diba lasi, to lau mai bona ranu lalonai bapatiso lau karaia ena badina be Israela taudia dekenai do ia hedinarai.”
32 Danu, Ioane ia hamomokania, ia gwau: “Lau itaia lauma helaga be pune bamona guba amo ia diho bona ia latanai ia helai.
33 Ena be ia lau diba lasi, to lau ia siaia ranu lalonai bapatiso do lau karaia Tauna be lau dekenai ia gwau, ‘Do oi itaia, ia latanai lauma helaga ia diho bona ia helai, inai tauna be lauma helaga amo bapatiso do ia karaia.’
34 Bona lau itaia vadaeni bona lau hamomokania inai tauna be Dirava ena Natuna.”
35 Bona murina dinana ai, Ioane be ena hahediba taudia rua ida ia gini.
36 Bona ia itaia Iesu ia raka lao neganai, ia gwau: “Itaia, Dirava ena Mamoe Natuna!”
37 Bona hahediba taudia rua ese ena hereva idia kamonai bona Iesu murinai idia lao.
38 Vadaeni Iesu ia giroa bona ia murinai idia mai taudia ia itaia neganai, ia gwau: “Dahaka umui tahua noho?” Ia dekenai idia gwau: “Rabi e, (anina be Hadibaia Tauna) oi be edeseni oi noho?”
39 Idia dekenai ia gwau: “Umui mai bona do umui itaia.” Vadaeni idia lao bona ia noho gabuna idia itaia, bona unai dina ai ia ida idia noho, unai be adorahi 4 oklok* bamona.
40 Idia rua amo ta be Simona Petero ena tadikaka, Andrea, ia be Ioane ia gwauraia herevana ia kamonai bona Iesu murinai ia raka.
41 Ia ese ena tadikaka Simona ia davaria guna bona ia dekenai ia gwau: “Ai be Mesia (anina be Keriso) ai davaria vadaeni.”
42 Bena Iesu dekenai ia hakaua lao. Bona Iesu ese ia itaia neganai, ia gwau: “Oi be Simona, Ioane ena natuna. Oi do idia gwauraia Kepa” (anina be Petero).
43 Murina dinana ai, Iesu ia ura Galilea dekenai ia lao. Bona Filipo ia davaria neganai, ia dekenai ia gwau: “Lauegu murinai oi raka.”
44 Filipo be Betesaida amo, unai be Andrea bona Petero edia taoni.
45 Filipo ese Natanaela ia davaria bona ia dekenai ia gwau: “Mose ena Taravatu lalonai bona peroveta taudia ese idia sivarailaia tauna, ai davaria vadaeni, ia be Iesu, Iosepa ena natuna, Nasareta amo.”
46 To Natanaela be Filipo dekenai ia gwau: “Gau namona ta be Nasareta amo ia mai diba, a?” Filipo be ia dekenai ia gwau: “Oi mai bona itaia.”
47 Iesu ia itaia Natanaela be ia dekenai ia mai bona Natanaela ia herevalaia, ia gwau: “Itaia, ia be Israela tauna, ia dekenai koikoi ta be lasi momokani.”
48 Natanaela be ia dekenai ia gwau: “Edena bamona lau oi diba?” Iesu ese ia haere henia, ia gwau: “Fig auna henunai oi helai bona Filipo ese oi ia do boiria lasi neganai, oi lau itaia vadaeni.”
49 Natanaela ia haere ia dekenai, ia gwau: “Rabi e, oi be Dirava ena Natuna, oi be Israela ena King.”
50 Iesu ese ia haere henia, ia gwau: “Fig auna henunai oi lau itaia herevana lau gwauraia dainai lau oi abidadama henia, a? Oi ese inai idia hereaia gaudia do oi itaia.”
51 Ia dekenai ma ia gwau: “Umui lau hamaoroa momokani, do umui itaia guba be do ia kehoa bona Dirava ena aneru be guba dekenai idia daekau bona taunimanima ena Natuna dekenai idia diho.”
